WRTH 2016

2016ஆம் ஆண்டுக்கான உலக வானொலி மற்றும் தொலைக்காட்சி கையேடு வெளிவந்துவிட்டது. ரூ.2400க்கு அமேசான் இணைய தளத்தினில் தற்பொழுது விற்பனைக்கு கிடைக்கிறது. உலகில் உள்ள அனைத்து நாடுகளின் பண்பலை, சிற்றலை, நெட்டலை மற்றும் மத்திய அலை வானொலிகளின் விபரங்கள் மட்டுமல்லாது தொலைக்காட்சிகளின் விபரங்களும் இதில் அடக்கம். ஒவ்வொரு ஊடகவியளாளர் கையிலும் இருக்க வேண்டிய முக்கியமான கலைக்களஞ்சியம் இதுவாகும்.

புத்தகத்தை வாங்க

ஹாம் வானொலி இருந்திருந்தால்…

கடந்த மூன்று நாட்களாக சென்னையில் யாரும் யாருடனும் தொலைப்பேசி ஊடாகத் தொடர்பு கொள்ள முடியவில்லை. 24 மணி நேரமும் 3ஜி மற்றும் 4ஜியில் நொடிக்கு நொடி அப்டேட் வழங்கிய ஜீவன்கள் எல்லாம் போன இடம் தெரியவில்லை. பாவம் இப்பொழுது என்ன செய்து கொண்டு இருக்கின்றார்களோ! சென்னையில், முதலில் அனைத்து பகுதிகளிலும் தண்ணீர் குறைந்த அளவுதான் வந்தது. தெருக்களில் படிப்படியாக தண்ணீர் உயந்தபடி இருந்தது. ஒரு கட்டத்தில் மின்சாரம் துண்டிக்கப்பட்டது. ஒரு மணி நேரத்தில் மின்சாரம் வந்துவிடும் என்ற எண்ணத்தில் தான் அனைவரும் இருந்தனர். அதனால் மொபைல் போனை வழக்கம் போல் பயன்படுத்தி வந்தனர். இரவு முழுவதும் மின்சாரம் வந்தபாடு இல்லை. அதன் பின் தான் நிறைய பேருக்கு விபரீதம் புரிய ஆரம்பித்தது. காரணம் போனின் பேட்டரி ட்ரை ஆகிவிட்டது. அடுத்து சார்ஜ் செய்ய வேண்டும். ஒரு சிலர் கைவசம் வைத்திருந்த பவர் பேங்க் மூலம் சார்ஜ் செய்து கொண்டனர். ஒரு கட்டத்தில் அதுவும் கரைந்தது.

ஒரு சிலர் தங்கள் வீட்டில் இன்வெட்டர் இருந்ததால் அடுத்த ஒரு நாளுக்கு பயமின்றி இருந்தனர். அதுவும் காலியானதும் மீண்டும் பயம் தொற்றிக் கொண்டது. இப்பொழுது போன் பேச பேட்டரி இல்லை. நண்பர்களையும் உறவினர்களையும் தொடர்பு கொள்ள முடியவில்லை, முதலில் இதனால் பெரிய சிரமம் ஒன்றும் இல்லை. ஆனால் ஒரு கட்டத்தில் பத்திரிகை செய்திகளில் வெள்ளத்தின் விபரங்கள் படத்துடன் வெளியாகத் தொடங்கியவுடன் நண்பர்களையும் உறவினர்களையும் அழைத்து விசாரிக்க எண்ணிய போது தான் விபரீதம் புரிந்தது. தாங்கள் அனைவரும் வெள்ள நீரால் சூழப்பட்டது மட்டுமல்லாமல் தொலைதொடர்பு வசதிகள் இல்லாததால் தங்களின் நிலைமையை நண்பர்களுக்கும் சொல்ல முடியாத நிலைக்குத் தள்ளப்பட்டது.

