WhatsAppல் Dxers Guide

WhatsAppல் Dxers Guide  எனும் நமது ஆங்கில வானொலி தொடர்பான இதழ் தொடங்கப்பட்டுள்ளது. இதன் மூலம் இனி தினமும் வானொலித் தொடர்பானத் தகவல்களை உங்களின் கைப்பேசியிலேயே உடனுக்குடன் அறிந்துகொள்ள முடியும். உங்களுக்கும் இந்தத் தகவல்கள் வேண்டுமாயின் உடனே உங்களைப் பற்றிய விபரங்களை ardicdxclub [at] yahoo [dot] co [dot] in எனும் மின்அஞ்சல் முகவரிக்கு அனுப்பி பதிவு செய்து கொள்ளவும்.

வானொலி அண்ணா' கூத்தபிரான் காலமானார்

"வானொலி அண்ணா' என்று அழைக்கப்படும் நாடகக் கலைஞர் கூத்தபிரான் (84) ஆந்திர மாநிலம், ஹைதராபாதில் செவ்வாய்க்கிழமை காலமானார்.

அகில இந்திய வானொலியில் 34 ஆண்டுகள் பணியாற்றிய அவர், "வானொலி அண்ணா' என்ற சிறுவர்களுக்கான நிகழ்ச்சி மூலம் பிரபலமானவர்.

எண்ணற்ற வானொலி நாடகங்களை எழுதி இயக்கியுள்ள கூத்தபிரான், 7,000-க்கும் அதிகமான மேடை நாடகங்களில் நடித்துள்ளார்.

கடந்த ஞாயிற்றுக்கிழமை (டிச. 21) சென்னை தியாகராய நகர் ராமாராவ் கலா மண்டபத்தில் "ஒரு ரோபோவின் டைரி' என்ற நாடகத்தில் அவர் கடைசியாக நடித்தார். இந்த நாடகத்தை இயக்கியவர் அவரது மகன் என். ரத்தினம் என்பது குறிப்பிடத்தக்கது.

ஒரு நிகழ்ச்சிக்காக ஹைதராபாத் சென்றவர் அங்கேயே மாரடைப்பால் காலமானார். அவரது உடல் செவ்வாய்க்கிழமை இரவு சென்னை அடையாறில் உள்ள அவரது இல்லத்துக்குக் கொண்டு வரப்பட்டது.

புதன்கிழமை (டிச. 24) பிற்பகலில் பெசன்ட் நகர் மின் மயானத்தில் இறுதிச் சடங்குகள் நடைபெறும் என அவரது குடும்பத்தினர் தெரிவித்தனர். மறைந்த கூத்தபிரானுக்கு கணேஷ், ரத்தினம் என இரண்டு மகன்கள் உள்ளனர். இருவரும் நாடகக் கலைஞர்கள்.

தொடர்புக்கு: 94447 43084.

நன்றி தினமணி 24 December 2014

புலிகளின் வானொலி ஒலிக்குமா?

வழக்கமாகவே நவம்பர் மாத கடைசி என்பது ஈழத்தமிழர்கள், ஈழ ஆதரவாளர்கள் உணர்ச்சி பூர்வமாக கொண்டாடும் நாட்களாக அமையும். நவம்பர் 27-ம் தேதி புலிகள் அமைப்பின் முதல் களப்போராளியான கேப்டன் சங்கர் மரணம் அடைந்த நாள். அதற்கு முந்தைய நாள் நவம்பர் 26 பிரபாகரன் பிறந்தநாள்.

எனவே, 25,26,27 ஆகிய மூன்று நாட்களையும் மாவீரர் தினங்களாக விடுதலைப்புலிகள் அமைப்பு கொண்டாடும். தலைமறைவு வாழ்க்கையில் இருந்த பிரபாகரன், நவம்பர் 27–ந்தேதிதான் வானொலியில் பேசுவார்.

அதற்காக உலகம் முழுவதும் தமிழர்கள் அந்த நாளுக்காக காத்திருப்பார்கள். 2009-ம் ஆண்டு மே மாதத்துக்குப் பிறகு, புலிகளின் வானொலி செயல்படவில்லை. அதனால் மாவீரர் தின உரைகளும் இடம்பெறவில்லை....

தொடர்ந்து படிக்க: http://www.maalaimalar.com/2014/11/26160143/prabhakaran-lives-or-not-myste.html

நன்றி: மாலை மலர் 2014/11/26

தி இந்து கூத்தபிரான் அவர்களுக்கு அஞ்சலி

நன்றி / தி இந்து 24/12/2014

தருன் விஜய் சீன வானொலி தமிழ்ப் பிரிவுக்கு பேட்டி

தமிழ் வளர்ச்சிக்கு உதவ பெய்ஜிங் பல்கலை. குழுத் தலைவரிடம் தருண் விஜய் வேண்டுகோள்

தமிழகத்தில் உள்ள சென்னை பல்கலைக்கழகம் உள்ளிட்ட பல்கலைக்கழகங்களுடன் சேர்ந்து தமிழ் மொழித் திட்டங்களைச் செயல்படுத்த வேண்டும் என்று சீனாவில் உள்ள பெய்ஜிங் (பீகிங்) பல்கலைக்கழகக் குழுத் தலைவர் ஜூ ஷான்லுவிடம் உத்தரகண்ட் மாநிலத்தைச் சேர்ந்த மாநிலங்களவை உறுப்பினர் தருண் விஜய் வலியுறுத்தினார்.

இந்தியா சீனா இடையே நல்லுறவை மேம்படுத்துவதற்காக பகத் சிங் கோஷ்யாரி தலைமையில் 13 பாஜக எம்.பி.க்கள் கடந்த சனிக்கிழமை சீனாவுக்குப் பயணம் மேற்கொண்டுள்ளனர். இந்தக் குழுவில் உத்தரகண்ட் மாநிலத்தைச் சேர்ந்த தருண் விஜய் இடம் பெற்றுள்ளார்.

வட மாநிலத்தில் பிறந்திருந்தாலும், தமிழ் மொழியின் வளர்ச்சிக்காக அவர் தொடர்ந்து நாடாளுமன்றத்துக்கு உள்ளேயும், வெளியேயும் குரல் கொடுத்து வருகிறார்.

திருக்குறளை தேசிய நூலாக அறிவிக்க வேண்டும், வாராணசியில் பாரதியார் வாழ்ந்த இடத்தை தேசிய நினைவிடமாக்க வேண்டும், சென்னை உயர் நீதிமன்றத்தில் தமிழை வழக்காடு மொழியாக பயன்படுத்த வேண்டும் என்பன உள்ளிட்ட பல்வேறு கோரிக்கைகளை அவர் வலியுறுத்தி வருகிறார்.

இதையடுத்து, தருண் விஜயை கௌரவிக்கும் வகையில் அண்மையில் சென்னையில் கவிஞர் வைரமுத்து உள்ளிட்டோர் பாராட்டு விழா நடத்தினர். இந்த நிலையில், சீனத் தலைநகர் பெய்ஜிங்குக்கு சென்றுள்ள தருண் விஜய், அங்குள்ள பழைமையும் பாரம்பரியமும் மிக்க பெய்ஜிங் (பீகிங்) பல்கலைக்கழகத்துக்குச் சென்றார். உலகின் பன்னாட்டு மொழிகளும் அந்தப் பல்கலைக்கழகத்தில் பயிற்றுவிக்கப்படுவது குறித்து அவர் கேட்டறிந்தார். அந்தப் பல்கலைக்கழகக் குழுத் தலைவர் ஜூ ஷான்லுவிடம் பன்னாட்டு மொழிகளைப் பயிற்றுவிக்கும் போது உலகின் தொன்மை வாய்ந்த தமிழ் மொழியையும் பெய்ஜிங் பல்கலைக்கழகத்தில் பயிற்றுவிக்க நடவடிக்கை எடுக்க வேண்டும் என்று தருண் விஜய் கேட்டுக் கொண்டார்.

இதுகுறித்து "தினமணி' நிருபரிடம் தருண் விஜய் தொலைபேசி மூலம் அளித்த பேட்டியின் விவரம்:

"சீனத் தலைநகர் பெய்ஜிங்கின் மேற்குப் பகுதியில் உள்ள ஹைதியான் மாவட்டத்தில் இந்தப் பல்கலைக்கழகம் அமைந்துள்ளது. கலை, அறிவியல், உலகப் பொறியியல், பல்துறை ஆராய்ச்சி ஆகியவற்றில் அந்தப் பல்கலை. தலைசிறந்ததாகக் கருதப்படுகிறது. சீனாவின் பழைமையான, முதலாவது பல்கலைக்கழகமாக இது விளங்குகிறது. அதன் குழுத் தலைவர் ஜூ ஷான்லு, மொழி வளர்ச்சியில் பெய்ஜிங் பல்கலைக்கழகம் ஆற்றி வரும் சேவைகளை விளக்கினார்.

அப்போது, அவரிடம் இந்தியாவிலும் உலகின் பழைமையான மொழியான தமிழ் உள்ளது. உலகப் பொதுமறையான திருக்குறளை தமிழ் மொழி அளித்துள்ளது. உலக நெறிகள் பலவற்றுக்கும் தமிழ் முன்னுதாரணமாக உள்ளது என்று கூறினேன். அதைக் கேட்ட அவர், தமிழ் மொழியின் சிறப்பை நாங்களும் அறிவோம். சீன அரசால் தமிழ் மொழி வானொலி சேவை வழங்கப்படுகிறது. சீனாவில் வசிக்கும் தமிழர்களிடையே சீன வானொலிக்கு வரவேற்பு உள்ளது என்றார்.

இதையடுத்து, தமிழகத்தில் சென்னைப் பல்கலைக்கழகம் உள்ளிட்ட பல்கலைக்கழகங்களுடன் கூட்டுச் சேர்ந்து தமிழ் மொழியை சீனாவில் வளர்க்க நடவடிக்கை எடுங்கள் என்று ஜூ ஷான்லுவிடம் கேட்டுக் கொண்டேன். இந்த யோசனையை ஏற்றுக் கொண்ட அவர், விரைவில் இது தொடர்பாக பல்கலைக்கழக கவுன்சிலில் பேசி நடவடிக்கை எடுப்பதாகத் தெரிவித்தார்' என்று தருண் விஜய் கூறினார்.

சீனப் பயணத்தையொட்டி அந்த நாட்டு வானொலியின் தமிழ் சேவைக் குழுவினர் தருண் விஜயை பேட்டி எடுத்தனர். அந்த நிகழ்ச்சியில் தமிழகத்தில் உள்ள வைரமுத்துவிடமும் சீன தமிழ் வானொலி சேவைக் குழுவினர் பேட்டி கண்டனர்.

