கிருஷ்ணன்கோவிலில் உள்ள கலசலிங்கம் பல்கலைக்கழகத்தின் கலசலிங்கம் வானொலி நிலையம் சார்பில், காட்சி சார் அறிவியல் துறைத் தலைவர் முனைவர். கற்பக சுந்தரம் ஏற்பாட்டில் ஏப்ரல் 11, 2026 அன்று வானொலி அறிப்பாளர் குறித்த ஒரு நாள் பயிற்சி வகுப்பு நடைபெற்றது. இந்தப் பயிற்சி வகுப்பில், வானொலித் துறையின் நுணுக்கங்கள் மற்றும் நேரடி அனுபவங்களை மாணவர்களுக்கு வழங்கினோம். தனித்துவமான குரலால் வானொலித் துறையில் முத்திரை பதிக்க நினைப்பவர்களுக்கு, ஒரு அருமையான வாய்ப்பாக இருந்தது.
தமிழ்நாட்டில் வானொலி ஒலிபரப்புத் துறை டிஜிட்டல் தொழில்நுட்பத்தை நோக்கி நகர்வது ஒரு முக்கியமான மைல்கல்லாகும். குறிப்பாக டி.ஆர்.எம் தொழில்நுட்பம் மூலம் உயர்தர ஒலியை வழங்க சென்னை மற்றும் திருச்சி நிலையங்கள் முக்கிய பங்காற்றுகின்றன. இந்தத் தொழில்நுட்ப மாற்றமானது நேயர்களுக்குத் தெளிவான ஒலியையும் கூடுதல் வசதிகளையும் வழங்குகிறது.
தெற்கு மண்டலத்தில் அமைந்துள்ள இந்த நிலையங்கள், தமிழ்நாட்டின் பல்வேறு பகுதிகளுக்குத் தெளிவான வானொலி சேவையை வழங்குகின்றன. சென்னை ஏ, சென்னை சி மற்றும் திருச்சிராப்பள்ளி ஏ ஆகிய மூன்று முக்கிய அலைவரிசைகளும் இந்த டிஜிட்டல் புரட்சியின் முன்னணியில் உள்ளன. இந்த நிலையங்கள் அனைத்தும் ஒரே மாநிலத்தின் கீழ் வந்தாலும், அவற்றின் செயல்பாட்டு முறைகள் மாறுபடுகின்றன.
சென்னை ஏ நிலையமானது 711 kHz என்ற டி.ஆர்.எம் அலைவரிசையில் இயங்குகிறது. அதே சமயம், இதன் அனலாக் ஏ.எம் ஒலிபரப்பு 720 kHz அலைவரிசையில் 200 kW என்ற மிக அதிக சக்தியுடன் தடையின்றித் தொடர்கிறது. இது டிஜிட்டல் மற்றும் அனலாக் ஆகிய இரண்டு வகை நேயர்களையும் சென்றடையும் வகையில் ஒலிபரப்பப்படுகிறது.
சென்னை ஏ நிலையத்தின் ஒலிபரப்பு சக்தியை ஆய்வு செய்யும் போது, சிமுல்காஸ்ட் முறையில் 8 kW சக்தியும், பியூர் டி.ஆர்.எம் முறையில் 80 kW சக்தியும் பயன்படுத்தப்படுகிறது. இந்தத் தொழில்நுட்ப வேறுபாடு, டிஜிட்டல் வானொலிப் பெட்டிகள் வைத்திருப்பவர்களுக்கு மிகத் துல்லியமான ஒலியை வழங்க உதவுகிறது.
சென்னை ஏ நிலையத்தின் கால அட்டவணையைப் பார்த்தால், திங்கள் முதல் வியாழன் வரை மதியம் 03:00 முதல் மாலை 5:00 வரையும், சனிக்கிழமையும் "பியூர் டி.ஆர்.எம்" முறையில் பிரத்யேகமாக ஒலிபரப்பு செய்யப்படுகிறது. இந்த குறிப்பிட்ட நேரத்தில் நேயர்கள் எவ்வித இரைச்சலும் இன்றி உயர்தர வானொலி அனுபவத்தைப் பெற முடியும். வெள்ளி மற்றும் ஞாயிறு ஒலிபரப்பு இல்லை.
