கிராமபோன் முதல் வானொலி

 இசையின் பொற்காலம்:   ஒரு மீட்டெடுத்தல்

மனித வரலாற்றில் இசையை வீட்டிற்குள் கொண்டு வந்த பெருமை கிராமபோன் (Gramophone) மற்றும் வானொலி (Radio) ஆகிய இரு சாதனங்களையே சாரும். 19-ஆம் நூற்றாண்டின் இறுதியில் தாமஸ் ஆல்வா எடிசனின் போனோகிராஃப் தொழில்நுட்பத்தை அடிப்படையாகக் கொண்டு எமிலி பெர்லினர் என்பவரால் கிராமபோன் உருவாக்கப்பட்டது. வட்ட வடிவ தட்டுகளில் (Vinyl records) ஒலியைப் பதிவு செய்து, ஊசியின் உதவியுடன் இசையை மீட்டெடுத்த இந்த கருவி, உலகெங்கிலும் உள்ள இசை ரசிகர்களின் வரவேற்பைப் பெற்றது. கிராமபோனின் வருகைதான் அதுவரை மேடைகளில் மட்டுமே முடங்கிக் கிடந்த இசையை மக்களின் வரவேற்பறைக்குக் கொண்டு சேர்த்தது.

ஆஸ்திரியா போன்ற ஐரோப்பிய நாடுகளில் கிராமபோன் தட்டுகளின் விற்பனை 20-ஆம் நூற்றாண்டின் தொடக்கத்தில் உச்சத்தை அடைந்தது. ஜார்ஜ் டான்சர் போன்ற ஆரம்பகால நாட்டுப்புற மற்றும் பாப் இசைக் கலைஞர்களின் பாடல்கள் இத்தகைய கிராமபோன் தட்டுகள் மூலமாகவே கிராமங்கள் தோறும் ஒலித்தன. மெல்ல சுழலும் தட்டின் மீது மெதுவாக ஊசி இறங்கும் போது வெளிப்படும் அந்த தனித்துவமான 'ஹிஸ்' (Hissing) சத்தமும், கிராமபோன் குழாயில் இருந்து வரும் கணீரென்ற குரலும் அன்றைய காலகட்டத்தின் அடையாளங்களாக மாறின. பணக்காரர்களின் வீடுகளை அலங்கரித்த இந்த கருவி, பிற்காலத்தில் நடுத்தர மக்களின் இல்லங்களுக்கும் பரவியது.

கிராமபோனைத் தொடர்ந்து 1920-களில் வானொலியின் (Radio) வருகை உலகளாவிய இசைப் பரவலில் ஒரு புதிய புரட்சியை ஏற்படுத்தியது. கிராமபோன் தட்டுகளை விலை கொடுத்து வாங்க முடியாத ஏழை எளிய மக்களுக்கும் இசையை இலவசமாகக் கொண்டு சேர்த்த பெருமை வானொலியையே சாரும். ஆஸ்திரியாவில் 1924-ல் தொடங்கப்பட்ட RAVAG (ஆஸ்திரிய வானொலி) போன்ற பொது ஒலிபரப்புச் சேவைகள், பாரம்பரிய இசை முதல் நவீன பாப் இசை வரை அனைத்தையும் ஒரே நேரத்தில் பல்லாயிரக்கணக்கான மக்களுக்குக் கொண்டு சேர்த்தன. வானொலிப் பெட்டியைச் சுற்றி ஒரு குடும்பமே அமர்ந்து பாடல்களைக் கேட்டு மகிழ்ந்த அந்த நாட்கள் சமூக ஒற்றுமையின் அடையாளமாகத் திகழ்ந்தன.

தொழில்நுட்பம் இன்று டிஜிட்டல் மயமாகி, மொபைல் போன்களில் இசை சுருங்கிவிட்ட போதிலும், கிராமபோன் மற்றும் வானொலியின் மீதான ஈர்ப்பு இன்றும் குறையவில்லை. பழைய நினைவுகளைப் போற்றும் வகையில் (Nostalgia) பல இசை ஆர்வலர்கள் இன்றும் கிராமபோன் தட்டுகளையும், பழங்கால வானொலிப் பெட்டிகளையும் சேகரித்து வருகின்றனர். இசையை வெறும் ஒலியாகக் கேட்காமல், ஒரு உணர்வாகக் கடத்திய இந்த இரு சாதனங்களும் என்றும் உலக இசை வரலாற்றின் அழியாத பொக்கிஷங்களாகும்.

சமுதாய வானொலி நிலைய மேம்பாட்டுக்கு ரூ.50 கோடி நிதி

 இந்து தமிழ் திசை 30-7-26

தமிழகம் உள்பட பல்வேறு மாநிலங்களில் செயல்படும் சமூக வானொலி நிலைய மேம்பாட்டுக்கு ரூ.50 கோடி நிதி

மக்களவையில் மத்திய இணையமைச்சர் எல்.முருகன் தகவல்

தமிழகம் உள்பட பல்வேறு மாநிலங்களில் செயல்படும் சமூக வானொலி நிலைய மேம்பாட்டுக்கு ரூ.50 கோடி நிதி ஒதுக்கீடு செய்யப்பட்டுள் ளதாக, மக்களவையில் மத்திய இணையமைச்சர் எல்.முருகன் தெரிவித்தார்.

தமிழகம் உள்பட பல்வேறு மாநிலங்களில் செயல்படும் வானொலி நிகழ்ச்சிகளின் செயல்திறன், நிலையான நிதி சார் நடவடிக்கைகள் தொடர் பான ஆய்வுகளை மத்திய தகவல் ஒலிபரப்பு அமைச்சகம் மதிப்பீடு செய்கிறது.

நாட்டில் தமிழகம் உள்பட பல மாநிலங்களில் உள்ள சமூக வானொலி நிலையங்களை வலுப்படுத்தும் வகையில், பல் வேறு முன்முயற்சிகளை மத் திய அரசு மேற்கொண்டு வரு கிறது. இதன் ஒரு பகுதியாக, இந்தியாவில் சமூக வானொலி நிலைய மேம்பாட்டுக்கான ஆதரவு திட்டத்தை மத்திய அரசின் திட்டமாக விரிவுபடுத் தப்பட்டு, 2026-ம் ஆண்டு முதல் 2030-ம் ஆண்டு வரை அடுத்த 5 ஆண்டுகளுக்கு ரூ.50 கோடி நிதி ஒதுக்கீடு செய்யப்பட்டுள் ளது.

இத்திட்டத்தின் கீழ், இந்த வானொலி நிலையங்களில் பணிபுரியும் ஊழியர்களுக்கான சம்பளம், கருவிகள் மற்றும் உபகரணங்களை கொள்முதல் செய்வது, சூரியமின் உற்பத்தி அமைப்பை நிறுவுதல் ஆகிய வற்றுக்காக இந்த நிதி செல விடப்படும்.

தமிழகத்தில் செயல்பட்டு வரும் 6 சமூக வானொலி நிலை யங்களுக்கு கடந்த 3 ஆண்டு களில் ரூ.52.59 லட்சம் நிதியுதவி விடுவிக்கப்பட்டுள்ளது. இதில், தருமபுரி சமூக வானொலி நிலையத்துக்கு ரூ.10 லட்சம் நிதியுதவியும் அடங்கும்.

சமூக வானொலி நிலையங்களின் செயல்பாடுகள் குறித்த ஆய்வுகள் தொடர் பான அறிவிக்கையை மத்திய தகவல் ஒலிபரப்பு அமைச்சகத் தின் அதிகாரப்பூர்வ இணை யதளத்தில் (https://mib.gov. in/) பதிவேற்றம் செய்யப்பட் டுள்ளன. அனைத்து வானொலி நிலையங்களின் விவரங்கள் இந்த இணையதளத்தின் மூலம் பெற்றுக் கொள்ள முடியும். மக்களவையில் கேள்வி ஒன் றுக்கு எழுத்து மூலம் அளித் துள்ள பதிலில், மத்திய தகவல் ஒலிபரப்புத் துறை இணை யமைச்சர் எல்.முருகன் இதனை தெரிவித்துள்ளார்.