நன்றி: தினமணி 21-Nov-2014

இலங்கையில் செரண்டிப் பத்திரிக்கை, வானொலி தொலைக்காட்சி ஆரம்ப

இலங்கையின் இஸ்லாமிய ஊடக நிறுவனமான “தேசிய நியுஸ் ஏஜென்சி ” இன்று உத்தியோகபூர்வமாக ஆரம்பித்து வைக்கப்பட்டது.
கொழும்பு கிங்ஸ்பெரி ஹோட்டலில் ஜனாதிபதி சட்டத்தரணி பாயிஸ் முஸ்தபா தலைமையில் இடம் பெற்ற நிகழ்வில் பிரதம அதிதியாக பொருளாதார அபிவிருத்தி அமைச்சர் பஷில் ராஜபக்ஷவும் கௌரவ அதிதிகளாக ஐக்கிய தேசியக் கட்சியின் பிரதித் தலைவர் கரு ஜெயசூரிய, அமைச்சர்களான றிஷாட் பதியுதீன், ரவுப் ஹக்கீம், உட்பட பல பாராளுமன்ற உறுப்பினர்கள், மாகாண சபை உறுப்பினர்கள், விஷேட அதிதியாக சர்வதேச மனிதவள அபிவிருத்திக்கான அமைப்பின் இந்திய உப கண்டத்திற்கான பொறுப்பாளர்  அஷ் ஷெய்க். காலித்பின் சாலிஹ் அல்-தாவூத் கொழும்பு மாநகர முதல்வர் ஏ.ஜே.எம்.முஸம்மில், சமயத் தலைவர்கள், அரசியல் பிரமுகர்கள், கல்விமான்கள், இலங்கையில் உள்ள தூதுவராலயங்களின் தூதுவர்கள், பிரதிநிதிகள், ஊடகவியலாளர்கள் என பலர் கலந்து கொண்டனர்.
“செரண்டிப்” எனும் பெயரில் தமது ஊடகத்தை ஆரம்பித்துள்ள “தேசிய நியுஸ் ஏஜென்சி ” இன்று முதல் செரண்டிப் தினசரி பத்திகை ஒன்றை வெளியிடவிருக்கும் அதேவேளை “செரண்டிப் கேர்பில் தொலைக்காட்சி மற்றும் செரண்டிப் இணைய வானொலி ஒன்றையும் ஆரம்பித்துள்ளார்.
மேற்படி நிகழ்வில் வரவேற்புரையை முஸ்லிம் மீடியா போரத்தின் தலைவர் என்.எம்.அமீனும் தலைமை உரையை ஜனாதிபதி சட்டத்தரணி பாயிஸ் முஸ்தபாவும் நிகழ்த்தினர்.
இதன்போது இணைய தொலைக்காட்சி சேவையை அமைச்சர் பஷில் ராஜபக்ஷவும், இணைய வானொலி சேiவையை ஐக்கிய தேசியக் கட்சியின் பிரதித் தலைவர் கரு ஜெயசூரியவும், பத்திரிகை வெளியீட்டினை உலக முஸ்லிம் முன்னணியின் தலைவர் அஷ் ஷெய்க். காலித்பின் சாலிஹ் அல்-தாவூத் ஆகியோரும் உத்தியோக பூர்வமாக வெளியிட்டு வைத்தனர். (ஸ)
தகவல்/ http://dailyceylon.com/ 16/12/2014

'வானொலி' என்று ஒரு பத்திரிகை

''அந்தக் காலத்தில் 'வானொலி' என்று ஒரு பத்திரிகையைச் சென்னை வானொலி நிலையம் வெளியிட்டு வந்தது. தேதி வாரியாக நிகழ்ச்சிகள் அதில் பிரசுரமாகும். முக்கியமான கச்சேரிகளில், என்னென்ன ராகங்களில் என்னென்ன பாடல்கள் இருக்கும் என்ற விவரங்களும் அதில் இருக்கும். அந்தத் தகவலை படித்து வைத்துக்கொண்டு திருவாவடுதுறை ராஜரத்தினம் பிள்ளையின் கச்சேரியைக் கேட்காமலேயே கேட்ட மாதிரி எழுதிவிட்டார் விமர்சகர்!

அவருடைய தவறை வாசகர்கள் பலரும் சுட்டிக் காட்டினார்கள். அந்தப் பத்திரிகையின் ஆசிரியர் எல்லாக் கடிதங்களையும் பிரசுரித்தார். அதன் இறுதியில் 'இந்த சங்கீத விமரிசனப் பகுதி போரடிக்கிறது, யாரும் படிப்பதில்லை என்று சிலர் சொன்னார்கள். அது எவ்வளவு தூரம் உண்மை என்பதைக் கண்டறிவதற்காக, வேண்டுமென்றே அப்படிப் போட்டோம். ஏராளமான வாசகர்கள் படிக்கிறார்கள் என்று இப்போது தெரிகிறது. ரொம்ப சந்தோஷம்' என்ற குறிப்பு எழுதி விட்டார்!

(இது நான் கேள்விப்பட்ட விஷயம்.)

- இசை விமர்சனம் எனும் கட்டுரையில் திரு. வாதுலன்  அப்புசாமி டாட் காம் இணைய தளத்தில் எழுதியது

மேலும் படிக்க: http://www.appusami.com/v267vathoolan.asp
நன்றி: appusami.com

என்.எல்.சி., பள்ளியில் வானொலி ஒலிப்பதிவு

மந்தாரக்குப்பம்: மந்தாரக்குப்பம் என்.எல்.சி., மேல்நிலைப் பள்ளியில் வானொலி ஒலிப்பதிவு நிகழ்ச்சி நடந்தது.புதுச்சேரி வானொலி நிலையம் சார்பில் சிறுவர் பூங்கா நிகழ்ச்சிக்கு, மந்தாரக்குப்பம் என்.எல்.சி., மேல்நிலைப் பள்ளியில் ஒலிப்பதிவு செய்யப்பட்டது.நிகழ்ச்சிக்கு, பள்ளி தலைமை ஆசிரியர் அமுதா தலைமை தாங்கினார். ஒருங்கிணைப்பாளர் மணிவாசகம் முன்னிலை வகித்தார். தொழிற்கல்வி ஆசிரியர் சீதாராமன் வரவேற்றார். அதில், "தூய்மையான இந்தியா விழிப்புணர்வு நாடகம், பாடல்கள், திருக்குறள் காட்டும் தூய்மை நெறி, ஆற்றல் சேமிப்பு, வினாடி - வினா' உட்பட பல்வேறு நிகழ்ச்சிகள் ஒலிப்பதிவு செய்யப்பட்டன. 15க்கும் மேற்பட்ட மாணவ, மாணவிகள் பங்கேற்றனர். இந்நிகழ்ச்சி வரும் 14ம் தேதி பகல் 2:30 மணிக்கு வானொலியில் ஒலிபரப்பு செய்யப்படுகிறது.

நன்றி / தினமலர் 15/12/2014

வானொலியும் ஜிசாட்-16 செயற்கைக்கோளும்

ஜிசாட்-16 செயற்கைக்கோளை வெற்றிகரமாக விண்ணில் ஏவியது இந்தியா

தொலைத்தொடர்பு வசதியை மேம்படுத்த வகை செய்யும் இந்தியாவின் ஜிசாட்-16 செயற்கைக்கோள் நேற்று அதிகாலை 2.10 மணிக்கு வெற்றிகரமாக விண்ணில் ஏவப்பட்டது.

பிரெஞ்சு கயானாவில் உள்ள கொரூ ராக்கெட் ஏவுதளத்திலிருந்து ஏரியான் 5 ராக்கெட் மூலம் இந்த செயற்கைக்கோள் விண்ணில் செலுத்தப்பட்டது. விண்ணில் ஏவப்பட்ட 32-வது நிமிடத்தில் இந்த செயற்கைக்கோள் அதன் சுற்றுவட்டப் பாதையில் வெற்றிகரமான நிலைநிறுத்தப்பட்டது.

3,181 கிலோ எடை கொண்ட ஜிசாட்-16 செயற்கைக்கோள், தகவல் தொடர்புக்கான 48 டிரான்ஸ்பான்டர்களை கொண்டது. இந்திய விண்வெளி ஆய்வு மையம் (இஸ்ரோ) தயாரித்த தகவல் தொடர்பு செயற்கைக்கோள்களில் இதுவே மிகப்பெரியது.

ஜிசாட்-16 விண்ணில் ஏவப்பட்ட பிறகு, கர்நாடக மாநிலம், ஹாசனில் உள்ள இஸ்ரோ தலைமை அலுவலக கட்டுப்பாட்டு அறை, இந்த செயற்கைக்கோளை தனது கட்டுப்பாட்டுக்குள் கொண்டுவந்தது. முதற்கட்ட சோதனையில் இந்த செயற்கைக்கோளின் செயல்பாடுகள் சீராக இருப்பதாக இஸ்ரோ தெரிவித்தது.

மேலும் செயற்கைக்கோளை அதன் சுற்றுவட்டப்பாதையில் இருந்து முதல்முறையாக உயர்த்தும் பணி திங்கள்கிழமை அதிகாலை 3.50 மணிக்கு நடைபெறும் என்றும் இஸ்ரோ கூறியது.

ஜிசாட்-16 செயற்கைக்கோளை கடந்த வெள்ளிக்கிழமை விண்ணில் ஏவ திட்டமிடப்பட்டிருந்தது. ஆனால் மோசமான வானிலை காரணமாக இதன் பயணம் 1 நாள் தள்ளிவைக்கப்பட்டது. பின்னர் இப்பயணம் வானிலை காரணங்களுக்காக மேலும் ஒருநாள் தள்ளிவைக்கப்பட்டு, இறுதியாக ஞாயிற்றுக்கிழமை அதிகாலை 2.10 மணிக்கு ஏவப்பட்டது.

இந்த செயற்கைக்கோளில் பொருத்தப்பட்டுள்ள 46 டிரான்ஸ்பாண்டர்களின் உதவியால் தொலைக்காட்சி, வானொலி சேவைகள், பெரிய அளவிலான இணையப் பயன்பாடு, தொலைபேசி இயக்கங்கள் மேம்படும் என்று வல்லுநர்கள் தெரிவித்தனர்.

சுமார் ரூ.880 கோடி செலவிலான ஜிசாட்-16 செயற்கைக்கோளுடன் டைரக் டி.வி. என்ற அமெரிக்க நிறுவனத்தின் செயற்கைக்கோளையும் ஏரியான் 5 ராக்கெட் விண்ணில் செலுத்தியது. இந்நிலையில் விண்ணுக்குப் புறப்பட்ட 28-வது நிமிடத்தில் அமெரிக்க நிறுவனத்தின் செயற்கைக்கோளும், 4 நிமிடங்களுக்குப் பிறகு இந்திய செயற்கைக்கோளும் ஏவப்பட்டன.

ஜிசாட்-16-ஐயும் சேர்த்து இதுவரை 18 செயற்கைக்கோள்கைளை இஸ்ரோவுக்காக ஏரியான் விண்ணில் செலுத்தியுள்ளது.

பிரதமர் மோடி வாழ்த்து

இதனிடையே ஜிசா-16 செயற்கைக்கோள் வெற்றிகரமான விண்ணில் செலுத்தப்பட்டதற்கு விஞ்ஞானிகளுக்கு பிரதமர் நரேந்திர மோடி வாழ்த்து தெரிவித்துள்ளார்.

“ஜிசாட்-16 செயற்கைக்கோள் வெற்றிகரமாக ஏவப்பட்டதற்கு நமது விஞ்ஞானிகளை பாராட்டுகிறேன். இந்த செயற்கைக்கோள் நமது விண்வெளித் திட்டத்தின் முக்கிய சொத்தாக மாறும்” என்று அவர் கூறியுள்ளார்.