சென்னை சி நிலையமானது சற்று மாறுபட்டது, இது 783 kHz அலைவரிசையில் ஒலிப்புகிறது. இந்த நிலையத்திற்குத் தனியாக ஏ.எம் அலைவரிசை அல்லது ஏ.எம் ஒலிபரப்பிக் குறித்த விவரங்கள் இல்லை. இருப்பினும், இது 8 kW சக்தியில் பியூர் டி.ஆர்.எம் சேவையைத் தடையின்றி ஒலிபரப்புகிறது.
சென்னை சி நிலையத்தின் சிறப்பு என்னவென்றால், இது மாலை 5:00 முதல் அடுத்த நாள் மதியம் 3:00 வரை நீண்ட நேரம் பியூர் டி.ஆர்.எம் முறையில் ஒலிபரப்பாகிகிறது. இது சென்னை மாநகர நேயர்களுக்கு ஒரு நவீன டிஜிட்டல் வானொலி அனுபவத்தை உறுதி செய்யும் வகையில் அமைக்கப்பட்டுள்ளது.
திருச்சிராப்பள்ளி ஏ நிலையமானது தென் தமிழகத்தின் முக்கிய நிலையமாகத் திகழ்கிறது. இது 927 kHz அலைவரிசையில் டி.ஆர்.எம் சேவையையும், 936 kHz அலைவரிசையில் 100 kW சக்தியுடன் ஏ.எம் சேவையையும் வழங்குகிறது. இதன் மூலம் திருச்சி மற்றும் அதன் சுற்றுவட்டாரப் பகுதிகள் பயன் பெறுகின்றன.
திருச்சி நிலையமானது சிமுல்காஸ்ட் முறையில் 4 kW சக்தியையும், பியூர் டி.ஆர்.எம் முறையில் 40 kW சக்தியையும் பயன்படுத்துகிறது. இதன் பியூர் டி.ஆர்.எம் ஒலிபரப்பு திங்கள் முதல் வியாழன் வரை மதியம் 3:30 முதல் மாலை 4:30 வரை நடைபெறுகிறது. இது சென்னை நிலையத்தைப் போன்றே குறிப்பிட்ட நேரத்தில் டிஜிட்டல் சேவையை வழங்குகிறது.
இவ்வாறாக, தமிழ்நாட்டின் இந்த மூன்று முக்கிய நிலையங்களும் வெவ்வேறு மின்சக்தி மற்றும் கால அட்டவணைகளைக் கொண்டு டி.ஆர்.எம் தொழில்நுட்பத்தை வெற்றிகரமாக ஒலிபரப்பி வருகின்றன. இது மாநிலத்தின் வானொலி ஒலிபரப்பு வரலாற்றில் ஒரு புதிய பரிமாணத்தை ஏற்படுத்தி, நேயர்களுக்கு நவீன காலத்திற்கு ஏற்ப சேவைகளை வழங்கி வருகிறது.
ஏர்மீடியா நிறுவனம் ஊட்டியில் ஒருங்கிணைத்த சமுதாய வானொலி குறித்த கருத்தரங்கில் பங்கேற்றது ஒரு மறக்க முடியாத அனுபவமாக அமைந்தது. இந்த பயணத்தின் ஒரு பகுதியாக, நீலகிரி மலையின் குரலாகத் திகழும் 'ஊட்டி ஆகாஸ்வாணி' வானொலி நிலையத்திற்கு நேரடியாகச் செல்லும் அறிய வாய்ப்பு எங்களுக்குக் கிடைத்தது. இந்தச் சிறப்பான பயணத்தை திரு. ஸ்டாலின் அவர்களின் பேருதவியுடன், தனது பணிச்சுமையையும் பொருட்படுத்தாது திரு. ராஜ்குமார் அவர்கள் மிக நேர்த்தியாக ஏற்பாடு செய்திருந்தனர். ஒரு வரலாற்றுச் சிறப்புமிக்க ஒலிபரப்பு மையத்தை அதன் பின்னணியோடு அறிந்துகொள்ள இது ஒரு நல்வாய்ப்பாக அமைந்தது.
எங்களது இந்த ஆய்வும் பயணமும் வெறும் தனிநபர் பயணமாக அமையாமல், ஒரு அறிவுசார் குழுவின் தேடலாகவே இருந்தது. என்னுடன் பேராசிரியர்கள் பிரகதி, அர்ச்சனா, கற்பக சுந்தரம் மற்றும் சிவா ஆகியோரும் இணைந்திருந்தனர். இவர்களுடன் திரு. விஜயகுமார் அவர்களும் எங்களுடன் கைகோர்த்து, அந்த வானொலி நிலையத்தின் செயல்பாடுகளையும் அதன் வரலாற்றுத் தடங்களையும் ஆர்வத்துடன் கேட்டறிந்தோம்.