இதனால் யாருக்கு என்ன நடந்தது, யார் யார் பாதுகாப்பாக உள்ளனர் என்ற கவலை ஏற்படத் தொடங்கியது. ஐ.டி துறையினர் பலரும் தன் சொந்த ஊர்களில் இருந்து இங்கு வந்து வேலை செய்கின்றனர். அவர்கள் அனைவருக்கும் இதே நிலைமை. ஒரு சில ஐ.டி. நிறுவனங்கள் தங்கள் பணியாளர்களை மழைக்காரணமாக அலுவலகத்திலேயே தங்கச் சொன்னது. மழை வடிந்துவிடும் என்ற நம்பிக்கையில் தங்கியவர்கள் அனைவரும் மாட்டிக்கொண்டனர். ஒரு கட்டத்தில் அங்கும் மின்சாரம் துண்டிக்கப்பட்டது. ஜெனரேட்டர்கள் டீசல் இருக்கும் வரை ஓடியது. அதுவும் தீர்ந்தவுடன் முற்றிலும் மின்சாரம் துண்டிக்கப்பட்டது. அது வரை வாட்ஸ் அப்பிலும், பேஸ் புக்கிலும் அப்டேட் கொடுத்தவர்கள் காணாமல் போயினர். நிமிடத்திற்கு ஒரு முறை செல்போனை பார்த்தவர்கள் பித்து பிடித்தவர்கள் போல் ஆயினர். தங்களது நண்பர்களிடமும், அலுவலக டீம் லீடர்களிடமும் எரிந்து விழுந்தனர். யாருக்குத் தான் கோபம் வராது, தங்கள் குடும்பத்தினரைத் தொடர்பு கொள்ள முடியாமல் இவர்கள் அலுவலகத்தில் இருக்க, குடும்பத்தினர் அவர்களைத் தொடர்புகொள்ள முடியாமல் வருந்தினர். இரு தரப்பும் குழப்பத்தில் ஆழ்ந்தது. யாரும் வெளியிலும் செல்ல முடியாது, தகவல் தொடர்பும் இல்லை, என்ன செய்வது என்று நிர்வாகமும் ஒரே நேரத்தில் குழம்பித்தான் போனது.

எனக்குத் தெரிந்து எந்த அலுவலகத்திலும் வானொலிப் பெட்டிகள் இருந்ததாக பார்த்தது இல்லை. வானொலிப் பெட்டிகள் இருந்திருந்தால் மழை பாதித்த அந்த நேரங்களில் பேட்டரியில் இயங்க வைத்து வெளியில் என்ன நிலவரம் என்பதையாவது அறிந்து இருக்கலாம். எப்பொழுது வானொலியின் மகத்துவத்தை பற்றி நண்பர்களுடன் பேசினாலும் கேளிக்கு உள்ளாகுபவனாக நான் இருந்துள்ளேன். இன்று வானொலி இருந்திருந்தால்!  என்ற ஏக்கத்தில் இருந்தவர்களை அந்த நேரத்தில் பார்க்க முடிந்தது. அதற்கு காரணம் அந்த அலுவலகத்தில் இருந்த ஒரு சில நண்பர்கள் பண்பலை வானொலிகளைத் தொடர்ந்து கேட்டதன் பயனாகவே நகரில் என்ன நடக்கிறது என்று அறிந்து தனது சக நண்பர்களுடன் பகிர்ந்து கொண்டனர். அப்பொழுது அவர்கள் தான் அங்கு ஹீரோவாக பார்க்கப்பட்டனர். எனக்குத் தொரிந்து கிரிக்கெட் ஸ்கோருக்காக அலைந்தவர்கள் ஒரு காலத்தில் உண்டு.

கடந்த ஒரு வாரகாலமாக சென்னை மக்கள் வெள்ளத்தால் பெரிதும் அவதிப்பட்டு வருவதை நாம் அறிவோம். நகர் முழுவதும் வெள்ளக்காடாக இருக்கிறது. காங்கிரீட் காடுகள் வெள்ளத்தில் மிதக்கிறது. வெளியே எங்கும் செல்ல முடியவில்லை. மின்சாரம் இல்லை. அத்தியாவசியப் பொருட்களும் கிடைப்பதில் பெரும் தட்டுப்பாடு. தொலைத்தொடர்பு சாதனங்கள் அனைத்தும் செயல் இழந்துவிட்டன. இப்படியான சூழலுக்கு உகந்தது வானொலி மட்டுமே. காரணம் இதற்கு குறைந்த சக்தி மின்சாரம் இருந்தால் போதுமானது. இன்றைய தொழில்நுட்ப உலகத்தில் டைனமோ வானொலிப் பெட்டிகள் எல்லாம் மார்கெட்டில் கிடைக்கிறது. பத்து முறை சுற்றினால் பேட்டரி சார்ஜ் ஆகி இரண்டு மணி நேரம் பாடும். ஆனால் நாம் அதனை மறந்து விட்டோமே!