சாத்தான்குளம் அப்துல் ஜப்பார் எழுதிய "எனக்கும் இருக்கிறது ஒரு சரித்திரம்"

 கானல் அமீரகம்,

தமிழ் அலை இணைந்து நடத்திய

சாத்தான்குளம் அப்துல் ஜப்பாரின்

"எனக்கும் இருக்கிறது ஒரு சரித்திரம்"

நூல் வெளியீட்டு விழாவில் எமது உரை 28.00வது நிமிடத்தில்...தொடுப்பு

நூல் அறிமுகம்:

தமிழ் வானொலிகள் வாயிலாக உலகமெங்கும் அறியப்ப யப்பட்ட சாத்தான்குளம் அப்துல்ஜப்பார் அவர்களின் நினைவலைகள் எனக்கு ம் இருக்கிறது ஒரு சரித்திரம் என்ற தலைப்பில் நூலாகி இருக்கின்றன. அவர் மறைவுக்குப் பின் அவர் எழுதி வைத்திருந்த குறிப்புகளைத் தொகுத்து நூலாக்கி இருக்கிறார் அவரது மகன் ஆசிப் மீரான். கிரிக்கெட் வர்ணனைகளின் அழகுக்காக என்றென்றும் அறியப்படுபவர் அப்துல் ஜப்பார். தான் எப்படி கிரிக்கெட் வர்ணனையாளராக ஆனேன் என அவர் எழுதி இருப்பதும், முதன் முதலாக வர்ணித்த ஒரு ரஞ்சிக் கோப்பைப் போட்டியில் பயன்படுத்திய தொடரும் மிக சுவாரசியம். ஆரம்பத்தில் தன் தந்தையைப் பற்றியும் தன் மகன், மகள் பற்றியும் அவர் எழுதிக்கொண்டே செல்வது இந்நூலை கீழே வைக்கவிடாமல் படிக்கச் செய்கிறது. 1950, ஜூன் 26. கொழும்பு வானொலியில் ஜப்பாரின் ஒலிபரப்பு வாழ்க்கை தொடங்கும் தினத்தில் நடந்தவற்றை எழுதி, பன்னிரெண்டில் தொடங்கி 82 வயது வரை தொடர்ந்தது என எழுதுகிறார். இக்காலகட்டத்தில் தனி மனிதர் ஒருவர் வாழ்வில் நடந்த நிகழ்வுகள் தாம் இவை என்றாலும் இந்த அனுபவங்கள் நம் பட்டறிவை விசாலமாக்கும் என்பதில் சந்தேகமே இல்லை.

வெளியீடு: கானல் அமீரகம், தமிழ் அலை, 044-24340200 விலை . 250

நன்றி: அந்திமழை | ஜூலை 2026

தக்கோலத்தில் ஒரு வானொலி

 

CISFஇன் ராஜா ஆதித்ய சோழன் (RTC) தக்கோலத்தில், “Radio Rangroot - Ek Awaaz, Ek Parivaar” என்ற புதிய வானொலியைத் தொடங்கியுள்ளது. இந்த வானொலியின் தாரக மந்திரம் "ஒரு குரல், ஒரே குடும்பம்" என்பதாகும்.

தமிழ்நாட்டில் உள்ள CISF பயிற்சி மையமான தக்கோலம் (RTC), பயிற்சியாளர்களின் அறிவுசார் மற்றும் உணர்வுசார் நலனை மேம்படுத்துவதை நோக்கமாகக் கொண்டு, "Radio Rangroot: Ek Awaaz, Ek Parivaar" எனும் ஒரு புதிய சமுதாய வானொலியைத் தொடங்கியுள்ளது. ஆனால் இந்த வானொலி ஒலி அலைகள் ஊடாக அல்லாமல், கம்பிவட வானொலியாக அந்த வளாகத்தில் ஒலிக்கிறது. விரைவில் வான் அலைகள் ஊடாகவும் எதிர்பார்க்கலாம்.

இந்த வானொலியில் செவ்வியல் ராகங்கள், பாலிவுட் வாத்திய இசை, ஊக்கமூட்டும் செய்திகள், உடல்நலக் குறிப்புகள் மற்றும் பயிற்சி தொடர்பான தகவல்களை ஒலிபரப்புகிறது; அதே வேளையில், பயிற்சியாளர்கள் தங்கள் கவிதைகள், பாடல்கள், அனுபவங்கள், நினைவுக் குறிப்புகள் மற்றும் படைப்பாற்றல் திறன்களை வெளிப்படுத்தவும் இந்த வானொலி ஒரு வாய்ப்பை வழங்குகிறது.

முக்கிய இடங்களில் நிறுவப்பட்டுள்ள வெளிப்புற ஒலிபெருக்கிகள், இந்த வானொலிச் சேவை பரவலாக மக்களைச் சென்றடைவதையும், அனைவரும் இதில் பங்கேற்பதையும் உறுதி செய்கின்றது.

நேர்மறைச் சிந்தனை, குழு உணர்வு, படைப்பாற்றல் மற்றும் கூட்டுப் பிணைப்பை வளர்க்கும் வகையில் வடிவமைக்கப்பட்டுள்ள "Radio Rangroot", "Ek Awaaz, Ek Parivaar" (ஒரு குரல், ஒரே குடும்பம்) என்ற உணர்வை மேலும் வலுப்படுத்துகிறது.

சென்னை வானொலியில் ராஜாஜி அடித்த ஜோக்

 சென்னை வானொலி நிலையத்தில் தமது சொற்பொழிவு ஒன்றை ஒலிப்பதிவு செய்ய வந்திருந்தார் ராஜாஜி.

ஒலிப்பதிவு முடிந்ததும் அதைப் போட்டுக் கேட்டுக் கொண்டிருந்தோம். ஒலிபெருக்கியில் ஒரு சிறு கோளாறு ஏற்பட்டதால் ஓர் இடத்தில் கரகரப்பு கேட்டது. ராஜாஜிக்கு எதுவும் எப்போதும் துப்புரவாக இருக்கவேண்டும். எனவே அக்கறையோடு கேட்டார், "மறுபடியும் ஒரு முறை பேசி விடட்டுமா?" என்று.

"அவசியமில்லை. ஒலிப்பதிவு சரியாக இருக்கிறது. ஸ்பீக்கர்தான் சரியில்லை” என்றார் எங்கள் பொறியாளர். உடனே ராஜாஜி: “நானும் ஸ்பீக்கர் (சொற்பொழிவாளர்), இதுவும் ஸ்பீக்கர். நீங்கள் எந்த ஸ்பீக்கரைச் சொல்கிறீர்கள்?”

நிகழ்ச்சி அறையிலிருந்த எங்களோடு சேர்ந்து ராஜாஜியும் சிரித்தார்!

 (07.01.1979)

கலசலிங்கம் சமுதாய வானொலியில் அறிவிப்பாளர் பயிற்சி பட்டறை

கிருஷ்ணன்கோவிலில் உள்ள கலசலிங்கம் பல்கலைக்கழகத்தின் கலசலிங்கம் வானொலி நிலையம் சார்பில், காட்சி சார் அறிவியல் துறைத் தலைவர் முனைவர். கற்பக சுந்தரம் ஏற்பாட்டில் ஏப்ரல் 11, 2026 அன்று வானொலி அறிப்பாளர் குறித்த ஒரு நாள்  பயிற்சி வகுப்பு நடைபெற்றது. இந்தப் பயிற்சி வகுப்பில், வானொலித் துறையின் நுணுக்கங்கள் மற்றும் நேரடி அனுபவங்களை மாணவர்களுக்கு வழங்கினோம்.  தனித்துவமான குரலால் வானொலித் துறையில் முத்திரை பதிக்க நினைப்பவர்களுக்கு, ஒரு அருமையான வாய்ப்பாக இருந்தது.