ஒரு மலைப்பகுதியின் வாழ்வியலோடு வானொலி எவ்வாறு பின்னிப் பிணைந்துள்ளது என்பதை உணர்ந்த தருணம் அது.
நீலகிரியின் மண்ணுக்கே உரித்தான பழங்குடியின மக்களின் கலைகளுக்கு இந்த நிலையம் மிகுந்த முக்கியத்துவம் அளிக்கிறது. 'மலைச்சாரலிலே' என்ற தலைப்பில் ஒலிபரப்பான பழங்குடியினர் இசை நிகழ்ச்சி, அதன்பின் 'மலையருவி' என்ற பெயரில் மாற்றம் பெற்றுத் தொடர்ந்து வருகிறது. இதில் தோடர், கோத்தர், முள்ளு குறும்பர், பனியர், காட்டு நாயக்கர் மற்றும் இருளர் போன்ற பழங்குடியினரின் கலாச்சாரப் பதிவுகள் ஆவணப்படுத்தப்படுகின்றன.
எம். அர்ஜுனன், கே. கம்பட்டன், வாசமல்லி போன்ற கலைஞர்கள் தங்களது பங்களிப்பை வழங்கியுள்ளனர். விவசாயம் மற்றும் உள்ளூர் விழாக்களைப் பிரதிபலிப்பதிலும் இந்த வானொலி நிலையம் முன்னணியில் உள்ளது. 1994 முதல் தொடங்கப்பட்ட 'பண்ணை இல்லம்' நிகழ்ச்சி, மலைத்தோட்டப் பயிர்கள் சாகுபடி குறித்த ஆலோசனைகளை வழங்கி வருகிறது. இது தவிர, ஊட்டியில் ஆண்டுதோறும் நடைபெறும் மலர்க்கண்காட்சி, குன்னூர் பழக்காட்சி மற்றும் உள்ளூர் கோயில் திருவிழாக்களைத் தத்ரூபமாக ஒலிப்பதிவு செய்து ஒலிபரப்பி வருகிறது. மேலும், மாதத்தின் முதல் மற்றும் மூன்றாம் வெள்ளிக்கிழமைகளில் தொலைபேசி வழியாக நேயர்களுடன் நேரடித் தொடர்பு நிகழ்ச்சிகளும் நடத்தப்படுகின்றன.
ஊட்டியின் பிங்கர் போஸ்ட் (அஞ்சல்) பகுதியில் அமைந்துள்ள இந்த வானொலி நிலையம், அன்று 187.2 MHz மற்றும் 1602 KHz ஆகிய அலைவரிசைகளில் தனது சேவையைச் செய்தது. தற்பொழுது 101.8 பண்பலை வரிசையில் ஒலிபரப்பு சேவை செய்து வருகிறது.
மலையக மக்களின் இன்ப துன்பங்களில் பங்கெடுத்து, அவர்களுக்கான தகவல்களை உடனுக்குடன் வழங்கி வரும் இந்த நிலையத்திற்குச் சென்றது, எங்களது சமுதாய வானொலி கருத்தரங்கின் மிக முக்கியமான அங்கமாக அமைந்தது. இந்த வரலாற்றுப் பதிவுகளை நேரில் கண்டு உணர்ந்தது எங்களுக்கு ஒரு கல்விசார் அனுபவமாக மட்டுமன்றி, ஒரு நெகிழ்ச்சியான தருணமாக மாற்றியதற்கு மீண்டும் ஒரு நன்றியை நிகழ்ச்சிப் பொறுப்பாளர் திரு.ராஜ்குமார் அவர்களுக்கு தெரிவிப்பதில் மகிழ்ச்சி அடைகிறோம்.
1950கள் மற்றும் 60களில், இந்திய துணைக்கண்டம் முழுவதும் அதிக இசை மற்றும் வணிக விளம்பரங்களுடன் வெற்றிக்கொடி நாட்டிய ஒரே ஒலிபரப்பு நிலையம், இன்றைய இலங்கை ஒலிபரப்புக் கூட்டுத்தாபனத்தின் முன்னோடியான 'ரேடியோ சிலோன்' தான். இன்று அதன் நூற்றாண்டுப் பெருமை பேசப்படும் நிலையில், அன்று அது எப்படி ஆசியாவின் மிகப்பெரிய வணிகச் சக்தியாகத் திகழ்ந்தது? அதன் தமிழ் மற்றும் இந்திச் சேவைகள் எவ்வாறு இந்தியர்களின் வாழ்க்கைப் பாணியில் இரண்டறக் கலந்தன என்பதை அதன் விளம்பர ஆவணத்தின் மூலம் ஆராய்வோம்.