நன்றி: தி இந்து

கனடிய தமிழ் வானொலி

கனடிய தமிழ் வானொலி முன்னெடுத்த மலையக மக்களுக்கான நிதி சேர் நிகழ்வு

மண்ணையும் மனங்களையும் நேசிக்கும் கனேடிய தமிழ் வானொலியூடாக கனடியத் தமிழர்கள் பெருமளவில் பங்கு கொண்டு மலையக மக்களது அவலத்திலும் ஆழ்ந்த இழப்பிலும் தமது துயர் பகிர்வை செய்தனர். எமது மலையக உறவுகளுக்கான ஆறுதலை தெரிவித்த கனடியத் தமிழ் மக்கள் பாதிக்கப்பட்ட மலையக தமிழ் மக்ளுக்கு உடனடியாக உதவ நிதி சேகரிப்பிலும் தம்மை இணைத்துக் கொண்டனர். எமது தாயக மக்களுக்கு தொடர்ச்சியாக உதவிவரும் 'மண்வாசனை" அமைப்பினரும் கனடியத் தமிழ் வானொலியும் இணைந்து நடாத்திய ' எம் மலையக உறவூகளின் துயர் துடைப்போம்" நிகழ்வில் பெருமளவு கனடியத் தமிழ் மக்களும் கனடிய தமிழ் வானொலியுடன் நீண்ட காலமாக இணைந்திருக்கும் ஐரோப்பிய மற்றும் வெளிநாட்டு உறவுகளும் பங்கு பற்றினர்.

   

அண்மையில் மலையகத்தில் ஏற்பட்ட மண்சரிவினால் தமது உறவுகள் பலரை இழந்தும் தமது இருப்பிடங்களை தொலைத்தும் நிற்கும் எம் மலையக உறவுகளுக்காக கனேடிய தமிழ் வானொலியூடாக பங்கு கொண்ட எம்மக்கள் குறுகிய நேரத்துக்குள் இருபத்தைந்து ஆயிரம் டொலர்களை முன்வந்து வழங்கினர்.

சில மணி நேரங்களே நடைபெற்ற இவ்வானொலி நிகழ்ச்சியூடாக தமது உறவுகளுக்காக குரல் கொடுத்த எம்மக்கள் மலையக உறவுகள் நீண்டகாலமாக எதிர் கொண்டு வரும் அநீதிகளையூம் அரச அடக்குமுறைகளையும் பேசியதோடு மலையக தமிழர் சமூகமாக அவர்களது வாழ்வுரிமைக்கான போராட்டத்தில் எமது தொடர்ச்சியான பங்களிப்பும் ஆதரவூம் இருக்க வேண்டும் எனவும் தமது கருத்துக்களை முன்வைத்தனர் . கடந்த ஐம்பது வருடங்களுக்கு மேலாக ஒரு சமூகமாக எமது உரிமைகளுக்காகப் போராடிவரும் நாம் அதுவும் குறிப்பாக அதே 'சிறிலங்கா நாட்டின்" இன்னொரு சமூகமாக இருந்துவரும் மலையக மக்கள் எதிர்கொள்ளும் அநீதிகளிற்காக குரல் கொடுப்பதன் மூலமே அவர்களது போராட்டத்தைப் பலப்படுத்தவும் அதனுடாக எமது போராட்டத்திற்கான ஆதரவை வலுப்படுத்தவும் முடியூம் என்னும் வகையிலான காத்திரமான கருத்துப் பரிமாற்றங்களுக்குமான களமாக இவ்வானொலி நிகழ்ச்சி நடைபெற்றது.

இவ்வாறான வகையில் ஆரோக்கியமான உரையாடல்களையும் ஆக்கபூர்வமான பங்களிப்புக்களையும் உருவாக்கும் ஒரு ஊடகமாக எம்மை தொடர்ந்து வளர்த்துக் கொள்வதில் கனடியத் தமிழ் வானொலி எம் மக்களுடன் சேர்ந்து பெருமை கொள்கின்றது. இந் நிகழ்ச்சியில் இணைந்து செயற்பட்ட மண்வாசனை அமைப்பிற்கும் மற்றும் இதில் இணைந்து பங்கெடுத்த அனைத்து உறவுகளுக்கும் எமது மனமார்ந்த நன்றி.

செய்தி - கனடிய தமிழ் வானொலி

நவம்பர் 30, 2014, ஜெகதீஷ் சந்திரபோஸ் பிறந்த நாள்

தாவரங்களுக்கும் உயிர் உண்டு என்பதை உலகுக்கு உணர்த்திய அறிவியலறிஞர், ஜெகதீஷ் சந்திர போஸ், 1858-ம் ஆண்டு இதே நாளில்தான் பிறந்தார். தற்போதைய பங்களாதேஷின் பிர்காம்பூர் என்ற ஊரில், பிறந்தார் ஜெகதீஷ் சந்திரபோஸ். ஜெகதீஷின் தந்தை பகவான் சந்திரபோஸ், இவர் பரித்பூரின் காவல் துணை ஆணையராக பணிபுரிந்தவர்.

கொல்கத்தாவில் உயர் நிலைப்பள்ளிப் படிப்பை முடித்த போஸ், கேம்பிரிட்ஜ் பல்கலைக்கழகத்தில் முதுகலைப் பட்டத்தை முடித்தார். 1885 - ல் நாடு திரும்பிய ஜெகதீஷ், சென்னை மாநிலக் கல்லூரியில் இயற்பியல் துறையில் பேராசிரியராக பணியில் சேர்ந்தார். அக்கல்லூரியில், முதல்முதலில் இயற்பியல் துறைக்கு செய்முறை கூடம் அமைத்தார் போஸ்.

பின்னர், அறிவியல் கண்டுபிடிப்புகளில் ஈடுபட்ட போஸ், 1893 - ல் வானொலி கண்டுபிடிப்புக்கான ஆய்வுகளை தொடங்கினார். 1897- ம் ஆண்டு கொல்கத்தாவில் வானொலிக்கான ஆய்வு முழுமைப் பெற்றது. இதே காலகட்டத்தில், மார்கோனியும் வானொலி கண்டுபிடிப்பில் ஈடுபட்டிருந்தார்.

வானொலி கண்டுபிடிப்பைப் பற்றி இருவரும் லண்டனில் விவாதித்தும் இருந்தனர். எனினும், மார்கோனி தான் வானொலி கண்டுபிடித்தறக்கான காப்புரிமையைப் பெற்று, வானொலி கண்டுபிடித்தவர் என்ற பெருமையைப் பெற்றார்.

இயற்பியல் தவிர, தாவரவியலிலும் பல்வேறு ஆய்வுகளை மேற்கொண்ட போஸ், 1927 - ம் ஆண்டு தாவரங்களுக்கும் உயிர் உண்டு என்பதைக் கண்டுபிடித்தார். இயற்பியல் மற்றும் தாவரவியலில் பல்வேறு ஆய்வுகள் செய்து வெற்றி கண்ட போஸ், 1937-ம் ஆண்டு உயிரிழந்தார்.

University of Madras

AIR Delhi

வீடியோ மூலம் பாடங்கள் நடத்தும் பல் ஊடக ஆராய்ச்சி மையங்கள்!

பள்ளிப்படிப்பை முடித்து, கல்லூரிக்குள் அடியெடுத்து வைக்கும் அத்தனை பேருக்குள்ளும், 'நாம் வளர்ந்துவிட்டோம்' என்ற எண்ணம், இழையோடும். கல்லூரி வளாகங்களில் கிடைக்கும், நட்பு, சுதந்திரம், பரந்துபட்ட கல்விவெளி, சமூக பங்களிப்பு, வேலை தேடும் முனைப்பு, குடும்பம் பற்றிய சிந்தனைகள் என, வெவ்வேறு நிறங்களில் எண்ணங்கள் முளைவிடும், அந்த பருவத்தில். அந்த காலகட்டங்களில் கற்பனைகள் சிறகு தைக்கும்; கலைகள் எல்லாம் உறவு வைக்கும். அந்த பருவத்தினரை, வெறும் புத்தகங்களால் மட்டுமே அடைகாத்துவிட முடியாது. கொஞ்சம் குறும்பு, கொஞ்சம் குதூகலம் கலந்து, சான்றுகள் பல அடுக்கி, செய்முறையின் ஊடே, பாடத்தை நகர்த்தி, தன் பக்கம், அவர்களை ஈர்க்க நினைக்கும் ஆசிரியர்களே, பெரும்பாலும் வெற்றி பெறுகின்றனர். ஆயினும், இன்றைய தகவல் தொழில்நுட்ப உலகத்தில், மாணவர்களுக்கு பாடம் எடுப்பது, பெரும்பாலான பேராசிரியர்களுக்கு சிரமமாக உள்ளதாகவே, கூறப்படுகிறது.

புதுசா யோசிக்கணும்... : அதற்கு மாற்றாக, பாடங்களை, அனுபவம் மிக்க பேராசிரியர்களை கொண்டு கற்பித்து, அதை, அப்படியே வீடியோவாக பதிவு செய்து, அவர் போதிப்பதை, தட்டச்சு செய்து, அவர் சொல்லும் விளக்கங்களுக்கு, அனிமேஷன், வீடியோ முறையில் விளக்கம் கொடுத்து, வகுப்பறையில் திரையிட்டு விளக்கினால்... அதை, இணையதளத்தில் பதிவேற்றினால்... தொலைக்காட்சியில் ஒலிபரப்பினால்... நன்றாக இருக்குமே!

அதை தான், கல்வி பல் ஊடக ஆராய்ச்சி மையங்கள் செய்து கொண்டிருக்கின்றன. இந்த பணிக்காக, 22 ஆய்வு மையங்கள், இந்தியா முழுவதும் செயல்படுகின்றன.

தமிழகத்தில் இரண்டு மையங்கள் உள்ளன. அவை, மதுரை, காமராஜ் பல்கலை பல் ஊடக ஆய்வு மையம் மற்றும் சென்னை, அண்ணா பல்கலை பல் ஊடக ஆய்வு மையம் ஆகியவை.

சென்னை, அண்ணா பல்கலை பல் ஊடக ஆய்வு மையம், கடந்த, 1985ம் ஆண்டு துவக்கப்பட்டு, பல்வேறு படிநிலை களை கடந்து, செயல்பட்டுக் கொண்டிருக்கிறது. அதன் இயக்குனர், கவுரியிடம் பேசிய போது, அவர் கூறியதாவது:

இந்த மையம், கடந்த, 1985ம் ஆண்டு, ஒலிக்காட்சி ஆய்வு மையமாக (ஆடியோ விஷுவல் ரிசர்ச் சென்டர்) தான் துவக்கப்பட்டது. அதை துவக்கியது, பல்கலைக்கழக மானிய குழு.

அதன் நோக்கம், கல்வி தொலைக்காட்சி ஒலிபரப்பின் வழியாக, அறிவியல் தொழில்நுட்ப அறிவை, சமுதாயத்தில் பரவச் செய்வது. அந்த வகையில், பல்வேறு கல்வி நிகழ்ச்சிகளையும், சமூக பயன்பாட்டு நிகழ்ச்சிகளையும் தயாரித்து வழங்கி வருகிறது. 'எய்ட்ஸ்' குறித்து, தயாரித்து வழங்கிய நிகழ்ச்சிகளுக்காக, இந்திய தகவல் ஒலிபரப்பு அமைச்சகத்தால், சிறந்த மையத்திற்கான தேசிய விருதும் பெற்றிருக்கிறது. இவ்வாறு, அவர் தெரிவித்தார்.