தமிழகத்தில் டி.ஆர்.எம் ஒலிபரப்பு

 

தமிழ்நாட்டில் வானொலி ஒலிபரப்புத் துறை டிஜிட்டல் தொழில்நுட்பத்தை நோக்கி நகர்வது ஒரு முக்கியமான மைல்கல்லாகும். குறிப்பாக டி.ஆர்.எம் தொழில்நுட்பம் மூலம் உயர்தர ஒலியை வழங்க சென்னை மற்றும் திருச்சி நிலையங்கள் முக்கிய பங்காற்றுகின்றன. இந்தத் தொழில்நுட்ப மாற்றமானது நேயர்களுக்குத் தெளிவான ஒலியையும் கூடுதல் வசதிகளையும் வழங்குகிறது.

தெற்கு மண்டலத்தில் அமைந்துள்ள இந்த நிலையங்கள், தமிழ்நாட்டின் பல்வேறு பகுதிகளுக்குத் தெளிவான வானொலி சேவையை வழங்குகின்றன. சென்னை ஏ, சென்னை சி மற்றும் திருச்சிராப்பள்ளி ஏ ஆகிய மூன்று முக்கிய அலைவரிசைகளும் இந்த டிஜிட்டல் புரட்சியின் முன்னணியில் உள்ளன. இந்த நிலையங்கள் அனைத்தும் ஒரே மாநிலத்தின் கீழ் வந்தாலும், அவற்றின் செயல்பாட்டு முறைகள் மாறுபடுகின்றன.

சென்னை ஏ நிலையமானது 711 kHz என்ற டி.ஆர்.எம் அலைவரிசையில் இயங்குகிறது. அதே சமயம், இதன் அனலாக் ஏ.எம் ஒலிபரப்பு 720 kHz அலைவரிசையில் 200 kW என்ற மிக அதிக சக்தியுடன் தடையின்றித் தொடர்கிறது. இது டிஜிட்டல் மற்றும் அனலாக் ஆகிய இரண்டு வகை நேயர்களையும் சென்றடையும் வகையில் ஒலிபரப்பப்படுகிறது.

சென்னை ஏ நிலையத்தின் ஒலிபரப்பு சக்தியை ஆய்வு செய்யும் போது, சிமுல்காஸ்ட் முறையில் 8 kW சக்தியும், பியூர் டி.ஆர்.எம் முறையில் 80 kW சக்தியும் பயன்படுத்தப்படுகிறது. இந்தத் தொழில்நுட்ப வேறுபாடு, டிஜிட்டல் வானொலிப் பெட்டிகள் வைத்திருப்பவர்களுக்கு மிகத் துல்லியமான ஒலியை வழங்க உதவுகிறது.

சென்னை ஏ நிலையத்தின் கால அட்டவணையைப் பார்த்தால், திங்கள் முதல் வியாழன் வரை மதியம் 03:00 முதல் மாலை 5:00 வரையும், சனிக்கிழமையும் "பியூர் டி.ஆர்.எம்" முறையில் பிரத்யேகமாக ஒலிபரப்பு செய்யப்படுகிறது. இந்த குறிப்பிட்ட நேரத்தில் நேயர்கள் எவ்வித இரைச்சலும் இன்றி உயர்தர வானொலி அனுபவத்தைப் பெற முடியும். வெள்ளி மற்றும் ஞாயிறு ஒலிபரப்பு இல்லை.

சென்னை சி நிலையமானது சற்று மாறுபட்டது, இது 783 kHz அலைவரிசையில் ஒலிப்புகிறது. இந்த நிலையத்திற்குத் தனியாக ஏ.எம் அலைவரிசை அல்லது ஏ.எம் ஒலிபரப்பிக் குறித்த விவரங்கள் இல்லை. இருப்பினும், இது 8 kW சக்தியில் பியூர் டி.ஆர்.எம் சேவையைத் தடையின்றி ஒலிபரப்புகிறது.

சென்னை சி நிலையத்தின் சிறப்பு என்னவென்றால், இது மாலை 5:00 முதல் அடுத்த நாள் மதியம் 3:00 வரை நீண்ட நேரம் பியூர் டி.ஆர்.எம் முறையில் ஒலிபரப்பாகிகிறது. இது சென்னை மாநகர நேயர்களுக்கு ஒரு நவீன டிஜிட்டல் வானொலி அனுபவத்தை உறுதி செய்யும் வகையில் அமைக்கப்பட்டுள்ளது.

திருச்சிராப்பள்ளி ஏ நிலையமானது தென் தமிழகத்தின் முக்கிய நிலையமாகத் திகழ்கிறது. இது 927 kHz அலைவரிசையில் டி.ஆர்.எம் சேவையையும், 936 kHz அலைவரிசையில் 100 kW சக்தியுடன் ஏ.எம் சேவையையும் வழங்குகிறது. இதன் மூலம் திருச்சி மற்றும் அதன் சுற்றுவட்டாரப் பகுதிகள் பயன் பெறுகின்றன.

திருச்சி நிலையமானது சிமுல்காஸ்ட் முறையில் 4 kW சக்தியையும், பியூர் டி.ஆர்.எம் முறையில் 40 kW சக்தியையும் பயன்படுத்துகிறது. இதன் பியூர் டி.ஆர்.எம் ஒலிபரப்பு திங்கள் முதல் வியாழன் வரை மதியம் 3:30 முதல் மாலை 4:30 வரை நடைபெறுகிறது. இது சென்னை நிலையத்தைப் போன்றே குறிப்பிட்ட நேரத்தில் டிஜிட்டல் சேவையை வழங்குகிறது.

இவ்வாறாக, தமிழ்நாட்டின் இந்த மூன்று முக்கிய நிலையங்களும் வெவ்வேறு மின்சக்தி மற்றும் கால அட்டவணைகளைக் கொண்டு டி.ஆர்.எம் தொழில்நுட்பத்தை வெற்றிகரமாக ஒலிபரப்பி வருகின்றன. இது மாநிலத்தின் வானொலி ஒலிபரப்பு வரலாற்றில் ஒரு புதிய பரிமாணத்தை ஏற்படுத்தி, நேயர்களுக்கு நவீன காலத்திற்கு ஏற்ப சேவைகளை வழங்கி வருகிறது.

ஊட்டி ஆகாஸ்வாணிக்கு ஒரு பயணம்

ஏர்மீடியா நிறுவனம் ஊட்டியில் ஒருங்கிணைத்த சமுதாய வானொலி குறித்த கருத்தரங்கில் பங்கேற்றது ஒரு மறக்க முடியாத அனுபவமாக அமைந்தது. இந்த பயணத்தின் ஒரு பகுதியாக, நீலகிரி மலையின் குரலாகத் திகழும் 'ஊட்டி ஆகாஸ்வாணி' வானொலி நிலையத்திற்கு நேரடியாகச் செல்லும் அறிய வாய்ப்பு எங்களுக்குக் கிடைத்தது. இந்தச் சிறப்பான பயணத்தை திரு. ஸ்டாலின் அவர்களின் பேருதவியுடன், தனது பணிச்சுமையையும் பொருட்படுத்தாது திரு. ராஜ்குமார் அவர்கள் மிக நேர்த்தியாக ஏற்பாடு செய்திருந்தனர். ஒரு வரலாற்றுச் சிறப்புமிக்க ஒலிபரப்பு மையத்தை அதன் பின்னணியோடு அறிந்துகொள்ள இது ஒரு நல்வாய்ப்பாக அமைந்தது.

எங்களது இந்த ஆய்வும் பயணமும் வெறும் தனிநபர் பயணமாக அமையாமல், ஒரு அறிவுசார் குழுவின் தேடலாகவே இருந்தது. என்னுடன் பேராசிரியர்கள் பிரகதி, அர்ச்சனா, கற்பக சுந்தரம் மற்றும் சிவா ஆகியோரும் இணைந்திருந்தனர். இவர்களுடன் திரு. விஜயகுமார் அவர்களும் எங்களுடன் கைகோர்த்து, அந்த வானொலி நிலையத்தின் செயல்பாடுகளையும் அதன் வரலாற்றுத் தடங்களையும் ஆர்வத்துடன் கேட்டறிந்தோம்.

ஒரு மலைப்பகுதியின் வாழ்வியலோடு வானொலி எவ்வாறு பின்னிப் பிணைந்துள்ளது என்பதை உணர்ந்த தருணம் அது.