சக்தி வாய்ந்த குரல்: வானொலிக் குடும்பத்தின் இன்பத்தமிழன்இங்குள்ள விளம்பர ஆவணம், 'ரேடியோ சிலோன்' என்ற புகழ்பெற்ற ஒலிபரப்பு நிறுவனத்தின் வணிகப் பிரிவை மிகத் தெளிவாகப் பறைசாற்றுகிறது. இந்த விளம்பரத்தின் தலைப்பே அதன் வலிமையை உணர்த்துகிறது: “விரல் நுனியில் இன்பம்! ரேடியோ சிலோன்” (ENTERTAINMENT AT YOUR FINGER TIPS! RADIO CEYLON). குடும்பத்திற்கான கேளிக்கையில், குறிப்பாக இசை மற்றும் பொழுதுபோக்கில், ரேடியோ சிலோனைத் தாண்டி எதுவும் இல்லை என்று அந்த விளம்பரம் அடித்துச் சொல்கிறது. அதன் விவரிக்க முடியாத சக்தியுடனும், தெளிவுடனும் ஆங்கிலம், இந்தி, மற்றும் தமிழில் ஒலிபரப்பப்படும் அதன் நிகழ்ச்சிகள், அனைத்து நிலையங்களுக்கும் மேலாக உச்சத்தில் நிற்கின்றன என்றும் கூறப்பட்டுள்ளது.
இது ரேடியோ சிலோனின் வணிக ஒலிபரப்புச் சேவையின் விளம்பரத் துண்டுப்பிரசுரம் ஆகும். இந்தக் காலகட்டத்தில், தெற்காசியாவின் வர்த்தக உலகம் தங்கள் தயாரிப்புகளைச் சந்தைப்படுத்த இந்த வானொலியை நம்பியிருந்தது. விளம்பரதாரர்கள் தங்கள் பொருட்கள் மற்றும் சேவைகளுக்கான ஏற்றுமதிச் சந்தைகளுடன் தொடர்புகொள்ள இது ஒரு முக்கிய இடமாகக் கருதப்பட்டது. விளம்பரத் தொடர்புகளுக்காக பம்பாயில் (மும்பை) உள்ள செசில் கோர்ட் (Cecil Court, Bombay 1) மற்றும் சென்னையில் உள்ள 36வது ஃபிய்த் டிரஸ்ட் கிராஸ் தெரு (36 Fifth Trust Cross Street, Madras . 600028) ஆகிய இடங்களில் முகவர்களின் முகவரிகள் கொடுக்கப்பட்டிருப்பதில் இருந்தே, இந்தியா முழுவதும் இதன் ஆதிக்கம் எவ்வளவு இருந்தது என்பதைப் புரிந்துகொள்ளலாம்.
இந்த விளம்பரத்தில் கொடுக்கப்பட்டுள்ள விரிவான நிகழ்ச்சி நிரல்கள், ரேடியோ சிலோன் எவ்வளவு பெரிய ஒரு பன்மொழிச் சேவை என்பதைத் தெளிவுபடுத்துகிறது. தமிழ் ஒலிபரப்பு, திங்கள் முதல் வெள்ளி வரை மாலை 5:00 மணி முதல் 7:00 மணி வரை (1700 முதல் 1900 மணி வரை) மற்றும் வார இறுதி நாட்களில் சனிக்கிழமை மற்றும் ஞாயிற்றுக்கிழமைகளிலும் ஒலிபரப்பானது. இந்த நேரத்தில், இந்தியத் திரைப்படப் பாடல்களும், விளம்பரங்களும் ஒலிபரப்பப்பட்டன. இந்த சேவை சிற்றலைவரிசை 11800 KHz (25 மீ) மற்றும் 6075 KHz (49 மீ) போன்ற அலைவரிசைகளில் பரப்பப்பட்டது.