காட்சிப்படுத்திய மாணவர்கள் : ''வாருங்கள்! சொன்னால் புரியாது, பார்த்தால் தான் புரியும்,'' என்றவாறே, நம்மை அழைத்தார், அம்மையத்தின் பொறுப்பாளர், ராஜேஷ். அவர் அழைத்து சென்ற இடம், நிகழ்ச்சி தயாரிப்பு கூடம். அங்கு... ஒளிவெள்ளத்தை பாய்ச்சியபடியே, கண்விழித்து கொண்டிருந்தன, விளக்குகள். ஊழிக்காலத்து கண்ணனின் வாய் போல, அங்கு நடப்பவற்றை விழுங்கி கொண்டிருந்தன, மூன்று கேமராக்கள். அவற்றில் ஒன்றை, பிடரி பிடித்து, அடக்கி வழி நடத்திக்கொண்டிருந்தார் ஒரு ஒளிப்பதிவாளர். அவரின் செய்கைகளை, கவனித்தும், விளக்கம் கேட்டும் புரிந்துகொண்டிருந்தனர், சில மாணவியர். இன்னும், இரு கேமராக்களை, இயக்கி, வித்தியாசமாக கோணம் வைத்து, காட்சிகளால் தீனிபோட்டுக் கொண்டிருந்தனர். அடுத்த அறை... பதியப்படும் காட்சி களை வாங்கி, சேமித்துக் கொண்டு, அவற்றை, நெறியாள்கையுடன், 'எடிட்' செய்து கொண்டிருந்தனர், சிலர்.

அவர்கள், வீடியோ காட்சிகளை 'எடிட்' செய்தபின், அது, மற்றொரு 'அனிமேஷன்' கூடத்திற்கு செல்கிறது. அங்கு, பேராசிரியர் தரும் விளக்கங்களுக்கு ஏற்ப, அனிமேஷன் காட்சிகளை உருவாக்கி கொண்டிருந்தனர். அடுத்து ஒருவர்... அவர், ஆசிரியர் நடத்தியவற்றை காதில் வாங்கி, தட்டச்சு செய்து, அவற்றை, மின் கட்டுரையாக மாற்றிக்கொண்டிருந்தார். பின், இசையமைப்பு கூடம். அங்கு, இசை சேர்ப்பு நடக்கிறது.

நிறைவாக, ஒரு பாடம், அரை மணிநேரத்திற்கு, வரையறுக்கப்பட்டு, (எடிட்), அதில், காட்சிகளாகவும், மின் கட்டுரையாகவும், ஒலி வடிவமாகவும் என, பல்வேறு படிநிலைகளில் பதிவேற்றம் செய்யப்பட்டு நிறைவுறுகிறது.

என்ன தான் நடக்குது? : ஒரு சுற்றுலா பயணியை அழைத்து செல்லும் வழிகாட்டி போல, தயாரிப்பு கூடங்களுக்கு அழைத்து சென்று திரும்பிய ராஜேஷ், சொன்ன செய்திகள் தான் இவை...: பல்கலைக்கழக மானிய குழு மூலம், பல்கலைக்கழகங்கள், கல்வி நிறுவனங்களுக்கு தரமான, மின் ஊடகங்களின் வழியாக, தரமான பாடங்களை, மாணவர்களுக்கு கொடுக்க வேண்டும் என்பதற்காக, கல்வி பல் ஊடக ஆய்வு மையங்களை உருவாக்கி உள்ளது.

ஐநூறுக்கும் மேற்பட்ட, தேர்ந்த தொழில்நுட்ப கலைஞர்கள், இந்த கல்வி சேவைக்காக பணியாற்றுகின்றனர். இந்த ஆய்வு மையங்கள் மூலம், 20 ஆயிரத்துக்கும் மேற்பட்ட பாடங்களை தயாரித்து, எப்போதும் மாணவர்கள் பயன்பெறும் வகையில், சேமித்து வைத்துள்ளோம்.

எங்கள் தயாரிப்பில், அண்ணா பல் கலையின் ஊடகவியல் மாணவர்களும் நேரடியாக பங்கேற்று, தயாரிப்பு சார்ந்த விவரங்களை தெரிந்துகொள்கின்றனர்.

யாருக்காக? எப்படி? : இந்த, பாடங்கள், இளநிலை பட்டம் படிக்கும், கலை அறிவியல் மாணவர்களுக்காக, ஒவ்வொரு பாடத்திற்கும், அரை மணிநேர அளவில், ஒருவரால் போதிக்கப்பட்டு, தயாரிக்கப்படுகின்றன. ஒரு பாடம், 30? பாடங்களாக தயாரிக்கப்பட்டு இருக்கும். அவை, வியாஸ், தூர்தர்ஷன் முதல் அலைவரிசை தொலைக்காட்சிகள், ஞானவாணி என்ற, வானொலி, www.cecugc.nic என்ற, இணையதளம் ஆகியவற்றின் மூலம் ஒலிபரப்பப்படுகின்றன. மேலும் விவரங்களுக்கு, infor.cec@nic.in என்ற, மின்னஞ்சல் வழியாகவோ, 044--22399106,- 22300105, -22300106 ஆகிய தொலைபேசி எண்களின் வழியாகவோ தொடர்பு கொள்ளலாம். இவ்வாறு, ராஜேஷ் தெரிவித்தார்.

Source: Dinamalar

பிபிசி தமிழ்ச் சேவையில் இப்பொழுது இருக்கும் நிலையே தொடர வேண்டும்! கி வீரமணி அறிக்கை!

லண்டனைத் தலைமை இடமாகக் கொண்டு செயல்பட்டு வரும் பிபிசி தமிழ்ச் சேவையை, டில்லிக்கு மாற்றி ஹிந்தியுடன் இணைப்பது தமிழர்களுக்குச் செய்யும் கேடு - இப்பொழுது இருக்கும் நிலையே தொடர வேண்டும் என்று திராவிடர் கழகத் தலைவர் கி வீரமணி கூறியுள்ளார்.

இதுதொடர்பாக அவர் வெளியிட்டுள்ள அறிக்கையில், 

1920-களில் இங்கிலாந்து, தன்னுடைய காலனி நாடுகளுக்கான ஒரு பொது வானொலிச் சேவை உருவாக்கியது.  இங்கிலாந்தைச் சேர்ந்த ஜான் ரெத் என்பவரின் சிந்தனையில் துவங்கிய இந்த வானொலிக்கு ஆரம்பத்தில் ஜான் ரெத் தலைவராக இருந்துவந்தார் 1927 ஆம் ஆண்டு ஏற்பட்ட நிதி நெருக்கடி காரணமாக இது மூடப்படவேண்டிய நிலையில் இருந்தபோது பிபிசி உலகப் பொது அமைப்பின் (தற்போதைய அய்.நா. போன்ற அமைப்புடன்)  பொது நிதியில் இயங்க ஆரம்பித்தது. (அதுவரை பிரிட்டன் நாடாளுமன்ற கட்டுப்பாட்டில் இருந்து வந்தது) பிபிசி என்ற பெயர் பிரபலமாகிவிட்டதால் எவ்வித மாற்றமும் இன்றி தொடர்ந்து அழைக்கப்பட்டது.  

பிபிசி என்பது பிரித்தானிய ஒலிபரப்புக் கூட்டு நிறுவனம் என்னும் பொருள்படும் British Broadcasting Corporation என்னும் ஆங்கிலப் பெயரின் சுருக்கமாகும். 

பிபிசி தொலைக்காட்சி, வானொலி மற்றும் இணையத்தள சேவைகளை வழங்குகிறது. இதன் தலைமையகம் இலண்டனில் உள்ள வெஸ்ட்மின்ஸ்டர் நகரத்தில் உள்ளது. இந்நிறுவனம் இருபத்து மூன்றாயிரம் பணியாளர்களைக் கொண்டுள்ள உலகின் பெரிய ஒலிபரப்பு நிறுவனமாகும். 

28 மொழிகளில் ஒலிபரப்பு!

இது உலகின் 150 தலைநகரங்களில் ஒலிபரப்புகிறது. உலகின் 28 மொழிகளில் நிகழ்ச்சிகளை ஒலிரப்புகிறது.

தமிழோசை நிகழ்ச்சிகளை பிப்ரவரி 2002 இல் இருந்து இலங்கை ஒலிபரப்புக் கூட்டு நிறுவனம் நேரடி ஒலிபரப்பு செய்து வந்தது எனினும் ஈழப்போர்ச் செய்திகளைப் பிபிசி ஒலிபரப்பிய வேளைகளில் அதனைக் குழப்பியதால் பிபிசி 9 பிப்ரவரி 2009 முதல் இலங்கை ஒலிபரப்பு நிலையத்தினுடான ஒலிபரப்பை இடைநிறுத்திக் கொண்டது.

இந்நிலையில் தமிழ்ச் சேவை ஒலிபரப்பினை பிபிசி ஹிந்தி சேவையுடன் இணைந்த நிலையில் டில்லியில் இயங்கிட முடிவு செய்யப்பட்டுள்ளது. செலவுகளைக் குறைக்கும் வகையிலேயே இந்த நடவடிக்கை எடுக்கப்படுவதாக பிபிசி அறிவித்துள்ளது. பிபிசி பேச்சாளர் ஒருவர் இது தொடர்பில் தகவல் தருகையில், பெருகிவரும் நேயர்களுக்கு ஏற்ப பிபிசி தமிழ்ச் சேவை புதுடில்லிக்கு மாற்றப்படவுள்ளதாக தெரிவித்துள்ளார். பிபிசி தமிழ்ச் சேவை இந்தியாவில் உள்ள தமிழ் நேயர்களை கவர்ந்துள்ளது. இந்தநிலையில் புலம்பெயர்ந்த தமிழர்கள் மற்றும் இலங்கை நேயர்களைக் கருத்திற்கொண்டு இந்த மாற்றம் இடம்பெறுவதாகவும் பிபிசியின் பேச்சாளர் தெரிவித்துள்ளார்.

பிபிசி தமிழோசை என்பது பிபிசி உலக சேவை வானொலியின் தமிழ் சேவையாகும். இவ்வானொலி சேவையானது 1941 மே 3 ஆம் நாள் முதல் இயங்கி வருகின்றது. இவ்வானொலி ஒரு நாளைக்கு 30 நிமிடங்கள் தமிழ் மொழியில் உலகச் செய்திகளையும் வேறு பல நிகழ்ச்சிகளையும் வழங்கி வருகின்றது. இங்கு இந்திய, இலங்கைச் செய்திகளுக்கு முன்னுரிமை கொடுக்கப்படுவதோடு செய்தியரங்கம் பகுதியில் அவை விரிவாக ஆராயப்படுகிறது. தென்னிந்தியாவிலும், இலங்கையிலும் இச்சேவை வானலைகளில் ஒலிபரப்பப்படுவதோடு ஏனைய பிரதேசங்களில் இணைய தளத்தில் பரப்பப்படுகின்றன.

பிபிசி தமிழ் நிகழ்ச்சிகளை இலங்கை ஒலிபரப்புக் கூட்டு நிறுவனம்  தனது தேசியச் சேவையில் மறு ஒலிபரப்பு செய்கிறது. 

 இடமாற்றத்தால் ஏற்படும் பாதிப்பு

பிபிசியின் தமிழோசை நிகழ்ச்சிக்கு உலகம் முழுவதிலுமிருந்து சுமார் 70 லட்சம் நேயர்கள் உள்ளனர்.  முக்கியமாக பிபிசி தமிழோசை நிகழ்ச்சி உலகம் முழுவதிலுமுள்ள புலம்பெயர் தமிழர்களுக்குப் பொதுவான ஓர் தகவல் தளமாக இருந்து வருகிறது.