மலைகளின் ராணி என்று அழைக்கப்படும் ஊட்டி, ஒலிபரப்புத் துறையில் தனது மகுடத்தைச் சூட்டிக்கொண்ட நாள் 1994-ஆம் ஆண்டு மே மாதம் 5-ஆம் தேதி ஆகும். தமிழகத்திலேயே மலைப்பகுதியில் தொடங்கப்பட்ட முதல் வானொலி நிலையம் இதுதான் என்பது இதன் தனிச்சிறப்பு. இயற்கை எழில் கொஞ்சும் இந்தச் சூழலில், நவீனத் தொழில்நுட்பம் எவ்வாறு மக்களின் அன்றாட வாழ்விற்குத் துணையாக வந்து சேர்ந்தது என்பதை எண்ணும்போது வியப்பாக இருந்தது. இந்தத் தகவல்கள் யாவும் அந்த நிலையத்தின் நீண்டகாலப் பயணத்தை எங்களுக்குத் தெளிவாகப் புரியவைத்தன.

இந்த வானொலி நிலையத்தின் தொடக்க விழா 7-5-1984 அன்று பிற்பகல் 3:30 மணிக்கு வெகு விமரிசையாகத் தொடங்கியது. அப்போதைய தமிழக ஆளுநர் டாக்டர் எம். சென்னா ரெட்டி அவர்கள் தலைமையில் இந்த விழா நடைபெற்றது. நீலகிரி தொகுதி நாடாளுமன்ற உறுப்பினர் ஆர். பிரபு அவர்கள் வாழ்த்துரை வழங்க, அன்றைய மத்திய தகவல் மற்றும் ஒலிபரப்புத் துறை அமைச்சர் கே.பி. சிங்தேவ் அவர்கள் இந்த நிலையத்தைத் தொடங்கி வைத்தனர். ஒரு பெரும் மக்கள் கூட்டத்தின் எதிர்பார்ப்புக்கு மத்தியில் இந்த நிலையம் தனது சேவையைத் தொடங்கியது.

ஊட்டி வானொலியின் முதல் ஒலியாக அமைந்தது நாமகிரிப்பேட்டை திரு. கிருஷ்ணன் அவர்களின் நாதஸ்வர இசை. அந்த இசை மலை முகடுகளைத் தழுவிச் செல்ல, அதனைத் தொடர்ந்து புஷ்பவனம் குப்புசாமி குழுவினரின் நாட்டுப்புற இசை மக்களின் செவிகளை நிறைத்தது. மதுரை வானொலி நிலையத்திலிருந்து பணி நிமித்தமாகச் சென்றிருந்த பூர்ணகுமாரின் குரல்தான், உதகை வானொலியில் ஒலித்த முதல் அறிவிப்புக் குரலாகும். இத்தகைய கலைஞர்களின் பங்களிப்புடன் இந்த நிலையம் தனது முதல் அடியை எடுத்து வைத்தது.

இந்த நிலையத்தின் நிர்வாகப் பொறுப்புகளை ஏற்றிருந்தவர்களைப் பற்றித் தெரிந்துகொள்வதும் அவசியமானது. தொடக்க நாளில் நிகழ்ச்சித் தலைமையை திரு. ரமா மோகன் ராவ் ஏற்றிருந்தார். உதவி நிலைய இயக்குநர்களாக ப. முத்துசாமி போன்றோர் பணியாற்றி, இந்த நிலையத்தை வளர்ச்சிப் பாதைக்கு இட்டுச் சென்றனர். தமிழக மேடைக்கலை வல்லுநரான திரு. இளசை எஸ். சுந்தரம் அவர்கள் நிலைய இயக்குநராக இருந்து, இந்த ஒலிபரப்புச் சேவையைத் தொய்வில்லாமல் முன்னெடுத்தார்.

தொழில்நுட்ப ரீதியாகப் பார்க்கும்போது, இந்த நிலையம் 1 கிலோ வாட் திறனுடன் மத்திய அலை வரிசையில் தனது பயணத்தைத் தொடங்கியது. ஆரம்பத்தில் மாலை 5 மணி முதல் இரவு 10:30 மணி வரை மட்டுமே நிகழ்ச்சிகளை வழங்கி வந்த இந்த நிலையம், 2000-ஆம் ஆண்டு ஜூலை 1-ஆம் தேதி முதல் தனது சேவையை விரிவுபடுத்தியது. அதன் பின் காலை 5:50 முதல் இரவு 11:05 வரை மூன்று வெவ்வேறு கால இடைவெளிகளில் சுமார் 12.5 மணி நேரம் நிகழ்ச்சிகள் ஒலிபரப்பப்பட்டு வருகிறது. இதில் இந்த நிலையத்தின் சொந்தத் தயாரிப்புகளும் அடங்கும்.

நீலகிரியின் மண்ணுக்கே உரித்தான பழங்குடியின மக்களின் கலைகளுக்கு இந்த நிலையம் மிகுந்த முக்கியத்துவம் அளிக்கிறது. 'மலைச்சாரலிலே' என்ற தலைப்பில் ஒலிபரப்பான பழங்குடியினர் இசை நிகழ்ச்சி, அதன்பின் 'மலையருவி' என்ற பெயரில் மாற்றம் பெற்றுத் தொடர்ந்து வருகிறது. இதில் தோடர், கோத்தர், முள்ளு குறும்பர், பனியர், காட்டு நாயக்கர் மற்றும் இருளர் போன்ற பழங்குடியினரின் கலாச்சாரப் பதிவுகள் ஆவணப்படுத்தப்படுகின்றன.

எம். அர்ஜுனன், கே. கம்பட்டன், வாசமல்லி போன்ற கலைஞர்கள் தங்களது பங்களிப்பை வழங்கியுள்ளனர். விவசாயம் மற்றும் உள்ளூர் விழாக்களைப் பிரதிபலிப்பதிலும் இந்த வானொலி நிலையம் முன்னணியில் உள்ளது. 1994 முதல் தொடங்கப்பட்ட 'பண்ணை இல்லம்' நிகழ்ச்சி, மலைத்தோட்டப் பயிர்கள் சாகுபடி குறித்த ஆலோசனைகளை வழங்கி வருகிறது. இது தவிர, ஊட்டியில் ஆண்டுதோறும் நடைபெறும் மலர்க்கண்காட்சி, குன்னூர் பழக்காட்சி மற்றும் உள்ளூர் கோயில் திருவிழாக்களைத் தத்ரூபமாக ஒலிப்பதிவு செய்து ஒலிபரப்பி வருகிறது. மேலும், மாதத்தின் முதல் மற்றும் மூன்றாம் வெள்ளிக்கிழமைகளில் தொலைபேசி வழியாக நேயர்களுடன் நேரடித் தொடர்பு நிகழ்ச்சிகளும் நடத்தப்படுகின்றன.

ஊட்டியின் பிங்கர் போஸ்ட் (அஞ்சல்) பகுதியில் அமைந்துள்ள இந்த வானொலி நிலையம், அன்று 187.2 MHz மற்றும் 1602 KHz ஆகிய அலைவரிசைகளில் தனது சேவையைச் செய்தது. தற்பொழுது 101.8 பண்பலை வரிசையில் ஒலிபரப்பு சேவை செய்து வருகிறது.

மலையக மக்களின் இன்ப துன்பங்களில் பங்கெடுத்து, அவர்களுக்கான தகவல்களை உடனுக்குடன் வழங்கி வரும் இந்த நிலையத்திற்குச் சென்றது, எங்களது சமுதாய வானொலி கருத்தரங்கின் மிக முக்கியமான அங்கமாக அமைந்தது. இந்த வரலாற்றுப் பதிவுகளை நேரில் கண்டு உணர்ந்தது எங்களுக்கு ஒரு கல்விசார் அனுபவமாக மட்டுமன்றி, ஒரு நெகிழ்ச்சியான தருணமாக மாற்றியதற்கு மீண்டும் ஒரு நன்றியை நிகழ்ச்சிப் பொறுப்பாளர் திரு.ராஜ்குமார் அவர்களுக்கு தெரிவிப்பதில் மகிழ்ச்சி அடைகிறோம்.