இந்தி ஒலிபரப்புதான் மிகவும் ஆதிக்கம் செலுத்தும் சேவையாக இருந்தது. திங்கள் முதல் சனிக்கிழமை வரை காலை 6:00 மணி முதல் இரவு 10:00 மணி வரை (0600 முதல் 2300 மணி வரை) பல்வேறு அலைவரிசைகளில் நீண்ட நேரம் ஒலிபரப்பானது. ஞாயிற்றுக்கிழமைகளில் கூட, காலை 6:00 மணி முதல் நள்ளிரவு 12:00 மணி வரை (0600 முதல் 2300 மணி வரை) இந்தி சேவை இயங்கியது. இந்திச் சேவைக்காக பல பிரத்யேக அலைவரிசைகள் ஒதுக்கப்பட்டன.
தென்னிந்திய மொழிகளான மலையாளம், தெலுங்கு மற்றும் கன்னடத்திற்குக் கூட முறையான ஒலிபரப்பு நேரம் இருந்தது. மலையாளம் திங்கள் முதல் வெள்ளி வரை மாலை 4:00 மணி முதல் 4:30 மணி வரை (1600-1630) ஒலிபரப்பானது. தெலுங்கு மற்றும் கன்னட ஒலிபரப்புகளும் வார நாட்களில் ஆசிய சேவையில் இடம்பெற்றன.
1950கள் மற்றும் 60களில், இந்திய அரசாங்கத்தின் அகில இந்திய வானொலி, வணிக விளம்பரங்களை ஒலிபரப்பத் தயங்கியது. இந்த வெற்றிடத்தை சரியாகப் பயன்படுத்திக் கொண்ட ரேடியோ சிலோன், அதன் சக்திவாய்ந்த மத்திய அலைகள் மற்றும் சிற்றலை மூலமாக, இந்தியச் சந்தையை இலக்கு வைத்து வணிக விளம்பரங்களை ஒலிபரப்பியது. விமல் காஷ்யப், கோபால் சர்மா போன்ற அறிவிப்பாளர்கள் மூலம் ஒலிபரப்பப்பட்ட 'பாமாலாய்' போன்ற இந்தி நிகழ்ச்சிகளும், தமிழிலும் ஒலிபரப்பான திரை இசை நிகழ்ச்சிகளும் இந்திய ரசிகர்களின் இல்லங்களின் தினசரி அங்கமாயின. இந்தியாவின் ஹமாம் சோப், பினாகா டூத் பேஸ்ட் போன்ற பொருட்களின் விளம்பரங்கள் ரேடியோ சிலோன் மூலமாகவே இந்திய மக்களைச் சென்றடைந்தன.
இந்த விளம்பர ஆவணம், ஒரு தொலைதூரத் தீவில் இருந்து புறப்பட்ட குரல் எப்படி இந்தியத் துணைக்கண்டத்தின் கலாச்சாரத்தையும், நுகர்வோர் பழக்கவழக்கங்களையும் மாற்றியமைத்தது என்பதற்கான சான்றாகத் திகழ்கிறது. இன்று இலங்கை ஒலிபரப்புக் கூட்டுத்தாபனம் தனது நூற்றாண்டுப் பெருமையை நோக்கி அடியெடுத்து வைக்கும்போது, இந்த வணிக ஒலிபரப்புச் சேவையின் வரலாறு என்றும் மறக்க முடியாத, இசை மற்றும் விளம்பரங்களால் நிரம்பிய ஒரு பொற்காலமாகப் பொறிக்கப்பட்டுள்ளது.
நூற்றாண்டு காணும் இலங்கை வானொலி: சிறப்பு கட்டுரைத் தொடர் -3
இரண்டாம் உலகப் போர் உச்சத்தில் இருந்த காலம். இலங்கையில் (அன்றைய சிலோன்) இயங்கி வந்த ஒலிபரப்பு நிலையத்தில் எதிர்பாராத விதமாகக் காலியான தமிழ் அறிவிப்பாளர் பணி, (1937) தமிழ்ப் பிரிவின் தேர்வில் இரண்டாவது இடத்தில் இருந்த திரு. எஸ். சிவபாதசுந்தரம் அவர்கள் அந்தப் பணியை நிரப்பும் வரை, திரு. எஸ். சரவணமுத்து அவர்கள் தமிழில் அறிவிப்புப் பணிகளை மேற்கொண்டார் என்கிறது இந்த நாளிதழ் செய்திக் குறிப்பு. எந்த ஆண்டு, எந்த நாளிதழில் இந்தத் தகவல் வெளியானது என்ற குறிப்பு கிடைக்கவில்லை.