டில்லிக்கு மாற்றப்படும் நிலையில் இந்தி மொழியின் ஆதிக்கம் தமிழோசையிலும் மேலோங்கும். 

டில்லிக்கு மாற்றப்படும்போது பெருவாரியான இலங்கைத் தமிழர்களின் செய்தியைக் கொண்டு செல்வதில் நிச்சயம் பாதிப்பு ஏற்படும். இந்திய இலங்கை நட்புறவின் காரணமாக இலங்கை அரசுக்கு ஆதரவான செய்திகளையே அதிகம் ஒலிபரப்பப்படும், அதே வேளையில் இந்தியத் தமிழர்களுக்கான பயனுள்ள எந்த ஒரு நிகழ்ச்சிகளும் அதில் இடம்பெறாத சூழல் ஏற்படும். 

பிபிசி போன்ற பொது ஒலிபரப்பு கூட்டு நிறுவனங்கள் தலைமையை விட்டு தூரச்செல்லும்போது அங்கு அரசியல் நுழையும் வாய்ப்புள்ளது. மேலும் பிபிசி தமிழோசை டில்லிக்கு மாற்றப்படும்போது ஒரே நிர்வாகத்தின்கீழ் இது வருவதால் பிபிசி தமிழோசைக்கு என்று முக்கியத்துவம் தரப்படுவது நிறுத்தப்படும் அபாயம் உண்டு.

முக்கியமாக சில தமிழ் விரோத சக்திகள் காழ்ப்புணர்ச்சியுடன் செயல்படும்போது எதிர்காலத்தில் பிபிசி தமிழோசை முற்றிலும் நிறுத்தப்படும் அபாயம் ஏற்படும்.   எடுத்துக்காட்டாக இலங்கை வானொலியின் சுதந்திரமான அமைப்பில் அரசியல் நுழைந்த பிறகு தமிழ் ஒலிபரப்பு முற்றிலுமாக மக்களின் ஆதரவை இழந்து இன்று பெயருக்கு இயங்கி வருவதுபோல் பிபிசி தமிழோசையின் எதிர்காலமும் அமைந்துவிடும்.  இதனால் உலகம் முழுவதிலுமுள்ள தமிழர்களுக்குப் பொதுவான ஒரு தகவல் இணைப்பு முழுவதுமாக துண்டிக்கப்படும் அபாயம் உள்ளது.

தமிழக அரசின் கவனத்துக்கு.... 

இத்தகைய காரணங்களால் இலண்டனைத் தலைமையிடமாகக் கொண்டு செயல்படும் பிபிசி நிறுவனம்  - அதே முறையில் செயல்படுவது தொடரப்பட வேண்டும்.

இதில் தமிழ்நாட்டைச் சேர்ந்த தலைவர்களும், அமைப்புகளும், உலகத் தமிழர்களும், அமைப்புகளும் சிறப்பாக தமிழ்நாடு அரசும், தமிழ்நாட்டைச் சேர்ந்த நாடாளுமன்ற உறுப்பினர்களும் இந்த மிக முக்கியமான பிரச்சினையில் கருத்தைச் செலுத்துமாறு வலியுறுத்துகிறோம்.

ஏதோ ஒரு வகையில் தமிழர்களுக்கு எதிரான நடவடிக்கைகள் தொடர்ந்து நடந்துகொண்டே தான் இருக்கின்றன. எல்லாவற்றையும் அரசியல் கண்கொண்டு பார்க்காமல் தமிழர்களுக்கான பொதுப் பிரச்சினையில் ஒத்த குரல் கிளம்புவது அவசியமாகும்.

இவ்வாறு கி.வீரமணி தனது அறிக்கையில் கூறியுள்ளார்.

Source: http://www.nakkheeran.in/

உள்ளூர் வானொலி மூலம் இந்தியை திணிக்கும் முடிவை கைவிட வேண்டும்

 

தமிழ்நாடு மற்றும் புதுவையில் உள்ள 3 மண்டல வானொலி நிலையங்களில் வர்த்தக ஒலிபரப்பு என்ற பெயரில் இந்தியை திணிக்க மத்திய அரசு திட்டமிட்டுள்ளது. நாளை மறுநாள் ஞாயிற்றுக்கிழமை முதல் இந்த வானொலி நிலையங்களில் தினமும் 4 மணி நேரம் இந்தி நிகழ்ச்சிகள் ஒலிபரப்பாகவுள்ளதற்கு பாமக நிறுவனர் ராமதாஸ் கண்டனம் தெரிவித்துள்ளார்.

இது குறித்து அவர் வெளியிட்டுள்ள அறிக்கையில்,

அனைத்திந்திய வானொலியின் தலைமை இயக்குனர் கடந்த 06.08.2014 அன்று அனைத்து மண்டல வானொலி நிலையங்களுக்கும் சுற்றறிக்கை ஒன்றை அனுப்பியுள்ளார். கோப்பு எண் 13/20/2014&றி-மிமிமி/125 என்ற அந்த சுற்றறிக்கையில் அனைத்து மண்டல வானொலிகளில் ஒலிபரப்பாகும் வர்த்தக ஒலிபரப்பை உள்ளூர் வானொலி நிலையங்கள் மூலமாக மாநிலம் முழுவதும் விரிவுபடுத்த வேண்டும் என்று குறிப்பிடப்பட்டிருக்கிறது. அதன்படி சென்னை வானொலி நிலையத்தின் கூடுதல் தலைமை இயக்குனர் கடந்த 20.10.2014 அன்று தமிழகத்தில் உள்ள தருமபுரி, நாகர்கோவில் ஆகிய உள்ளூர் வானொலி நிலையங்களுக்கும், புதுச்சேரியில் உள்ள காரைக்கால் வானொலி நிலையத்திற்கும் அனுப்பியுள்ள சுற்றறிக்கையில் 26.10.2014 ஞாயிற்றுக்கிழமை முதல் தினமும் 7 மணி நேரம் சென்னை மண்டல வானொலியின் வர்த்தக ஒலிபரப்பை உள்ளூர் வானொலிகள் மறு ஒலிபரப்பு செய்ய வேண்டும் என்று குறிப்பிடப்பட்டிருக்கிறது. இதேபோன்று இந்தியா முழுவதும் உள்ள 86 உள்ளூர் வானொலி நிலையங்களிலும் மண்டல வானொலி நிலையங்கள் மூலம்  நாளை மறுநாள் முதல் தினமும் 7 மணி நேரத்திற்கு வர்த்தக ஒலிபரப்பை விரிவுபடுத்த மத்திய தகவல் ஒலிபரப்பு அமைச்சகம் தீர்மானித்துள்ளது.

தமிழகம் மற்றும் புதுவையில் உள்ள உள்ளூர் வானொலிகள் சென்னை வானொலி நிலையத்தின் வர்த்தக ஒலிபரப்பு நிகழ்ச்சிகளை மறுஒலிபரப்பு செய்ய வேண்டும் என கூறப்பட்டிருப்பதைப்  பார்க்கும் போது அவை தமிழ் நிகழ்ச்சிகளாகத் தானே இருக்க வேண்டும்; இதை மறு ஒலிபரப்பு செய்வதில் என்ன பாதிப்பு ஏற்பட்டுவிடப்போகிறது? என்ற எண்ணம் அனைவர் மனதிலும் ஏற்படலாம்.

ஒவ்வொரு நாளும் இந்தியா முழுவதும் உள்ள அனைத்து உள்ளூர் வானொலிகளிலும் 4 மணி நேரத்திற்கு இந்தி நிகழ்ச்சிகள் ஒலிபரப்பப்படுவது கட்டாயமாக்கப்பட்டிருக்கிறது. பிறமொழி பேசும் மக்கள் மீது இந்தியை திணிக்க இதைவிட மோசமான கொல்லைப்புற வழி எதுவும் இருக்க முடியாது.

காரைக்கால் வானொலி நிலையம் தொடங்கப்பட்ட போது செய்து கொள்ளப்பட்ட ஒப்பந்தத்தின்படி, புதுவையில் பேசப்படும் மொழிகளான தமிழ், தெலுங்கு, மலையாளம், பிரெஞ்ச் ஆகிய மொழிகளில்  மட்டுமே நிகழ்ச்சிகள் ஒலிபரப்பப்பட வேண்டும். ஆனால், தமிழ் உள்ளிட்ட மொழிகளின்  நிகழ்ச்சிகள் ஒலிபரப்பப்படும் நேரத்தைக் குறைத்துவிட்டு, இந்தி நிகழ்ச்சிகளை ஒலிபரப்புவதை ஏற்க முடியாது. அதேபோல், தருமபுரி, நாகர்கோவில் வானொலி நிலையங்களிலும் அந்தந்த பகுதிகளில் பேசப்படும் தமிழ் உள்ளிட்ட மொழிகளின் நிகழ்ச்சிகளை நிறுத்திவிட்டு இந்தி நிகழ்ச்சிகள் ஒலிபரப்படவுள்ளதால் அப்பகுதிகளில் வாழும் மக்கள் கொதிப்படைந்திருக்கின்றனர். இந்த மூன்று உள்ளூர் வானொலி நிலையங்களுக்கும் தலா 50 லட்சம் நேயர்கள் உள்ளனர். அவர்களின் விருப்பத்திற்கு மாறாக மத்திய அரசு இந்தியை திணிக்க முயல்வது சரியல்ல. எனவே, மக்களின் உணர்வுகளை மதித்து உள்ளூர் வானொலிகளில் வர்த்தக ஒலிபரப்பு மூலம் இந்தியை திணிக்கும் முடிவை  அரசு கைவிட வேண்டும் என்று வலியுறுத்தியுள்ளார்.

Source: Dinamani First Published : 25 October 2014 01:25 PM IST

மேலும் 100 வானொலி நிலையங்களில் பண்பலை ஒலிபரப்பு

செல்போன் பயன்படுத்துவோரின் எண்ணிக்கை அதிகரித்திருப்பதால், அவர்களைக் குறிவைத்து மீடியம் (நடுத்தர) அலைவரிசையில் ஒலிபரப்பாகி வரும் மேலும் 100 அகில இந்திய வானொலி நிலையங்களின் நிகழ்ச்சிகளை விரைவில் பண்பலை வரிசையிலும் (எஃப்.எம்) ஒலிபரப்ப முடிவு செய்யப்பட்டுள்ளது.

தில்லியில் நடைபெற்ற அகில இந்திய வானொலியின் தமிழ், அஸ்ஸாமி, குஜராத்தி, மலையாளம் ஆகிய மொழிகளில் இலவச எஸ்எம்எஸ் (குறுஞ் செய்தி) செய்தி அனுப்பும் சேவையினை பிரகாஷ் ஜாவடேகர் தொடங்கி வைத்தார்.

நிகழ்ச்சியில் அவர் பேசியதாவது:

பண்பலை வரிசையில் ஒலிபரப்பாகும் வானொலி நிலையங்கள் செல்போன் பயன்படுத்துவோரை மிக எளிதாகச் சென்றடைகின்றன. அந்த நிகழ்ச்சிகளை மிகத் தெளிவாகவும் கேட்க முடிகிறது. இதைக் கருத்தில்கொண்டு விரைவில் மீடியம் (நடுத்தர) அலைவரிசையில் ஒலிபரப்பாகும் மேலும் 100 அகில இந்திய வானொலி நிலைய நிகழ்ச்சிகளை, பண்பலை வரிசையிலும் ஒலிபரப்ப முடிவு செய்துள்ளோம் என்று ஜாவடேகர் தெரிவித்தார்.