எனக்கு 75 வயது மதிக்கதக்க ஒரு வானொலி நண்பர் உள்ளார். அவர் தனக்கு எப்பொழுதெல்லாம் நேரம் கிடைக்கிறதோ, அப்பொழுதொல்லாம் வானொலியைக் கேட்டுக்கொண்டே இருப்பார். ஒரு சில நேரங்களில் தான் வேலை செய்துகொண்டு இருக்கும்போது கூட வானொலிப் பெட்டி ஒலித்துக்கொண்டே இருக்கும். அவர் இருப்பது வெள்ளம் அதிகம் பாதித்த தாம்பரம் பகுதியில். தனியொருவராக தங்கியுள்ளார். இந்த வெள்ளத்தில் என்ன ஆனரோ என்று தொடர்ந்து நான்கு நாட்கள் முயன்று ஐந்தாவது நாள் தான் அவரைப் பிடிக்க முடிந்தது. எப்படி இருக்கிறாரோ என்று பயந்த எனக்கு அவர் கூலாகச் சொன்னார் வானொலி கேட்டுக்கொண்டு இருப்பதாக. நகரமே நீரில் மூழ்கிக் கொண்டு இருக்கிறது நீங்கள் வானொலி கேட்டுக் கொண்டு இருக்கிறீர்களே என்றேன். அதற்கு அவர் கூறினார், இதைத்தான் அவர்கள் வானொலியில் தொடர்ந்து அறிவித்து வந்தனரே! 

இதில் என்ன ஆச்சர்யம் என்றார். அகில இந்திய வானொலியில் வானிலை அறிக்கையைத் தொடர்ந்து கேட்டதன் பயனாக தனக்கு ஒரு வாரத்திற்கு தேவையான பொருட்களை எல்லாம் வாங்கி ஸ்டாக் வைத்துக் கொண்டார். அப்படியிருக்க அவர் ஏன் இந்த பேய் மழைக்கெல்லாம் பயப்பட வேண்டும். அவர் கடைசியில் கூறியது என்னை அதிர்ச்சிக்குள்ளாக்கியது. நான் பயந்தது எல்லாம் உங்களை நினைத்துத் தான்!! இன்றைய தலைமுறை தான் வானொலியை ஒரு பொருட்டாகவே மதிக்கவில்லையே. அனைவரின் கையிலும் ஸ்மார்ட் போன்கள் மட்டுமே கூத்தாடுகின்றன. என்ன சொல்ல என்று ஆதங்கப்பட்டுக் கொண்டார். சமீபத்தில் நான் அவருக்கு ஒரு ஸ்மார்ட் போன் வாங்கிக் கொடுத்திருந்தேன். ஆனால் அது ஒரே வாரத்தில் மூலைக்கு சென்றுவிட்டது ஒன்றும் இப்பொழுது ஆச்சரியமாகப் படவில்லை.

இன்னும் ஒரு நண்பர் ஊரபாக்கத்திற்கு அருகில் உள்ளார். அவரும் வானொலிப் பிரியர். இலங்கை வானொலி என்றால் அவருக்கு உயிர். எனக்கும் தான். வானொலி நேயர்களுக்காக என்றே ஒரு இதழை ‘தமிழ் ஒலி’ என்றப் பெயரில் நடத்தினார். நானும் ‘சர்வதேச வானொலி’ என்ற இதழை நடத்தி வருபவன் தான். அவரது பகுதியிலும் ஐந்து நாட்களாக மின்சாரம் இல்லை. அவருக்கும் கடந்த நான்கு நாட்களாக உற்றத் துணைவன் அவரின் கையடக்க வானொலிப் பெட்டிதான். ஊரே பயந்து நடுங்கிக்கொண்டு இருக்கிறது. இவரோ கூலாக வானொலிக் கேட்டுக்கொண்டு இருக்கிறார். அதுவும் அவரது வீட்டிற்கு அருகில் உள்ள ஏரிக்கரையில் அமர்ந்தவாறு.

இந்தக் கட்டுரையை படிக்கும் நீங்கள் யாராவது மனம் மாறி ஒரு வானொலிப் பெட்டியை வீட்டில் இனிமேலாவது வாங்கி வைத்துக்கொள்ளலாம் எனத் தேடினால் உங்களுக்கு வானொலிப் பெட்டிகள் கிடைப்பது கடினமே! காரணம் நாம் தான் வானொலிப் பெட்டிகளை வாங்காமல் உற்பத்தியாளர்களை ஓட ஓட விரட்டிவிட்டோமே?!