திரு. எஸ். சரவணமுத்துவின் வானொலிச் சேவை இங்கு தனித்துவம் பெறுகிறது. அவர் ஏற்கெனவே கப்பல்-கரை வானொலி நிலையத்தில் அஞ்சல் மாஸ்டராகவும் (Postmaster), சிக்னலர் ஆகவும் (Signaller) பணிபுரிந்து வந்தார். அதாவது, கடல் வழியே பயணிக்கும் கப்பல்களுக்கும் கரைக்கும் இடையே தகவல் தொடர்பு சமிக்ஞைகளை அனுப்பும் பணியில் அவர் ஈடுபட்டிருந்தார். இந்தக் கடமை மிக முக்கியமானது; போர் காலங்களில் பாதுகாப்பு மற்றும் மீட்புப் பணிகளுக்கு இது அத்தியாவசியமானது.
அப்படிப்பட்ட முக்கியப் பணியில் இருந்தபோதிலும், இலங்கைத் தமிழ்ச் சேவைக்கு ஏற்பட்ட இடையூறைக் களைய அவர் உதவினார். ஒருபுறம் கப்பல் போக்குவரத்துத் தகவல்களைக் கையாள்வது, மறுபுறம் இலங்கை வானொலியில் தமிழில் அறிவிப்புச் செய்வது என அவர் இரு அத்தியாவசியப் பணிகளைத் திறம்படச் செய்தார். இது, போர் காலத்தில் நாட்டுக்குச் சேவை செய்வதில் தனிநபர்கள் காட்டிய அசாத்திய ஈடுபாட்டையும், பன்முகத் திறமையையும் காட்டுகிறது.
இந்தச் சம்பவம், இலங்கை ஒலிபரப்பின் ஆரம்ப நாட்களிலிருந்தே தமிழ்ப் பிரிவுக்குக் கொடுக்கப்பட்ட முக்கியத்துவத்தை வெளிப்படுத்துகிறது. 1937 ஆம் ஆண்டு தமிழ்ப் பிரிவுக்கு நடைபெற்ற ஆரம்பகாலத் தேர்வுகளின் ஆவணமாகவும் இக்குறிப்பு உள்ளது. திரு. எஸ். நடராசா அவர்களைத் தேர்ந்தெடுக்கும்போது இரண்டாவது இடத்தில் இருந்தவர் திரு. எஸ். சிவபாதசுந்தரம். அவர் 1937 ஆம் ஆண்டு டிசம்பர் மாதம் முதல் இந்தப் பணியில் இணைந்திருக்கக்கூடும் எனத் தெரிகிறது.
1942 மே மாதத்தில் திரு. எஸ். நடராசாவின் சேவை நிறுத்தப்பட்டு, தற்காலிகமாக திரு. சரவணமுத்து அறிவிப்பாளராகப் பணியாற்றிய கால இடைவெளிக்குப் பிறகு, திரு. எஸ். சிவபாதசுந்தரம் நிரந்தர அறிவிப்பாளராகப் பணியமர்த்தப்பட்டது, ஒலிபரப்பு நிலையத்தில் தமிழ்ப் பிரிவின் தொடர்ச்சியையும், அதில் உள்ளூர் திறமைகளுக்குக் கொடுக்கப்பட்ட மதிப்பையும் நிரூபிக்கிறது. பிற்காலத்தில் இதே திரு.எஸ்.சிவபாதசுந்தரம் அவர்கள் தான் பிபிசி தமிழோசைக்கு பெயரும் வைத்து சிறப்பான ஒலிபரப்பையும் லண்டனில் இருந்து மேற்கொண்டார் என்பது இங்கு குறிப்பிடத்தக்கது.
இன்று இலங்கை ஒலிபரப்புக் கூட்டுத்தாபனம் (SLBC) தனது நூற்றாண்டு விழாவை நோக்கி நகரும் வேளையில், 1940களின் இந்தக் குறிப்பு ஓர் அரிய காலச் சான்றாக அமைகிறது. இது வெறும் பணி மாற்றம் பற்றிய செய்தி மட்டுமல்ல; இது, போர்ச் சூழலின் மத்தியிலும், அறிவிப்பாளர் இல்லாவிட்டாலும், பொதுமக்களுக்கான தமிழ்த் தகவல்கள் தடைபடக்கூடாது என்பதில் இலங்கை அரசாங்கம் (அன்றைய காலனித்துவ அரசு) காட்டிய அக்கறையை உணர்த்துகிறது.