Source: Dinamani புது தில்லி

First Published : 30 October 2014 02:20 AM IST

பிபிசி நிர்வாகக் குழுவின் தலைவராகப் பெண் தேர்வு

உலகப் புகழ்பெற்ற வானொலி, தொலைக்காட்சி செய்தி நிறுவனமான பிபிசி}யின் செயல்பாடுகளை மேற்பார்வையிடும் பிபிசி அறக்கட்டளை நிர்வாகக் குழுவின் புதிய தலைவராக ரோனா ஃபேர்ஹெட் (53) தேர்ந்தெடுக்கப்பட்டுள்ளார்.

எச்.எஸ்.பி.சி. வங்கி, பெப்ஸிகோ உள்ளிட்ட பல சர்வதேச நிறுவனங்களின் நிர்வாகக் குழுவில் இடம்பெற்றுள்ள ரோனா ஃபேர்ஹெட், பிபிசி அறக்கட்டளையின் முதல் பெண் தலைவராக இருப்பார் என்பது குறிப்பிடத்தக்கது.

உலகப் புகழ்பெற்ற பிபிசி}யில் தலைவர் பொறுப்பு ஏற்கவுள்ளது பற்றிக் கருத்து கூறிய அவர், "திறமை வாய்ந்த பலரைக் கொண்டுள்ள பிரிட்டனின் உன்னதமான நிறுவனத்தின் நிர்வாகக் குழுவுக்குத் தலைமைப் பொறுப்பை ஏற்பதைப் பெருமையாகக் கருதுகிறேன் என்றார்.

இவரது நியமனம் குறித்த அதிகாரபூர்வ அறிவிப்பை பிரிட்டிஷ் கலாசாரத் துறை அமைச்சர் ஸஜித் ஜாவீத் பின்னர் வெளியிடுவார்.

அதன் பிறகு, பிரிட்டிஷ் நாடாளுமன்றத்தின் கலாசாரம், ஊடகம், விளையாட்டுத் துறைகளின் தேர்வுக்குழு முன்பாக அவர் ஆஜராக வேண்டும். தேர்வுக்குழு உறுப்பினர்களின் விசாரணைக்குப் பிறகே அவர் பதவியேற்பது உறுதி செய்யப்படும்.

Source: http://www.dinamani.com/

SONY உருவான கதை

SONY உருவான கதை - அக்யோ மொரிட்டா (வரலாற்று நாயகர்)

 

இரண்டாம் உலகப்போரினால் உருத்தெரியாமல் சிதைந்துபோன ஒரு தேசம் ஜப்பான். உலகநாடுகளில் அது புரிந்த அட்டூழியங்களுக்கு அமெரிக்கா அணுகுண்டுகள் மூலம் பதிலடி கொடுத்தபோது இனி பல தலைமுறைகளுக்கு அந்த தேசம் தலையெடுக்க முடியாது என்றுதான் உலகம் எண்ணியது. ஆனால் போரில் தோற்றாலும் பொருளாதாரத்தில் தோற்க விரும்பாத ஜப்பானியர்கள் தன்னம்பிக்கையையும் உழைப்பையும் உரமாக விதைத்தனர் ஜப்பானிய மண்ணில் ஒருசில தலைவர்கள் மட்டுமல்ல ஒரு தேசமே தன்னம்பிக்கையோடு எழுந்து நின்று போர் முனையில் காட்டிய வேகத்தை நாட்டை மறுசீரமைப்பதிலும் காட்டினார்கள் விளைவு 30 ஆண்டுகளுக்குள் அமெரிக்காவுக்கு நிகரான பொருளியல் வல்லரசாக உருவெடுத்தது ஜப்பான்.

 

அந்த அதியசத்துக்கு வித்திட்டவர்கள் பலர் இருந்தாலும் ஒருவரின் பெயரை ஜப்பானிய வரலாறு மட்டுமல்ல உலக வரலாறும் என்றென்றும் போற்றும். Made  in japan என்ற வாசகத்தை தாங்கி வரும் எந்த பொருளையும் கண்ணை மூடிக்கொண்டு வாங்கும் அளவுக்கு உலக மக்கள் நம்பிக்கை கொண்டிருக்கிறார்கள் என்றால் அதற்கு முழுமுதற் காரணம் அந்த தொழில் பிரம்மா. அவர்தான் தரக்கட்டுப்பாடு என்ற தாரகமந்திரத்தையும் SONY என்ற புகழ்பெற்ற நிறுவனத்தையும் உலகுக்கு தந்த ஜப்பானிய தொழில் முனைவர் அக்யோ மொரிட்டா.

சிதைந்துபோன ஜப்பானை சீர்தூக்கிவிட உதவிய அந்த தொழில்பிதாமகனின் தன்முனைப்பூட்டும் கதையை தெரிந்துகொள்வோம்.

 

1921 ஆம் ஆண்டு ஜனவரி 26 ந்தேதி ஜப்பானின் மெஹோயா நகரில் குடும்பத்தின் மூத்த பிள்ளையாக பிறந்தார் மொரிட்டா. 400 ஆண்டுகளுக்கு மேலாக சாக்கே எனப்படும் ஜப்பானிய மதுபானம் தயாரிக்கும் தொழிலில் ஈடுபட்டிருந்தது அவரது குடும்பம். மொரிட்டாவும் அதே தொழிலை செய்ய வேண்டும் என விரும்பினார் தந்தை அதனால் பள்ளியில் படித்தபோதே மொரிட்டாவை நிறுவன கூட்டங்களில் கலந்துகொள்ளச் செயதார். சிறுவயது முதலே மின்னியல் பொருள்களை அக்கு வேறு ஆணி வேறாக கழட்டி மீண்டும் பொருத்திப் பார்ப்பதில் அலாதி பிரியம் மொரிட்டாவுக்கு. பள்ளியில் கணிதமும் இயற்பியலுல் அவருக்கு மிக பிடித்த பாடங்களாக இருந்தன.

 

பள்ளிபடிப்பை முடித்ததும் ஒசாக்கா இன்டீரியல் பல்கலைகழகத்தில் சேர்ந்து இயற்பியலில் பட்டம் பெற்றார். அதன்பிறகு ஜப்பானிய கடற்படையில் அதிகாரியாக பணியாற்றினார். அந்த சமயத்தில் மசார் இபுக்கா என்ற பொருளியல் வல்லுநருடன் நட்பு ஏற்பட்டது. இரண்டாம் உலகப்போர் முடிந்ததும் என்ன செய்யலாம் என்று யோசித்தார் மொரிட்டா 14 தலைமுறையாக செய்யபட்டு வந்த தன் குடும்ப தொழிலையே செய்து சவுகரியமான பிரச்சினையில்லாத வாழ்கையை அவர் தேர்ந்தெடுத்திருக்க முடியும். ஆனால் பரம்பரை தொழில் என்றாலும் வளர்ச்சிக்கு இடமில்லாத தொழிலை செய்ய அவருக்கு விருப்பமில்லை. மாறாக உலகத்தையே தன் பக்கமும் ஜப்பான் பக்கமும் திரும்ப வைக்க வேண்டும் என்ற நெருப்பு அவருக்குள் கனன்று கொண்டிருந்தது.

 

1946 ஆம் ஆண்டு மே 7 ந்தேதி தனது கடற்படை நண்பர் இபுக்காவுடன் சேர்ந்து வெறும் 190 ஆயிரம் யென் அதாவது சுமார் 375 டாலர் மூலதனத்தில் 20 ஊழியர்களை கொண்டு “டோக்கியோ டெலிகம்யூனிகேஷன்ஸ் கார்ப்பரேஷன்” என்ற நிறுவனத்தை தொடங்கினார். அப்போது அவருக்கு வயது 25 தான். குண்டுகள் தொலைத்திருந்த ஒரு பாழடைந்த பகுதிவாரி கடைதான் அவர்களின் தொழில் முகவரி. முதல் நாளிலிருந்தே தொழிநுட்ப ஆய்விலும் புதிய பொருள் உருவாக்கத்திலும் இபுக்கா கவணம் செலுத்த, விற்பனை உலகமயமாதல், நிதி, மனிதவளம் ஆகியவற்றில் கவணம் செலுத்தினார் மொரிட்டா.

 

அந்த நிறுவனம் விரைவாக டேப் ரெக்கார்டர் எனப்படும் முதல் ஒலிப்பதிவு கருவியை உருவாக்கியது. ஆனால் அது மிகப்பெரியதாக இருந்ததால் அதை எவரும் வாங்கமாட்டார்கள் என்பது மொரிட்டாவுக்கு புரிந்தது. போருக்கு பிந்திய காலம் என்பதால் அதிகம் பணம் கொடுத்து வாங்கும் நிலையிலும் ஜப்பானியர்கள் இல்லை. உடனே மொரிட்டாவின் மூளை வேலை செய்தது அமெரிக்காவின் பெல் லேப்ஸ் நிறுவனத்திடமிருந்து டிரான்ஸ்சிஸ்டருக்கான உரிமம் பெற்று சட்டைப்பையில் வைக்ககூடிய அளவிலான சிறியதாக வானொலியை உருவாக்கினார். அமெரிக்காவிடமிருந்து பெற்ற தொழில்நுட்பத்தை கொண்டு புதிய பொருளை உருவாக்கி அமெரிக்கர்களுக்கே விற்பனை செய்யும் அந்த திட்டம் கைமேல் பலன் தந்தது. 

 

சட்டைப்பை வானொலி அமோக வரவேற்பை பெற்றது. அதற்கு காரணம் தரக்கட்டுபாடுக்கு மொரிட்டா கொடுத்த முக்கியத்துவமும் தரக்கட்டுப்பாடுக்கென்றே ஒரு தனித்துறையை உருவாக்கியதுதான். மேலும் தங்கள் பொருள்களுக்கு ஜப்பான் மட்டுமல்ல உலகமே சந்தையாக வேண்டும் என விரும்பினார். அதனால் ஊழியர்களுடன் சேர்ந்து அனைவரும் எளிதில் சொல்லக்கூடிய ஒரு புதிய சொல்லை தேடி அகராதிகளை புரட்டினார்கள். அப்போது அவர்களுக்கு கிடைத்த சொல்தான் சோனஸ். இலத்தீன் மொழியில் சோனஸ் என்றால் ஒலி என்று பொருள் அந்த சொல்லையும் அப்போது அமெரிக்காவில் புகழ் பெற்றிருந்த “சானி பாய்ஸ்” என்ற இசைக்குழுவின் பெயரையும் இணைத்து 1958 ல் நிறுவனத்தின் பெயரை சோனி(SONY) கார்ப்பரேஷன் என்று மாற்றினார் மொரிட்டா.