வானொலி பெட்டியைப் பற்றி பேசும் போது இன்னும் ஒன்று எனக்கு நினைவுக்கு வருகிறது. நம்மில் எத்தனை பேருக்கு ஹாம் அல்லது அமெச்சூர் வானொலிகளைப் பற்றித் தெரியும். போலீசாரின் கைகளில் உள்ள வயர்லெஸ் வாக்கி டாக்கிக்களைப் பார்த்து இருப்பீர்கள். அதனை வாக்கி டாக்கி என்று கூறுவதேத் தவறு. வாக்கி டாக்கி என்பது நகரின் பெரிய மால்களிலும் தியேட்டர்களிலும் உள்ள பணியாளர்கள் பயன்படுத்துவார்களே, அதனைத் தான் வாக்கி டாக்கி என்பர். போலீஸ் வைத்திருப்பது வயர்லெஸ் வானொலிகள். வாக்கி டாக்கி என்பவை 500 முதல் ஒரு கிலோ மீட்டர் சுற்றளவு மட்டுமே தனது சக்தியைப் பொருத்து எடுக்கும் திறன் கொண்டது. ஆனால் போலீஸார் வைத்திருப்பது ஐந்து முதல் பத்து கிலோ மீட்டர் சுற்றளவுக்கு எடுக்கக் கூடியது. இன்னும் ரிப்பீட்டர்கள் கிடைத்தால் 50 முதல் 100 கி.மீ வரை கூடத் தொடர்பு கொள்ளலாம்.

சரி, அதனை எதற்கு இங்கு சொல்கிறேன் என்று கேட்பவர்களுகு ஒரு தகவல். போலீஸ் வைத்திருக்கும் அதேப் போன்ற கருவியை நீங்களும் வைத்துக் கொள்ள அரசு அனுமதி அளிக்கிறது. நான் வைத்துள்ளேன்! எனது அடையாளக் குறியீடு VU2UOM. எப்படி எனக் கேட்பவர்களுக்கு ஒருத் தகவல். எப்படி போலீஸ் வைத்துள்ள துப்பாக்கியை நாமும் லைசென்ஸ் வாங்கி வைத்துள்ளோம், அது போன்றே இதற்கும் லைசென்ஸ் வாங்கி பொதுமக்களும் வைத்துக்கொண்டு பேசலாம். யாருடன் பேச!? உலகம் முழுவதும் நம்மைப் போல் உரிமம் வாங்கி வைத்துள்ள அனைவருடனும்.

உரிமம் வாங்கி பயன்படுத்துபவர்ளைத் தான் நாம் ஹாம் வானொலி உபயோகிப்பாளர்கள் என்கிறோம். இது போன்ற ஆபத்து காலங்களில் இந்த ஹாம் வானொலி தான் தகவல் தொடர்புக்கு உலகெங்கும் கைக் கொடுத்தது, கொடுத்தும் வருகிறது. தொடர்ந்து சுனாமியும், நில நடுக்கமும் வரும் ஜப்பானில் தான் உலகிலேயே அதிக ஹாம் வானொலி உபயோகிப்பாளர்கள் உள்ளனர். ஹாம் வானொலியைப் பயன்படுத்த எந்த ஒரு செல் போன் டவர்களும் தேவையில். மின்சாரமும் குறைந்த அளவேத் தேவை. எங்கே இருக்கிறோமோ அந்த நொடியில் அங்கு இருந்து உலகம் முழுவதும் தொடர்பு கொள்ள முடியும். மாதம் ஆனதும் சர்வதேச அழைப்புகளுக்கு பில் தொகை எகிருமே என்ற கவலையும் வேண்டாம்.

ஆனால் யார் இந்த ஹாம் வானொலியைக் கண்டுகொள்கின்றனர். நானும் பல நண்பர்களுக்கு இந்த ஹாம் வானொலிப் பற்றி எடுத்துக் கூறியுள்ளேன். ஆனால் அவர்கள் அனைவரும் ஒரு சேர என்னிடம் கூறியது ஒன்றுதான். “ஸ்மார்ட் போன் காலத்தில என்ன பேசரீங்க நீங்க” என்று கூறி என் வாயை ஒரு சேர அடைப்பதுடன் ஒரு ஏளனப் புன்னகை வேறு. புன்னகைப் புரிந்தவர்களின் நிலை இன்று அதோ கதி தான். நான் ஒரு இதழியல் பேராசிரியர் என்ற வகையில் எங்கள் சென்னைப் பல்கலைக்கழக மாணவர்களுக்கு முதலில் கூறுவது இதைத்தான். ஜர்னலிஸ்ட் ஒவ்வொருவரும் கண்டிப்பாக ஹாம் தேர்வினை எழுதி லைசென்ஸ் பெற்றுக் கொள்ள வேண்டும் என்பதே!