திரு. எஸ். சரவணமுத்து போன்ற பல தேசபக்தர்கள், தங்கள் அதிகாரபூர்வப் பணிகளுக்கு அப்பால், மொழி மற்றும் மக்கள் சேவைக்காகத் தற்காலிகமாகப் பொறுப்புகளை ஏற்றுக்கொண்டு, ஒரு சமூகத்தின் தகவல் தொடர்பைத் தடையின்றிப் பேணியுள்ளனர். கப்பல்-கரை வானொலி நிலையத்தின் சிக்னலர், ஸ்டுடியோவுக்குள் வந்து தமிழை ஒலிபரப்பிய அந்தக் குறுகிய காலமே, இலங்கை ஒலிபரப்பு வரலாற்றின் தனித்துவமான, அர்ப்பணிப்பு நிறைந்ததோர் அத்தியாயமாகும்.
இலங்கை ஒலிபரப்புக் கூட்டுத்தாபனத்தின் வரலாறு என்பது ஒரு சாதாரண பயணமல்ல; அது ஒரு சகாப்தம். இங்கிலாந்தில் பிபிசி வானொலி ஆரம்பிக்கப்பட்டு மூன்றாண்டுகள் மட்டுமே கடந்த நிலையில், 1922 ஆம் ஆண்டிலேயே இலங்கையில் தந்தித் திணைக்களத்தால் சோதனை முறையில் ஒலிபரப்பு தொடங்கப்பட்டு, 1925 டிசம்பர் 16 ஆம் தேதி கொழும்பு வானொலி என்ற பெயரில் முறையான ஒலிபரப்பு சேவை ஆரம்பித்தது. இதன் மூலம், ஆசியக் கண்டத்திலேயே முதலாவது வானொலி ஒலிபரப்பு நிலையமாக இலங்கை மாறியது.
அந்த ஆரம்ப நாட்களில், இந்த வானொலி வெறும் செய்திகளையும், கல்வி நிகழ்ச்சிகளையும் மட்டும் வழங்கவில்லை; அது தமிழக மக்களின் இதயத்துடிப்பாக மாறியது. 1953 அக்டோபர் 4 ஆம் தேதி தென்னிந்திய நேயர்களுக்காகவே ஒரு மணி நேர தமிழ் நிகழ்ச்சியைச் சிற்றலையில் தொடங்கி, அதன் தமிழ் சேவை தென்னிந்திய நேயர்களுக்காகத் தனிச்சேவைகளையும் நடத்தியது
1960கள் முதல் 80கள் வரையிலான காலத்தில், இலங்கை வானொலி, குறிப்பாக அதன் வர்த்தகச் சேவை, தென்னிந்தியாவின் பட்டிதொட்டிகள் வரை பரவியிருந்தது. அப்போது இந்திய வானொலி சினிமாப் பாடல்களைக் குறைவாக ஒலிபரப்பியதால், முழுநேரமும் திரைப்படப் பாடல்களையும், மனதைக் கவரும் நிகழ்ச்சிகளையும் ஒலிபரப்பிய இலங்கை வானொலியின் நேயர்களாக தமிழக மக்கள் மாறினர். தமிழகத்தின் பெரும்பாலான ஓட்டல்களிலும், வீடுகளிலும் ஒலித்தது இலங்கை வானொலியின் குரல்தான். தமிழ் திரைப்படவுலகம் கூட, தங்கள் திரைப்படங்களின் வியாபாரத்தை விரிவுபடுத்த இலங்கை வானொலியின் விளம்பரங்களையே நம்பி இருந்தது.
இலங்கை வானொலியின் இந்த அதீத வெற்றிக்கு மிக முக்கியக் காரணம், அதன் அறிவிப்பாளர்கள். குரல்களின் அழகியலும், அறிவிப்பின் நேர்த்தியும் தமிழ் ஒலிபரப்புக் கலையின் இலக்கணமாக அமைந்தது. 'உங்கள் நண்பன் கே.எஸ். ராஜா'வின் குரலுக்கும், 'வீட்டுக்கு வீடு வானொலிப் பெட்டிக்கருகே ஆவலுடன் குழுமியிருக்கும் பெருமக்கள் அனைவருக்கும்...' என்ற அவரது வாசகத்திற்கும் இருந்த மதிப்பே தனி. கணிதம் மற்றும் வேதியியலில் பட்டதாரியான கே.எஸ். ராஜா, தனது தனித்துவமான குரலால் ஒரு சூப்பர் ஸ்டார் அறிவிப்பாளராகத் திகழ்ந்தார்.