 

இன்னைக்கு சிற்றலையில் யார் சார் ஒலிபரப்புறாங்க?

 "இன்னைக்கு சிற்றலையில் யார் சார் ஒலிபரப்புறாங்க? எங்க பார்த்தாலும் சீன ஒலிபரப்பு தான் எடுக்குது" என்பவர்களுக்காக, இதோ இத்தனை வானொலிகள், இவ்வளவு மொழிகளில் தெற்காசிய நேயர்களுக்காக ஒலிபரப்புகிறது. இனியென்ன நம் கடன் வானொலிக் கேட்டுக் கிடப்பதே!

ஜோஸ் ஜேக்கப் அவர்களால் மார்ச் 31, 2026 அன்று புதுப்பிக்கப்பட்ட 'DX South Asia' தரவுகளின்படி, தெற்காசிய நேயர்களுக்காக பல்வேறு சர்வதேச வானொலி நிலையங்கள் சிற்றலை வரிசையில் விரிவான ஒலிபரப்புகளை வழங்கி வருகின்றன. உலகளாவிய செய்தி மற்றும் கலாச்சாரப் பரிமாற்றத்தை மையமாகக் கொண்ட இந்த ஒலிபரப்புகள், பல நாடுகளின் டிரான்ஸ்மிட்டர்கள் வழியாக 100 kW முதல் 250 kW வரையிலான அதிக சக்தியுடன் இயக்கப்படுகின்றன. இந்தச் சேவைகள் தமிழ், இந்தி, உருது, வங்காளி மற்றும் ஆங்கிலம் போன்ற தெற்காசியாவின் பிரதான மொழிகளை உள்ளடக்கி, நேயர்களுக்குத் தெளிவான ஒலிபரப்பை உறுதி செய்ய பல்வேறு அலைவரிசைகளில் ஒலிபரப்புகின்றன.

தமிழ் மற்றும் சிங்கள மொழி நேயர்களுக்கான ஒலிபரப்புகள் சர்வதேச அளவில் முக்கிய இடத்தைப் பெறுகின்றன. தமிழ் மொழியில் சீனா ரேடியோ இன்டர்நேஷனல் (CGTN) காலை 0200-0300 UTC நேரத்தில் சீனாவிலிருந்து 13600 மற்றும் 17655 kHz அலைவரிசைகளிலும், மாலை 1400-1500 UTC மற்றும் 1500-1600 UTC நேரங்களில் முறையே 11685, 13600 kHz மற்றும் 9690, 11685 kHz அலைவரிசைகளிலும் நிகழ்ச்சிகளை வழங்குகிறது. 'ரீச் பியாண்ட் ஆஸ்திரேலியா' நிலையம் ஆஸ்திரேலியாவின் குனுனுர்ரா (Kununurra) தளத்திலிருந்து 100 kW சக்தியில் 1300-1315 UTC வரை 11900 kHz அலைவரிசையில் தினசரி தமிழ் நிகழ்ச்சிகளை ஒலிபரப்புகிறது. சிங்கள மொழி நேயர்களுக்குச் சீனா ரேடியோ மாலை 1400-1457 UTC இல் 7265 மற்றும் 9740 kHz அலைவரிசைகளிலும், இரவு 2330-0030 UTC இல் 7260 மற்றும் 9490 kHz அலைவரிசைகளிலும் தனது சேவையை வழங்குகிறது.

இந்தி மற்றும் உருது மொழிகளுக்கான ஒலிபரப்புகள் தெற்காசியாவில் மிகப்பெரிய நேயர் பரப்பைக் கொண்டுள்ளன. இந்தி மொழியில் சீனா ரேடியோ காலை 0300-0357 UTC இல் 11640, 13720, 15350, 17655 kHz அலைவரிசைகளிலும், மதியம் 1300-1357 UTC இல் 9450 மற்றும் 11675 kHz அலைவரிசைகளிலும் சீனாவிலிருந்து தன் சேவையை வழங்குகிறது. உருது மொழியில் மாலை 1400-1500 UTC இல் 9800, 11660 kHz அலைவரிசைகளிலும், பின்னர் 1500-1600 UTC இல் 7285, 9535 kHz இல் சீனாவிலிருந்து ஒலிபரப்புகள் மேற்கொள்ளப்படுகின்றன.

மேலும், உருது நேயர்களுக்காக துருக்கியின் 'வாய்ஸ் ஆப் துருக்கி' எமிரியர் (Emirier) தளத்திலிருந்து 1200-1300 UTC நேரத்தில் 17580 kHz அலைவரிசையில் நிகழ்ச்சிகளை வழங்குகிறது.

வங்காளி மற்றும் பிற பிராந்திய மொழிகளுக்கான ஒலிபரப்புகளில் டிரான்ஸ் வேர்ல்ட் ரேடியோ (TWR) மற்றும் அட்வென்டிஸ்ட் வேர்ல்ட் ரேடியோ (AWR) ஆகியவை முன்னிலை வகிக்கின்றன. வங்காளி மொழியில் காலை 0200-0300 UTC இல் 9655, 11640 kHz அலைவரிசைகளில் சீனாவிலிருந்து நிகழ்ச்சிகள் ஒலிபரப்பப்படுகின்றன. மடகாஸ்கரின் தாலாட்டா வோலோனோண்ட்ரி (Talata Volonondry) தளத்திலிருந்து 250 kW சக்தியில் டிரான்ஸ் வேர்ல்ட் ரேடியோ ஆவடி (Awadhi), பத்ரி (Bhatri), போண்டோ (Bondo), புந்தேலி (Bundeli) மற்றும் சந்தாலி (Santhali) போன்ற பல்வேறு மொழிகளில் 17700 kHz அலைவரிசையில் குறிப்பிட்ட கிழமைகளில் மாலை நேரங்களில் நிகழ்ச்சிகளை வழங்குகிறது.

அட்வென்டிஸ்ட் வேர்ல்ட் ரேடியோ குவாமின் (Guam) அகாத் (Agat) தளத்திலிருந்து 100 kW சக்தியில் வங்காளி, அஸ்ஸாமி மற்றும் கொக்போரோக் (Kokborok) போன்ற மொழிகளில் 15430, 15550 மற்றும் 15265 kHz அலைவரிசைகளில் ஒலிபரப்புகளை மேற்கொள்கிறது.

ஆங்கிலம் மற்றும் தென்னிந்திய மொழிகளான மலையாளம், கன்னடம் ஆகியவற்றிற்கான பிரத்யேகச் சேவைகளும் இதில் அடங்கும். பிபிசி நிறுவனம் ஆங்கில மொழியில் ஓமனின் அக்ஸஸீலா மற்றும் உஸ்பெகிஸ்தானின் தாஷ்கண்ட் தளங்களிலிருந்து 12095, 9750 மற்றும் 17825 kHz அலைவரிசைகளில் காலை மற்றும் மதிய வேளைகளில் செய்திகளை வழங்குகிறது.

மலையாள மொழி நேயர்களுக்காக வத்திக்கான் ரேடியோ 1510-1530 UTC நேரத்தில் 15490 மற்றும் 17790 kHz அலைவரிசைகளில் 250 kW சக்தியில் வத்திக்கானின் SMG தளத்திலிருந்து நிகழ்ச்சிகளை வழங்குகிறது. கன்னட மொழிக்கு ஆஸ்திரேலியாவின் குனுனுர்ரா தளத்திலிருந்து 1315-1330 UTC நேரத்தில் 11900 kHz அலைவரிசையில் 100 kW மின்திறனுடன் நிகழ்ச்சிகள் ஒலிபரப்பப்படுகின்றன.