கடந்த ஒரு சில நாட்களாக நான் எனது ஊடக நண்பர்களை பல்வேறு வகைகளிலும் தொடர்புகொள்ள முயன்றேன். ஆனால் அவர்கள் எல்லோறும் தொடர்பு எல்லைக்கு வெளியேயே இருந்தனர். எனக்கு மட்டுமல்ல அவர்கள் பணி புரியும் அவர்களின் ஊடகங்களுக்கும் அவர்களைப் பிடிக்க முடியவில்லை. காரணம் நான்கு நாட்களாக மின்சாரம் இல்லாததால் மொபைலை சார்ஜ் செய்ய முடியவில்லை. அப்படியே சார்ஜ் செய்தாலும் செல் போன் நிறுவனங்களின் டவர்கள் வேலை செய்யவில்லை. எப்படித் தொடர்பு கொள்வது?

எனக்குத் தெரிந்து சென்னையில் உள்ள எந்த ஊடகமும் ஹாம் வானொலிப் பிரிவைத் தன்னகத்தே கொண்டதாகத் தெரியவில்லை. எனக்கு தெரிந்த ஒரு ஊடக நண்பர் ஒரு சில முக்கியத் தகவல்களை ஹாம் வானொலித் துணைக் கொண்டு என்னிடம் பெற்றுத் தருமாறு கூறினார். இதுவே அவர்களுக்கு இந்த ஹாம் வானொலிப் பெட்டிகள் இருந்திருந்தால்! இனிமேலாவது அனைத்து ஊடக நண்பர்களும் ஹாம் வானொலித் தேர்வினை எழுதி ஒவ்வொருவரும் தங்களின் வீட்டில் ஒரு வயர்லெஸ் கருவியை வைத்துக் கொள்வோம். ஊடக நண்பர்கள் மட்டுமல்லாமல் எட்டாம் வகுப்புத் தேர்வான அனைவரும் ஹாம் வானொலித் தேர்வினை எழுதத் தகுதி வாய்ந்தவர்கள். தேர்வுக்கு தயாரிக்க சென்னையிலேயே பல தன்னார்வ ஹாம் கிளப்புகள் உள்ளன. சென்னைப் பல்கலைக்கழகத்தின் இதழியல் துறையும் கற்றுக் கொள்ள ஆர்வமுள்ள ஊடக நண்பர்களுக்கு இலவச பயிற்சியை வழங்கத் தயாராக உள்ளது.

ஹாம் வானொலி நண்பர்களின் சேவை சென்னை மழையின் போது அளப்பரியது. சென்னையில் உள்ள உரிமம் பெற்ற ஹாம்கள் எல்லாம் ஒன்றிணைந்து தகவல் தொடர்பு முற்றிலும் துண்டித்த பகுதிகளுக்குச் சென்று அங்கே இருப்பவர்களுக்கு தேவையான உதவிகளைச் செய்தனர். இவர்களுக்கு யாரும் ஆனையிடவில்லை, எந்த அரசும் உதவியும் செய்யவில்லை. 

தன்னெழுச்சியாக இவர்களின் வயர்லெஸ் கருவிகளை எடுத்துக் கொண்டு களத்தில் இறங்கினர். கருவிகள் ஒன்றும் விலைக் குறைந்தவை அல்ல. ஆனாலும் மக்களின் துயர் துடைக்க களத்தில் நின்றனர். நின்றுகொண்டு இருக்கின்றனர்.

இது போன்ற ஆபத்து காலங்களில் இன்று நேற்றல்ல, காலம் காலமாக எந்த ஒரு ஆர்பாட்டமும் இன்றி உதவி செய்வது இந்த ஹாம் வானொலி உபயோகிப்பாளர்கள் தான். இதற்கு முன் வந்த சுனாமியின் போதும் சரி, நேபாள பூகம்பத்தின் போதும் சரி, உலகின் பல நாடுகளிலும் உள்ள ஹாம்கள் இது போன்ற இயற்கை சீற்றங்களின் போது ஒன்றிணைந்து செயல்படுகின்றனர். அதனால் தான் என்னவோ இவர்கள் தங்களை “ஒரே உலகம், ஒரே மொழியினர்” (One World, One Language) என்று அழைத்துக் கொள்கின்றனர். இனிமேலாவது நாம் இந்த பாரம்பரிய ‘வானொலிப்’ பெட்டிகளையும், ஹாம் வானொலிகளையும் மறவாமல் இருப்போமாக!