அவரைப் போலவே, தமிழ் அறிவிப்பு வரலாற்றின் முன்னோடியாகக் கருதப்பட்ட சோ. நடராசன், 'ஒலிபரப்புக் கலை' என்ற நூலை எழுதிய சோ. சிவபாதசுந்தரம், மூத்த அறிவிப்பாளர்களான எஸ்.பி. மயில்வாகனன் (தமிழ்ச் சேவையின் பிதாமகர்), வீ. சுந்தரலிங்கம், ராஜேஸ்வரி சண்முகம், புவனலோஜினி துரைராஜசிங்கம், அப்துல் ஹமீத், மற்றும் நடராஜ சிவம் போன்றோரின் குரல்கள் பல லட்சக்கணக்கான ரசிகர்களின் வாழ்க்கையோடு கலந்துவிட்டவை. இந்தக் குரல்கள் மக்களின் கற்பனைக்கு ஒரு சுதந்திரத்தை வழங்கின; தொலைக்காட்சி நிகழ்ச்சிகள் போல அல்லாமல், ஒரு ரசனை உணர்வை மேம்படுத்தின.
இலங்கை ஒலிபரப்புக் கூட்டுத்தாபனம் என்ற பெயரில் 1967 ஜனவரி 5-ந் தேதி தொடங்கபட்டது. அதுவரை Radio Ceylon ஆக இருந்த நிறுவனம் இலங்கை அஞ்சல் துறைக்குக் (Post and Telecommunication Department) கீழ் இயங்கி வந்தது. அதனைப் பொது நிறுவனமாக்கி இலங்கை ஒலிபரப்புக் கூட்டுத்தாபனம் Ceyon Broadcasting Corporation (CBC) எனப் பெயர் வைத்தார்கள்.
பின்னர் 1972 ஆம் ஆண்டு மே மாதம் 22-ந் திகதி இலங்கை குடியரசாக பிரகடனப் படுத்தப்பட்ட போது சிங்களத்திலும் ஆங்கிலத்திலும் நாட்டின் பெயர் ஸ்ரீ லங்கா என மாற்றப்பட்டது. (ஆயினும் தமிழில் இலங்கை என்ற சொல்லே தொடர்ந்தது.)
அதனால் Ceyon Broadcasting Corporation (CBC) என்ற நிறுவனம் Sri Lanka Broadcasting Corporation (SLBC) என மாற்றப்பட்டது. தமிழில் இலங்கை ஒலிபரப்புக் கூட்டுத்தாபனம் என்ற பெயரே தொடர்ந்தது. (தகவல் உதவி: திரு.உமா காந்தன்)
1966 ஆம் ஆண்டின் பாராளுமன்றச் சட்டத்தின் கீழ் கூட்டுத்தாபனமாக மாறிய இந்த நிறுவனம், 1972 இல் இலங்கை குடியரசாக மாறியபோது, இலங்கை ஒலிபரப்புக் கூட்டுத்தாபனம் என்ற பெயரைப் பெற்றது. இன்று, அரசாங்கக் கொள்கைகளையும் அபிவிருத்தித் திட்டங்களையும் மக்களிடம் கொண்டு செல்வதிலும், சிங்களம், தமிழ், ஆங்கிலம் ஆகிய மும்மொழிகளிலும் சமநிலைவாய்ந்த தகவல்களைத் துரிதமாக வழங்குவதிலும் இது இலங்கையின் முன்னணி நிறுவனமாகச் செயல்படுகிறது.
1925 இல் தொடங்கிய இந்த அலைபரப்புச் சேவை, அதன் நூற்றாண்டு விழாவை நெருங்கி வரும் இந்த வேளையில், அதன் பழைய பெருமைகளும், தமிழ் அறிவிப்பாளர்களின் இனிமையான குரல்களும், இன்றும் நம் நினைவில் நீங்காத இடம்பிடித்துள்ளன. இந்த வானொலிக் காலம், இன்றைய 'எஃப்எம் வானொலி'கள் அளிக்கும் சலிப்பூட்டும் ஒலிகளுக்கு மத்தியில், உண்மையிலேயே மறக்க முடியாத ஒரு 'கனாக்காலமாக' நம் மனதைச் சிலிர்க்க வைக்கிறது.