ஒட்டுமொத்தமாக, தெற்காசியாவிற்கான இந்தச் சிற்றலை சேவைகள் தொழில்நுட்ப ரீதியாக மிகவும் வலுவாக வடிவமைக்கப்பட்டுள்ளன. ஐக்கிய அரபு அமீரகத்தின் தபய்யா (Dhabbayya) தளம் வழியாக FEBA ரேடியோ உருது மற்றும் சிந்தி மொழிகளில் 9540 kHz அலைவரிசையில் நிகழ்ச்சிகளை வழங்குகிறது. ஜப்பானின் யமாடா (Yamata) தளத்திலிருந்து ரேடியோ ஜப்பான் உருது மற்றும் இந்தி மொழிகளில் முறையே 9440 மற்றும் 11655 kHz இல் ஒலிபரப்புகிறது. 100 kW முதல் 250 kW வரையிலான திறன் கொண்ட இந்த டிரான்ஸ்மிட்டர்கள், எல்லைகளைத் தாண்டி தெற்காசியாவின் குக்கிராமங்கள் வரை தகவல்களைக் கொண்டு சேர்ப்பதில் இன்றும் ஒரு முக்கிய ஊடகமாகத் திகழ்கின்றன.

உங்களிடம் உள்ள சிற்றலை வானொலிப் பெட்டியை எடுங்கள், அனைத்து ஒலிப்புகளையும் சோதியுங்கள், உங்கள் வானொலிப்பெட்டியின் திறன் மற்றும் ஒலிப்பரப்பியின் திறனையும் அறிந்துகொள்ள ஒரு வாய்ப்பு.

நெருக்கடி காலத்தில் சிற்றலை வானொலியின் முக்கியத்துவம்

 

நெருக்கடி காலத்தில் சிற்றலை வானொலியின் முக்கியத்துவம்: ஈரானில் பிபிசியின் புதிய முன்னெடுப்பு

இன்றைய டிஜிட்டல் உலகில் இணையம் மற்றும் சமூக ஊடகங்கள் தகவல்களைப் பரிமாறிக் கொள்ள முதன்மையான வழிகளாக இருந்தாலும், நெருக்கடி காலங்களில் பழைய தொழில்நுட்பமான சிற்றலை வானொலி இன்னும் ஒரு உயிர்நாடியாகச் செயல்பட்டு வருகிறது என்பதை ஈரான் நிகழ்வுகள் நமக்கு உணர்த்துகின்றன.

ஈரானில் நிலவி வரும் அசாதாரண சூழல் மற்றும் போராட்டங்களுக்கு எதிரான கடுமையான நடவடிக்கைகளுக்கு மத்தியில், கடந்த ஜனவரி 8 முதல் அங்கு இணைய முடக்கம் அமலில் உள்ளது. பிபிசி நியூஸ் பெர்ஷியன் ஊடகத்தின் செய்திகளுக்கு ஈரானில் தடை விதிக்கப்பட்டுள்ள போதிலும், அங்குள்ள நான்கு பேரில் ஒருவர் இந்தச் சேவையைப் கேட்கின்றனர் என்பது குறிப்பிடத்தக்கது. டிஜிட்டல் தளங்கள் முடக்கப்படும்போது, மக்களுக்குத் துல்லியமான மற்றும் நடுநிலையான செய்திகளை வழங்க சிற்றலை வானொலி ஒரு சிறந்த கருவியாகத் திகழ்கிறது.

இந்தச் சூழலைக் கருத்தில் கொண்டு, பிபிசி உலக சேவை ஈரானிய மக்களுக்காக ஒரு தற்காலிக அவசர கால வானொலித் திட்டத்தைத் தொடங்கியுள்ளது. தினமும் 30 நிமிடங்கள் ஒலிபரப்பாகும் இந்தத் வானொலி, ஈரானின் தற்போதைய அரசியல், சமூக மற்றும் பொருளாதார மாற்றங்களை விரிவான பகுப்பாய்வுடன் வழங்குகிறது.

இந்தச் செய்திகளை ஈரான் மக்கள் பின்வரும் அலைவரிசைகளில் கேட்கலாம்:

*   சிற்றலை (Shortwave): 9465kHz மற்றும் 5935kHz 

*   மத்திய அலை (Mediumwave): 702kHz 

நெருக்கடி காலங்களில் வானொலிச் சேவைகளைத் தொடங்குவது பிபிசிக்கு இது முதல் முறையல்ல. சிற்றலை மற்றும் மத்திய அலை வானொலிகள் போர் அல்லது இயற்கை பேரிடர் காலங்களில் எவ்வாறு தகவல்களைக் கொண்டு சேர்க்கின்றன என்பதற்குப் பல உதாரணங்கள் உள்ளன: 2025 ஏப்ரலில் மியான்மர் நிலநடுக்கத்திற்குப் பிறகு பர்மீஸ் சேவை விரிவாக்கப்பட்டது. 2024 டிசம்பர் மாதம் சிரியா மக்களுக்காக மேம்படுத்தப்பட்ட வானொலி சேவை தொடங்கப்பட்டது. 2023ல் காசா மற்றும் சூடான் மோதல்களின் போது அவசர கால வானொலி சேவைகள் தொடஙகப்பட்டது. 2022 பெப்ரவரியில் உக்ரைன் மீதான படையெடுப்பின் போது நீட்டிக்கப்பட்ட செய்தி அறிக்கைகள் ஒலிபரப்பப்பட்டது..

நவீன தொழில்நுட்பங்கள் தோல்வியடையும் இடத்தில்தான் வானொலியின் உண்மையான வலிமை வெளிப்படுகிறது. எல்லைகளைத் தாண்டி, தணிக்கைகளைத் தகர்த்து செய்திகளைக் கொண்டு சேர்க்கும் சிற்றலை வானொலி, இன்றும் உலகின் மிகவும் நம்பகமான செய்தி ஊடகங்களில் ஒன்றாகத் தொடர்கிறது. ஈரானில் தொடங்கப்பட்டுள்ள இந்தச் சேவை, உண்மையானத் தகவல் தேவைப்படும் மக்களுக்கு ஒரு சிறந்த வழிகாட்டியாக அமையும் என்பதில் ஐயமில்லை. ஆனால், அது யாருக்கான உண்மையான தகவல்?

வானொலி உலகின் வசீகரக் குரல்

விகடன் 'பொக்கிஷம்' பகுதியில் கே.எஸ். ராஜா!

பழைய ஆவணங்களையும், இதழ்களையும் புரட்டிக் கொண்டிருக்கும்போது எதிர்பாராத விதமாக ஒரு அரிய தகவல் கிடைத்தால் அது தரும் மகிழ்ச்சியே தனி. அப்படித் தேடியபோது கிடைத்த ஒரு பொக்கிஷம்தான், ஈழத்து வானொலியின் லெஜண்ட் கே.எஸ். ராஜா அவர்களின் இந்தப் பேட்டி.

19 அக்டோபர் 1986 அன்று 'ஆனந்த விகடன்' இதழில் வெளிவந்த இந்தப் பேட்டி, நீண்ட இடைவேளைக்குப் பிறகு 4 ஜூலை 2012 அன்று விகடனின் "பொக்கிஷம்" பகுதியில் மறுபதிப்பு செய்யப்பட்டுள்ளது. பி. இளங்கோவன் மற்றும் ஆர். தேன்மொழி ஆகியோர் இந்தப் பேட்டியை எடுத்திருந்தனர்.

இலங்கை வானொலியின் அலைவரிசைகளில் தனது காந்தக் குரலால் உலகத்தமிழர்களைக் கட்டிப்போட்டவர் கே.எஸ். ராஜா. ஈழப் போராட்டச் சூழலால் நீண்ட காலம் அவரது குரலைக் கேட்க முடியாமல் தவித்த ரசிகர்களுக்கு, அவர் மதுரைக்கு வந்த செய்தி ஒரு இனிப்பான அதிர்ச்சியாக அமைந்தது.

மதுரை காந்தி மியூசியம் திறந்தவெளி அரங்கில் ஈழப் போராட்ட நிதி திரட்டுவதற்காக அவர் நேரடி நிகழ்ச்சியைத் தரப்போகிறார் என்றதும், மதுரை மாநகரமே அங்கு திரண்டது. நிகழ்ச்சி ஏற்பாடு செய்தவர்களே எதிர்பார்க்காத அளவுக்கு ரசிகர் கூட்டம் அலைமோதியது.