இரண்டு ஆண்டுகள் கழித்து அமெரிக்காவிலும் நிறுவனக் கிளையை தொடங்கி தன் குடும்பத்துடன் அங்கு குடிபெயர்ந்தார். அதன்பிறகு வாடிக்கையாளர்கள் எதிர்பார்க்காத வித்தியாசமான மின்னியல் பொருட்களை செய்வதில் மொரிட்டா கவணம் செலுத்தினார். அவரது புத்தாக்க சிந்தனைகள் புதிய கலாச்சாரங்களையும் புதிய வாழ்க்கை முறைகளையும் உருவாக்கின. உதாரணத்திற்கு தன் பிள்ளைகளோடு சுற்றுலா செல்லும்போது அவர்கள் பெரிய டேப் ரெக்கார்டர் கொண்டு வருவதை கவணித்தார். அதன் அசெளவுகரியம் அவரது சிந்தனையைத் தூண்டியது. போகும் இடத்திற்கெல்லாம் எடுத்துச்செல்லும்படியாக அளவை சுருக்கினால் என்ன என்று சிந்தித்தார். அவரது சிந்தனையில் வாக்மேன் உதித்தது.

அந்த முயற்சியில் அவர் ஈடுபட்டிருந்தபோது அவருக்கு அனுக்கமானவர்கள் என்ன சொன்னார்கள் தெரியுமா? ஒலிவாங்கியை எவன் காதில் மாட்டிக்கொண்டு நடப்பான் உலகம் பைத்தியம் என்று சொல்லும் எனவே அது விற்பனையாகாது என்று ஆரூடம் கூறினர். ஆனால் எதிர்காலத்தையே உருவாக்கும் தைரியம் கொண்ட ஒரு மனிதனை வெறும் ஆரூடங்கள் என்ன செய்துவிட முடியும். 

 

1976 ஆம் ஆண்டு வாக்மேன் சந்தைக்கு வந்தது. உலகம் முழுவதும் இளையர்களை அது கொள்ளை கொண்டது. பிறகு மொரிட்டாவின் சாம்ராஜ்யம் அசுர வேகத்தில் வளரத் தொடங்கியது. தொலைக்காட்சி, வீடியோ ரெக்கார்டர் என பல மின்னியல் பொருட்களை உருவாக்கி உலகுக்கு அறிமுகம் செய்தது சோனி நிறுவனம். மொரிட்டாவின் தலமையில் 1970 ஆம் ஆண்டில் நியூயார்க் பங்கு சந்தையில் இடம்பெற்ற முதல் ஜப்பானிய நிறுவனம் என்ற புகழைப்பெற்றது சோனி. அதன்பிறகு சோனி நிறுவனம் பல்வேறு தொழில்களில் கால்பதித்தது. 2000 ஆண்டு கணக்கெடுப்பின்படி அமெரிக்கர்கள் கொக்கோ-கோலாவை விட சோனியைத்தான் தங்களுக்கு ஆக பிடித்த சின்னமாக தேர்ந்தெடுத்தனர்.     

 

அமெரிக்காவில் மட்டுமல்ல உலகம் முழுவதும் SONY என்ற பெயர் பிரபலனமானது. நேரத்தை பொன்போல் கருதி கடுமையாக உழைத்த மொரிட்டா எப்போதுமே சுறுசுறுப்பாக இருப்பார். அவருக்கு 60 வயதானபோது நீர்சருக்கு, ஸ்கூபா முக்குளிப்பு டென்னிஸ் ஆகிய விளையாட்டுகளை கற்றுக்கொண்டார். ஓவியத்தையும் இசையையும் அதிகம் நேசித்தார். மொரிட்டாவுக்கு 72 வயதானபோது ஒருநாள் காலை டென்னிஸ் விளையாடி கொண்டிருந்தபோது வாதம் ஏற்பட்டது உடல்நலம் பாதிக்கப்பட்ட அவர் எல்லா பொருப்புகளிலிருந்தும் விலகினார்.   

 

மொரிட்டாவுக்கு அடுத்து சோனி நிறுவனத்தின் தலைமை பொறுப்பை ஏற்றவர் யார் தெரியுமா? மொரிட்டாவின் நிறுவனம் முதன்முதலில் தயாரித்து வெளியிட்ட டேப் ரெக்கார்டர் தரம் குறைவாக உள்ளது என்று குறைகூறி கடிதம் எழுதிய நொரியோ ஓஹா என்பவர். குறை கண்டவரிடமே நிறை கண்டு அவரை உடனடியாக தன் நிறுவனத்தில் சேர்த்து கொண்டு பாதுகாத்து வளர்த்து பின்னர் அவரிடமே தன் தலமை நிறுவன பொருப்பை ஒப்படைத்தார் தொலைநோக்கு கொண்ட மொரிட்டா.   

 

தரம்தான் நிரந்தரம் என்பதை உலகுக்கு உணர்த்திய அக்யோ மொரிட்டா 1999 ஆம் ஆண்டு அக்டோபர் 3 ந்தேதி தனது 78 ஆவது வயதில் டோக்கியோவில் காலமானார். அவர் இறந்தபோது பாக்ஸ் சஞ்சிகையில் உலக பணக்காரர் பட்டியலில் அவருக்கு 386 ஆவது இடம் கிடைத்தது. அப்போது அவரின் சொத்தின் மதிப்பு 1300 மில்லியன் டாலர். டைம் சஞ்சிகை வெளியிட்ட 20 ஆம் நூற்றாண்டின் தலைசிறந்த தொழில் முனைவரின் பட்டியலில் அமெரிக்கர் அல்லாத ஒரே ஒருவர் அக்யோ மொரிட்டாதான்.  

 

உலகமய தொழில்துறைக்கு அவர் ஆற்றிய பங்கை அங்கீகரிக்கும் வகையில் இங்கிலாந்தின் மிக உயரிய ஆல்பர்ட் விருது ஃப்ரான்ஸின் ஆக உயரிய லெஜெண்ட் ஆப் ஹானர் விருது, ஜப்பானிய மன்னரின் பர்ஸ்ட் க்ளாஸ் ஆர்டர் ஆகிய விருதுகளும் இன்னும் பல எண்ணிலடங்கா விருதுகளும் அவரை நாடி வந்திருக்கின்றன. அந்த தொழில் பிரம்மாவின் கதையை முழுமையாக தெரிந்துகொள்ள வேண்டுமா? Made in japan என்ற அவரது சுயசரிதையை படித்துப்பாருங்கள்.  

1966 ஆம் ஆண்டில் அவர் Never-mind School Records என்ற இன்னொரு புகழ்பெற்ற நூலையும் எழுதினார். அதில் வாழ்க்கையிலும் தொழிலிலும் வெற்றிப்பெற பள்ளியில் வாங்கும் மதிப்பெண்கள் முக்கியம் அல்ல என்று வாதிடுகிறார். அதாவது ஆர்வம்தான் படைப்புத்திறனுக்கான திறவுகோல் என்பது மொரிட்டா நமக்கு விட்டு சென்றிருக்கும் உன்னதமான பொன்மொழி. எதையுமே ஆர்வத்துடனும் நம்பிக்கையுடனும் தொலைநோக்குடனும் செய்ததால்தான் அக்யோ மொரிட்டாவுக்கு அந்த வானம் வசப்பட்டது.

 

மொரிட்டாவைப்போல நாமும் ஆர்வம், நம்பிக்கை, விடாமுயற்சி தொலைநோக்கு ஆகியவற்றை காட்டினால் எந்த வானமும் நிச்சயம் நமக்கும் வசப்படும்.    

Source: http://www.yarl.com/

"ஆகாஷவாணி" "வானொலி" ஆன வரலாறு

மாணவர்களிடம் தமிழ் மொழிப்பற்று உணர்வை ஆசிரியர்கள் வளர்த்திட வேண்டும் என்று ஆசிரியர் தின வாழ்த்துச் செய்தியில் திமுக தலைவர் கருணாநிதி வலியுறுத்தியுள்ளார்.

அவர் இன்று வெளியிட்ட வாழ்த்துச் செய்தியில், "ஆசிரியப் பணிபுரிந்து, அறிவாற்றலால் உயர்ந்து, தம் சான்றாண்மைக் குணங்களால் சிறந்து, சுதந்திர இந்தியாவின் முதல் குடியரசுத் துணைத் தலைவராகவும், பின்னர் இரண்டாவது குடியரசுத் தலைவராகவும் விளங்கிப் புகழ் படைத்தவர் டாக்டர் எஸ். ராதாகிருஷ்ணன். அவர்தம் பிறந்த நாள் - செப்டம்பர் 5ஆம் நாள் நாட்டின், "ஆசிரியர் நாள்" என - ஆசிரியப் பெருமக்களின் அரிய தொண்டுகளைப் போற்றி ஆண்டுதோறும் எழுச்சியுடன் கொண்டாடப்படுகிறது.

இந்நன்னாளில் அடுத்த தலைமுறை மக்களை அறிவிலும், ஆற்றலிலும், செயல்பாட்டுத் திறனிலும், சீரிய பண்பாட்டு உணர்விலும் சிறந்தவர்களாக உருவாக்கிடும் திருப்பணியில் வாழ்நாள் முழுதும் தொண்டுகளாற்றிடும் பெருமைக்குரிய ஆசிரியப்

பெருமக்களுக்கு அரசு சார்பில் "டாக்டர் எஸ்.ராதாகிருஷ்ணன் விருது" வழங்கிப் பெருமைப்படுத்தப்படுகிறது.

ஆசிரியர் சமுதாயம் முழுதும் மகிழும் வகையில், "நல்லாசிரியர் விருது" என வழங்கப்பட்ட விருதின் பெயரை, 1997இல் "டாக்டர் எஸ்.ராதாகிருஷ்ணன் விருது" என்றும், விருதுக்குரிய பரிசுத் தொகை ரூ.500 என்பதை 1989இல் ரூ.1,000 என்றும், 1997இல் ரூ.2,000 என்றும், பின் 2008இல் ரூ.5,000 என்றும் உயர்த்தியது திராவிட முன்னேற்றக் கழக அரசே என்பதை இவ்வேளையில் நினைவுபடுத்துகிறேன்.

"ஆசிரியர்கள் ஏங்கினால் வகுப்பறைகள் தேங்கும்" என்று கூறிய அண்ணாவின் மணிமொழியை இதயத்தில் தாங்கி, ஆசிரியர் சமுதாயத்திற்கு அளவிலாச் சலுகைகள் பலவற்றை வழங்கியது திராவிட முன்னேற்றக் கழக அரசு.

19 ஆண்டுகால முதலமைச்சர் பொறுப்பில் நான்கு ஊதியக்குழுக்களை அமைத்து; அவற்றின் பரிந்துரைகளை நடைமுறைப்படுத்தி ஆசிரியர், அரசு ஊழியர் குடும்பங்களின் சமூக, பொருளாதார நிலைகளை உயர்த்தி, அவர்களின் வாழ்க்கைத் தரம் மேம்பட வழிவகுத்தவன் நான் என்பதில் பெருமிதம் அடைகிறேன்.

அதேநேரத்தில் 2001ல் அமைந்த அ.தி.மு.க. அரசு, கழக அரசு அளித்த சலுகைகளை எல்லாம் பறித்துக் கொண்டதால் அதை மீண்டும் வழங்கக்கோரி போராடிய ஆசிரியர்கள், அரசு ஊழியர்கள் மீது அடக்குமுறைகளை ஏவி, நள்ளிரவு என்றும், பெண்கள் என்றும் பாராமல் வீடுபுகுந்து அவர்களைக் கைது செய்து சிறையில் அடைத்ததையும்; அத்துடன் அந்த அரசு ஒரே கையொப்பத்தில் 1 லட்சத்து 71 ஆயிரம் ஆசிரியர்களுக்கும், அரசு ஊழியர்களுக்கும் நிரந்தரமான வேலை நீக்கத்தைப் பரிசாகத் தந்ததையும் எவரும் மறந்திட முடியாது.