"பராக் சொல்வது போல் முதலில் ஒருவர் 'வருகிறார்... வருகிறார்...' என்று அறிவிக்க, கே.எஸ். ராஜா மேடைக்கு வந்தபோது எழுந்த கரகோஷம் இன்னும் நம் காதுகளில் ஒலித்துக் கொண்டே இருக்கிறது."

 "சாகுமவரை அறிவிப்பாளராகவே இருக்க விரும்புகிறேன்!" இந்தப் பேட்டியின் தலைப்பு ஒன்றே போதும், அவருக்கு வானொலித் துறையின் மீது இருந்த தீராத காதலையும் அர்ப்பணிப்பையும் விளக்குவதற்கு. "சாகுமவரை அறிவிப்பாளராகவே இருக்க விரும்புகிறேன்..!" என்ற அவரது வரிகள், ஒரு கலைஞன் தனது கலையின் மீது வைத்திருந்த ஆகச்சிறந்த காதலைப் பிரதிபலிக்கிறது.

கே.எஸ். ராஜாவின் சிறப்பம்சங்களில், அதுவரை இருந்த கணீர் என்ற முறையான அறிவிப்புப் பாணியை மாற்றி, நேயர்களுடன் ஒரு நண்பனைப் போல உரையாடும் புதிய பாணியை அறிமுகப்படுத்தியவர்.

"வணக்கம், வணக்கம், வணக்கம்..." என்று அவர் தொடங்கும் போதே வானொலிப் பெட்டியின் முன் ஒரு பெரும் கூட்டமே தவம் கிடக்கும். பாப் இசை மற்றும் திரை இசையின் வல்லுனர். இலங்கை வானொலியின் பொற்காலத்தை உருவாக்கியதில் இவருக்குப் பெரும் பங்கு உண்டு.

ஒரு காலத்தில் தென்னிந்தியத் திரையுலகைச் சார்ந்த பெரிய நட்சத்திரங்களே கே.எஸ். ராஜாவின் குரலுக்கும், அவர் மூலம் பாடல்கள் ஒலிபரப்பப்படுவதற்கும் ஆவலாக இருந்த காலம் இருந்தது. அப்படிப்பட்ட ஒரு ஆளுமையின் பேட்டியை மீண்டும் வாசிப்பது, நம்மை 80-களின் அந்த வசீகர வானொலி காலத்திற்கே கொண்டு செல்கிறது.

இன்று டிஜிட்டல் ஊடகங்கள் பெருகிவிட்ட நிலையிலும், வானொலிப் பித்தர்களிடையே கே.எஸ். ராஜாவின் பெயர் ஒரு மந்திரச் சொல்லாகவே நீடிக்கிறது. ஆனந்த விகடன் இந்தப் பேட்டியை மறுபதிப்பு செய்தது உண்மையிலேயே பாராட்டுக்குரிய ஒரு வரலாற்றுப் பணி.

காலங்கள் மாறினாலும், தொழில்நுட்பங்கள் வளர்ந்தாலும் கே.எஸ். ராஜா போன்ற கலைஞர்கள் விட்டுச் சென்ற தடம் அழியாதது. இத்தகைய அரிய பொக்கிஷங்களை ஆவணப்படுத்துவது நமது கடமையாகும்.

வானொலி ஆய்வுச் செம்மல்

மகிழ்ச்சியான செய்தி!

மதுரையில் நடைபெற்ற நேசகானம் வானொலியின் (Nesaganam Radio) 10-ஆம் ஆண்டு தொடக்க விழாவில், இணைய வானொலி இயக்குநர்கள் சங்கம் (Online Radio Directors Association) எமக்கு "வானொலி ஆய்வுச் செம்மல்" (Radio Research Excellence Award) விருதினை வழங்கி கௌரவித்தது.

வானொலி இதழியல், ஊடக ஆய்வுகளில் (Radio Journalism and Media Studies) யாம் ஆற்றிவரும் பணிகளுக்காக வழங்கப்பட்ட இந்த அங்கீகாரத்தை மிகுந்த நெகிழ்ச்சியுடன் ஏற்றுக்கொள்கிறேன்.

இந்த உயரிய விருதிற்கு எம்மைத் தேர்ந்தெடுத்த சங்கத்தின் நிர்வாகிகளான திரு.கே.பிரபாகரன், முனைவர்.எம்.முஹம்மது அஸ்கர், திரு.இராதகிருஷ்ணன் மற்றும் என்னை என்றும் ஊக்கப்படுத்தும் சென்னை பல்கலைக்கழகத்தின் இதழியல், தொடர்பியல்  துறைக்கும், என் அன்பிற்குரிய மாணவர்களுக்கும், நண்பர்களுக்கும் எனது மனமார்ந்த நன்றிகளைத் தெரிவித்துக் கொள்கிறேன்.

வானொலித் துறையின் AI  எதிர்காலம் மற்றும் அதன் ஆய்வுப் பணிகளில் தொடர்ந்து அர்ப்பணிப்புடன் செயல்பட இந்த விருது எமக்கு ஒரு பெரிய உத்வேகத்தை அளித்துள்ளது.

அனைவரது அன்புக்கும் ஆதரவுக்கும் மிக்க நன்றி!

#

 

 

ஒரு சில புத்தகங்களை நம் வாழ்க்கையில் மறக்க முடியாது. ஒரு காலத்தில் இந்த புத்தகம் நமக்கு கிடைக்காதா என்று ஏங்கியிருக்கிறோம். இன்று அதேப் புத்தகத்தின் அனைத்துப் பதிப்புகளும் நம் கைவசம் இருந்தால் எப்படியிருக்கும். அப்படியான புத்தகம் தான் இந்த WRTH.

உலக வானொலி மற்றும் தொலைக்காட்சி கையேடு 2026 (World Radio TV Handbook 2026) என்பது வானொலி மற்றும் ஊடகத் துறையில் இருப்பவர்களுக்கு ஒரு மிக முக்கியமான ஆவணமாகத் திகழ்கிறது. 1947-ஆம் ஆண்டு தொடங்கப்பட்ட இந்த கையேடு, இந்த ஆண்டு தனது 80-வது பதிப்பை வெளியிடுவதன் மூலம் ஒரு வரலாற்று மைல்கல்லை எட்டியுள்ளது. 832  பக்கங்களைக் கொண்ட இந்த பிரம்மாண்டமான புத்தகம், உலகம் முழுவதும் உள்ள நாடுகளின் வானொலி நிலையங்கள், அவற்றின் அலைவரிசைகள், ஒலிபரப்பு நேரங்கள் மற்றும் தொழில்நுட்ப விவரங்களை உள்ளடக்கிய ஒரு முழுமையான தகவல் களஞ்சியமாக விளங்குகிறது. குறிப்பாக, அச்சு வடிவில் வெளியாகும் கடைசிப் பதிப்பு இது என்பதால், உலகெங்கிலும் உள்ள வானொலி ஆர்வலர்கள் மற்றும் சேகரிப்பாளர்கள் மத்தியில் இதற்குப் பெரும் வரவேற்பு கிடைத்துள்ளது.

இந்த 2026-ஆம் ஆண்டு பதிப்பு முந்தைய ஆண்டுகளை விட கூடுதல் சிறப்பம்சங்களுடன் வடிவமைக்கப்பட்டுள்ளது. இதில் மொத்தம் 96 வண்ணப் பக்கங்கள் இடம்பெற்றுள்ளன, இது வழக்கமான பதிப்புகளை விட 32 பக்கங்கள் அதிகமாகும். இந்த வண்ணப் பக்கங்களில் நார்ஃபோக் தீவு, ஜிப்ரால்டர் மற்றும் டோங்கா போன்ற தீவு நாடுகளின் வானொலி வரலாறு மற்றும் தற்போதைய ஒலிபரப்பு நிலை குறித்த சுவாரசியமான கட்டுரைகள் புகைப்படங்களுடன் விரிவாக வழங்கப்பட்டுள்ளன. இது வெறும் தரவுப் பட்டியலாக மட்டுமல்லாமல், ஒரு வரலாற்றுப் புத்தகமாகவும் வாசிப்பவர்களுக்குப் பயனுள்ளதாக அமைகிறது. மேலும், சர்வதேச வானொலி நிலையங்களின் முகவரிகள், தொலைபேசி எண்கள், மின்னஞ்சல் முகவரிகள் மற்றும் இணையதளத் தரவுகள் அனைத்தும் மிகத் துல்லியமாகச் சரிபார்க்கப்பட்டு இதில் சேர்க்கப்பட்டுள்ளன.

தொழில்நுட்ப ரீதியாகப் பார்க்கும் பொழுது, இந்த கையேடு நவீன கால மாற்றங்களுக்கு ஏற்ப தன்னைத் தகவமைத்துக் கொண்டுள்ளது. குறிப்பாக, டிஜிட்டல் ரேடியோ மாண்டியல் (DRM) மற்றும் எச்.டி (HD) வானொலி தொழில்நுட்பங்கள் குறித்த விரிவான பகுதிகள் இதில் உள்ளன. தற்போதைய சூழலில் டிஜிட்டல் ஒலிபரப்புகள் அதிகரித்து வருவதால், அவற்றைப் பிடிப்பதற்கான வழிமுறைகளும், அலைவரிசைப் பட்டியல்களும் தெளிவாகக் கொடுக்கப்பட்டுள்ளன. அதேபோல், எஸ்.டி.ஆர் (SDR) எனப்படும் மென்பொருள் சார்ந்த வானொலி கருவிகள் மற்றும் புதிய ரக ரிசீவர்கள் குறித்த நிபுணர்களின் ஆய்வுகள், புதிய கருவிகளை வாங்கத் திட்டமிடுபவர்களுக்குச் சிறந்த வழிகாட்டியாக அமைகின்றன. அலைவரிசைகளின் குறுக்கீடுகள் மற்றும் புவிசார் தகவல் தொடர்புகள் குறித்த நுணுக்கமான தகவல்களும் இதில் இடம்பெற்றுள்ளன.

இருப்பினும், இந்த 2026 பதிப்பு ஒரு வருத்தமான செய்தியையும் சுமந்து வந்துள்ளது. காகித விலை உயர்வு மற்றும் கப்பல், பான் அஞ்சல் போக்குவரத்துச் செலவுகள் உலக அளவில் அதிகரித்துள்ளதால், அச்சு வடிவில் வெளிவரும் கடைசிப் பதிப்பு இதுவே என்று நிர்வாகம் அறிவித்துள்ளது. 80 ஆண்டுகால அச்சுப் பாரம்பரியம் இந்த ஆண்டோடு நிறைவடைகிறது. இனிவரும் காலங்களில் WRTH முழுமையாகத் தனது இணையதளம் மற்றும் மொபைல் ஆப் (Web App) வழியாகவே தனது சேவைகளைத் தொடர உள்ளது. இதனால், இந்த 2026 அச்சுப் பதிப்பானது ஒரு அரிய சேகரிப்புப் பொருளாக (Collector's Item) மாறியுள்ளது. குறிப்பாக, கையொப்பமிடப்பட்ட மற்றும் வரிசை எண் இடப்பட்ட சிறப்புப் பதிப்புகள் வெளியானதுமே விற்றுத் தீர்ந்தது இதன் மதிப்பை உணர்த்துகிறது.

நிறைவாக, உலக வானொலி மற்றும் தொலைக்காட்சி கையேடு 2026 என்பது ஒரு சகாப்தத்தின் நிறைவாகக் கருதப்படுகிறது. வானொலி அலைகளைத் தேடிப் பிடிக்கும் ஆர்வம் கொண்டவர்களுக்கும், உலகளாவிய ஒலிபரப்புத் துறையை ஆய்வு செய்பவர்களுக்கும் இது ஒரு தவிர்க்க முடியாத பொக்கிஷமாகும். அச்சுப் பதிப்பு நின்று போனாலும், அதன் டிஜிட்டல் வடிவம் மற்றும் பி.டி.எஃப் (E-book) பதிப்புகள் மூலம் இந்தத் தகவல்கள் தொடர்ந்து பகிரப்படும் என்பது ஆறுதலான விஷயம். வானொலி ஆர்வலர்கள் தங்களின் நூலகத்தில் பெருமையுடன் வைத்துக்கொள்ள வேண்டிய ஒரு வரலாற்று ஆவணமாகவே இந்த 80-வது பதிப்பைப் பார்க்க முடியும்.

புத்தகம் தேவைப்படுவோர் தொடர்பு கொள்ள வேண்டிய முகவரி WRTH (at) WRTH  (dot) ORG

ஆகாஷ்வாணி 90 - சிறப்பு நேர்காணல்

 ஆகாஷ்வாணி 90 ஆண்டுகளை கொண்டாட உள்ள இந்த சமயத்தில், திருமதி. ராஜ ராஜேஸ்வரி தயாரிப்பில், யாம் பங்கேற்ற  சிறப்பு வானொலி நேர்காணல் நிகழ்ச்சி இன்று 16-12-2025 (பாகம் 1) மற்றும் வரும்  28-12-2025 (பாகம் 2) ஆகிய தேதிகளில் ஒலிபரப்பாகிறது; இந்த நிகழ்ச்சியை சென்னை முதன்மை அலைவரிசையில் காலை 08:45 மணிக்கும், FM ரெயின்போ அலைவரிசையில் மதியம் 02:15 மணிக்கும், மற்றும் விவித் பாரதி தமிழ் அலைவரிசையில் இரவு 07:00 மணிக்கும் கேட்டு மகிழலாம். News On Air செயலி ஊடாகவும் கேட்கலாம். விரையில் யூடியூப்பில் பதிவேற்றிய தொடுப்பையும் இங்கே இணைக்கிறோம்.

சோனா எஃப்.எம்: மலைவாழ் மக்களின் தோழன்

தினமும் 16 மணி நேரங்கள் ஒலிபரப்பாகும் இந்த வானொலிக்கு சேலம் மாவட்டம் முழுவதும் அத்தனை நேயர்கள். சமீபத்தில் அந்த வானொலியின் மூன்றாம் ஆண்டு விழாவில் கலந்துகொள்ளும் வாய்ப்பு கிடைத்தது. நிகழ்ச்சியை இலக்கியா அவ்வளவு அழகாகத் தொகுத்து வழங்கினார். திட்ட இயக்குநர் திரு.சுப்ரமணியம் மிகச் சிறப்பாக நிகழ்ச்சியை ஒருங்கிணைத்து இருந்தார். 

வள்ளியப்பா அறக்கட்டளையின் தலைவர் திரு.சி.வள்ளியப்பா  ஆற்றிய உரையில் நேரடியாக நேயர்களின் தேவைகளைக் கேட்டறிந்து, நிகழ்ச்சித் தயாரிப்பாளர்களிடம் குறிப்பெடுத்துக் கொள்ளச் சொன்னார். கூடுதலாக நேரடியாக அனைத்து அறிவிப்பாளர்கள், நிகழ்ச்சித் தயாரிப்பாளர்களையும் நேயர்களுக்கு அறிமுகப்படுத்தி வைத்தார். 

ஒரு சமுதாய வானொலியால் என்னவெல்லாம் செய்யமுடியும்? மலை வாழ் மக்களுக்கு சாலை வசதி, மருத்துவ உதவி, அத்தியாவசிய தேவைகளைப் பூர்த்தி செய்து வருகின்றது என்றால் நம்ப முடிகிறதா. ஏற்காடு மலை மீது அமைந்துள்ள 36 கிராம மக்களுக்கான ஒரே ஊடகமாக இந்த சேலம் சோனா எஃப்.எம் செயல்பட்டுவருகிறது. 

எழுத்தாளர், ஆகாஷ்வாணியின் முன்னாள் பணியாளர் அகிலனோடு நெருங்கியத் தொடர்பு கொண்டவர் என்பதில் மிக்க மகிழ்ச்சி. தமிழகத்தில் வெற்றிகரமாக இயங்கிவரும் ஒருசில சமுதாய வானொலிகளில் இதுவும் ஒன்று என்பது இங்கு குறிப்பிடத்தக்கது.