தற்போது அ.தி.மு.க. ஆட்சியில் ஆசிரியர் நியமனங்களிலும், மாறுதல்களிலும், வெளிப்படைத் தன்மையே அற்றுப் போய் விட்டதோடு, ஏராளமான குளறுபடிகளும் நுழைந்து விட்டன. தங்களுடைய குறைகளைத் தெரிவித்துப் போராடும் ஆசிரியப் பெருமக்களை ஆட்சியினர் சந்திக்க மறுப்பதும், அதன் காரணமாக விரக்தியடைந்து ஆசிரியர்கள் தற்கொலைக்கு முயற்சிப்பதும் மிகுந்த வேதனையைத்

தருகிறது. அந்த அ.தி.மு.க. ஆட்சிபோல் அல்லாமல் ஆசிரியர், அரசு ஊழியர் நலனில் என்றும் அன்பும், அக்கறையும்; கனிவும், கரிசனமும் கொண்டு எண்ணற்ற நலத்திட்டங்களையும், ஏராளமான சலுகைகளையும் வழங்கியவன் நான் என்பதைச் சுட்டிக்காட்டிட விரும்புகிறேன்.

பல தமிழ் சான்றோர்களும் ஊட்டிய தன்மான உணர்வுகளால் தமிழக நலன்கருதி தமிழ் மொழி, இனச் சிந்தனைகள் செழித்தது. மறைந்து கொண்டிருந்த தமிழ் மொழியை மீட்கும் வகையில் பல்லாண்டு காலம் போரிட்டு உயிர்ப்பலி தந்து தமிழகத்தில்

நடைமுறையில் இருந்த "ஆகாஷவாணி" என்பதை "வானொலி" என்றும்; "பிராந்திய செய்திகள்" என்பதை "மாநிலச் செய்திகள்" என்றும்; "லோக்சபா" என்பதை "மக்களவை" என்றும்; "கனம் மந்திரி" என்பதை "மாண்புமிகு அமைச்சர்" என்றும்; "சட்டசபை" என்பதை "சட்டமன்றம்" என்றும் இவைபோல் வடசொல் ஆதிக்கத்திலிருந்து பல்லாயிரக்கணக்கான தமிழ்ச் சொற்களை மீட்டெடுத்து, புழக்கத்தில் கொண்டு வந்து - எல்லாம் தமிழாகி படிப்படியாக வடசொல்லாதிக்கம் கட்டுப்படுத்தப்பட்டுள்ளது.

தேசியம் என்ற பெயரில், "ஆசிரியர் நாள் விழா" என நாம் அழைத்து வரும் தமிழ்ச் சொற்றொடர் மதிப்பிழக்கும் வகையில், "குரு உத்சவ்" எனும் வடசொல் தமிழகப் பள்ளிகளில் புகுத்தப்படுகின்ற கொடுமை தற்போது அரங்கேற்றப்படுகிறது. இதை சாதாரணமாக ஏற்றுக்கொள்ள முடியாது.

இந்நிலையில், வளரும் பிஞ்சுக் குழந்தைகள் நெஞ்சில் அறிவு வளர்ச்சிப் பயிர் செய்திடும் பொறுப்பில் உள்ள ஆசிரியப் பெருமக்கள் நாட்டுப் பற்று உணர்வை வளர்த்திட வேண்டும். தமிழ் மொழிப்பற்று உணர்வை வளர்த்திட வேண்டும். தமிழகத்தின் நலனை - தமிழ்ச் சமுதாயத்தின் தன்மானத்தைக் காக்கும் பொறுப்பினையும் மேற்கொண்டிட வேண்டும் என்பதை எனது வேண்டுகோளாகத் தெரிவித்து; தமிழக ஆசிரியப் பெருமக்களுக்கு திராவிட முன்னேற்றக் கழகத்தின் சார்பில், எனது "ஆசிரியர் நாள்" நல்வாழ்த்துகளை உரித்தாக்குகிறேன்" என்று கருணாநிதி கூறியுள்ளார்.

நன்றி  http://tamil.thehindu.com/

Published: September 4, 2014 13:24 IST

வ.ரா. வானொலியில் ஆற்றிய உரை

 

‘மனிதன் தெய்வத்தன்மை அடைய முடியும் என்று உறுதியாக நம்புகிறேன். தெய்வத்தன்மை மனிதனுக்குள்ளே இருக்கிறது. அதை சோபிக்கச் செய்வது தான் இலக்கியத்தின் கடமையாகும். அதற்கான முறைகளிலே தான் எழுத்தைச் சித்திரித்துக் கொண்டு போக வேண்டும். அற்ப விஷயங்களையும் சில்லறைத் தகராறுகளையும் பற்றி எழுத்தில் எதிர்பார்ப்பது, இலக்கியத்தை புண்படுத்துவதாகும்..'

இதுதான் 'மணிக்கொடி' மூலவர்களில் ஒருவரும், பாரதியின் தனிப்பெரும் சீடர்களில் ஒருவராகவும் விளங்கிய வ.ரா என்றழைக்கப்பட்ட வ.ராமசாமியின் இலக்கிய சித்தாந்தமாகும்.

தஞ்சை மாவட்டம் திருவையாறுக்கு அருகிலுள்ள திருப்பழனம் கிராமத்தைச் சேர்ந்த வைணவக் குடும்பமொன்றில் செப்டம்பர் 17,1889-ம் ஆண்டு பிறந்தார் வ.ரா. 1905-ல் மெட்ரிகுலேஷன் தேர்வில் முதல் வகுப்பில் தேர்ச்சி பெற்று கல்லூரியில் நுழைந்த போதே, இந்திய தேசிய விடுதலை இயக்கத்தால் ஈர்க்கப் பெற்றார். பிரபல தேசபக்தர் கொடியாலம் ரங்கசாமி ஐயங்காரின் தொடர்பால், 1910-ல் பாண்டிச்சேரி சென்று, அங்கிருந்த அரவிந்தரையும், பாரதியையும் சந்தித்தபோது அவரது வயது 21.

1911-லிருந்து 1914 வரை பாரதியின் வீட்டிலும், பின்னர் அரவிந்த ஆசிரமத்திலும் தங்கி அவர்களோடு மிக நெருக்கமாகப் பழகி, அவ்விருவரின் வாழ்க்கைத் தத்துவத்தையும், பணிகளையும் நன்கறிந்துகொண்டு, தன் சொந்த கிராமத்திற்குத் திரும்பினார். பாரதியின் மேல் கொண்டிருந்த மட்டற்ற பற்றினால், பெண் விடுதலை பற்றிய பாரதியின் கோட்பாடுகளைப் பிரதிபலிக்கும் வகையில், பால்ய மணத்தை எதிர்த்தும், விதவை மறுமணத்தை ஆதரித்தும் ‘சுந்தரி' என்கிற தன்னுடைய முதல் நாவலை 1915-ல் எழுதினார்.

இதைத் தொடர்ந்து, ‘கோதைத் தீவு, விஜயம்' ஆகிய நாவல்களை அவர் படைத்தார். ‘மகாகவி பாரதி' நூலும், ‘மழையும், புயலும்' கட்டுரைத் தொகுப்பும், ‘நடைச்சித்திரம், வாழ்க்கை விநோதங்கள்' ஆகிய குணசித்திரப் படைப்புகளும், ‘கற்றது குற்றமா?' என்கிற சிறுகதைத் தொகுப்பும், ‘வ.ரா. வாசகம்' என்கிற நூலும், பாரதியின் மெய்யான வழித்தோன்றல் அவர் என்பதை மெய்ப்பிக்கின்றன.

1933-ல் ‘மணிக்கொடி' சீனிவாசன், டி.எஸ்.சொக்கலிங்கம் ஆகியோருடன் உப்புச் சத்தியாகிரகத்தில் பங்கேற்று, சிறைவாசம் சென்றார் வ.ரா. இவ்விருவருடன் இணைந்து செப்டம்பர் 17, 1933-ல் ‘மணிக்கொடி' எனும் வார இதழைத் தொடங்கி, அதன் ஆசிரியர் குழுவிலொருவராகப் பணியாற்றினார். இவ்விதழின் முதற்பணி பாரதியைப் பற்றித் தமிழுலகத்திற்கு எடுத்துச் சொல்வதேயாகும். ‘மணிக்கொடி' ஆசிரியர் பொறுப்பை ஏற்றுக்கொள்வதற்கு முன், ‘சுதந்திரன், ஸ்வராஜ்யா' போன்ற பத்திரிகைகளில் வ.ரா. எழுதி வந்த போதிலும், வாசகர்களின் சிந்தனையைக் கிளறும் வகையிலே புதிய இலக்கிய ரூபங்களை அவர் ‘மணிக்கொடி'யிலேதான் படைத்தார்.

படைப்புத் துறையில் மட்டுமின்றி, விமர்சனத் துறையிலும் தன்னுடைய கருத்துகளை ஆழ்ந்து சிந்திக்கும் வகையிலேயே அவர் படைத்துள்ளார். துணிவு, கோட்பாட்டு உறுதி, மனத்தை மாற்றும் தன்மை - இவைதான் இலக்கிய விமர்சனத் துறையில் வ.ரா.வின் அணுகுமுறையாகும். எழுத்தாளனின் குறைகளை மட்டும் எடுத்துக்காட்டி அவனை எழுதவிடாமல் அடிக்கக் கூடாது என்பதே வ.ரா.வின் கொள்கை.

1938-ல் சென்னை வானொலி நிலையம் ராஜாஜி அவர்களால் தொடக்கி வைக்கப்பட்டது. நிலையத்தின் இயக்குநராக லண்டன் பி.பி.சி.யில் பயிற்சி பெற்ற விக்டர் பரஞ்சோதியும், துணை இயக்குநராக ஜி.டி. சாஸ்திரியும் பணியாற்றினார். ‘மூட நம்பிக்கைகள்' என்கிற தலைப்பில் வ.ரா. வானொலியில் ஆற்றிய உரை, நிலைய இயக்குநர்கள் இருவரையும் ஈர்க்க, அவரை வானொலியில் தொடர்ந்து உரையாற்ற அழைத்தனர். பின்தொடர்ந்த 12 ஆண்டு காலங்களில், சுமார் 120 சொற்பொழிகளை வானொலியில் ஆற்றினார் பெரும்பாலான உரைகள் கிடைக்காமலேயே போனது தமிழிலக்கிய உலகத்தின் துரதிர்ஷ்டம்.

வா.ர. தமிழ் உரைநடை வளர்ச்சியில் ஒரு புதிய சகாப்தத்தைத் தொடக்கினார். 62வது வயதில் 1951-ம் ஆண்டில் ஆகஸ்ட் 23-ம் தேதியன்று காலமான வ.ரா., தமிழ்ப் படைப்பாளிகளுக்கு விட்டுச் சென்றுள்ள அன்புக் கட்டளை இதுதான்:

‘மக்களின் முகத்தைப் பாருங்கள்! அதன் துணை கொண்டு நவீன இலக்கியத்தைப் படையுங்கள்!’

- தொடர்புக்கு: narpavi2004@yahoo.com

Source: http://tamil.thehindu.com/