- தி இந்து நாளிதழில் 8/12/2015 அன்று வெளியான கட்டுரையின் எடிட் செய்யாத முழு வடிவம்

சென்னையில் உள்ள எப்.எம் வானொலிகள்

FM radio's in Chennai

90.4 Anna FM (CCR)

91.1 Radio City 

91.2 Thendral FM (CR)

91.9 Fever FM 

92.7 Big FM 

93.5 Suryan FM 

94.3 Radio One 

98.3 Radio Mirchi 

100.5 AIR Vividh Bharati

101.4 AIR FM Rainbow

102.3 AIR FM Gold

104.8 Chennai Live 

105.6 Gyan Vani (inactive)

106.4 Radio Hello FM 

107.4 Loyola FM (CCR)

107.8 MOP FM (CCR)

(via vu2jos)

பேரிடர் வேளையில் வானொலி

சென்னை மழையில் உதவிய பழைய தொழில்நுட்பம் !

வடகிழக்கு பருவமழை காரணமாக இந்தாண்டு சென்னை கடும் மழை மற்றும் வெள்ளத்தால் பெரும் பாதிப்புக்குள்ளானது. இந்த நிலையை சற்றும் கண்டிராத, எதிர்பார்த்திடாத சென்னையில் தங்கியிருந்த மக்கள், தற்போது சொந்த ஊருக்கே சென்றுக் கொண்டிருக்கிறார்கள்.

ஏற்கனவே மழை வெள்ளத்தால் சிரமப்பட்ட சென்னை வாசிகளுக்கு கடந்த திங்கட்கிழமை (நவம்பர் 30) தொடங்கிய தொடர்மழை தான் பேராபத்தை தந்தது. பெருமழை தொடர்ந்து 2 நாட்கள் வெளுத்துக்கட்டியது. 

சென்னைக்குள் வெள்ளம் சூழ்ந்ததால், எல்லா புறமும் மக்களை நகர விடாமல் தவிக்கவிட்டது.

இன்று எட்டாவது நாள்.

சற்று மக்கள் மீண்டு வந்தாலும், உணவு இன்றி, தங்க இடமின்றி, உடுத்த உடையின்றி பெரும்பாலானோர் முகாம்களில் தங்க வைக்கப்பட்டுள்ளனர். ஏராளமானோர், சொந்த ஊருக்கு புறப்பட்டு சென்றுள்ளனர்.

பாதிக்கப்பட்டவர்களுக்கு நிவாரணப் பணிகள் தொடர்ந்து நடைபெற்று வருகிறது.

கடந்த வாரம், சென்னை மக்களின் அவதிக்கு மழை காரணமாக இருந்தாலும், தொலைத்தொடர்பும், போக்குவரத்தின்மையும் அவர்களை மேலும் துயரத்திற்கு ஆளாக்கியது.

ஆனால், இந்த பேரிடர் வேளையில் வானொலி நிறைய பேருக்கு ஆறுதல் அளித்ததாக சென்னைக்குள் இருந்தவர்கள் தெரிவிக்கின்றனர். அதாவது, எந்த பகுதியில் என்ன நடந்தது. எங்கு வெள்ளம் சூழ்ந்தது உள்ளிட்ட தகவல் அறிவிப்பாளர்கள் தெரிவித்தவண்ணம் இருந்தனர். மின்சாரம் இல்லாததால் தொலைக்காட்சி சேவையும் துண்டிக்கப்பட்டது. 

வெள்ளம் புகுந்ததால் சில தொலைக்காட்சி நிறுவனங்கள்  தற்காலிகமாக சேவையை நிறுத்தின.

சென்னைக்கு வெளியே, போக்குவரத்து துண்டிக்கப்பட்டதால், ஆங்காங்கே நெடுஞ்சாலையில் நின்ற வாகனங்களில் இருந்தவர்களும், வானொலி சேவை மூலமே நிலைமையை தெரிந்துக்கொண்டனர்.

அகில இந்தியா வானொலியான அரசு பண்பலை சேவையில் மணிக்கொரு முறை ஒலிபரப்பான செய்திகள் அவர்களுக்கு தகவல்களை அறிந்துக்கொள்ள உதவியது.

மழை வெள்ளத்தில் மூழ்கிய நிலையிலும், அகில இந்தியா வானொலி நிலையம் செயல்பட்டது குறிப்பிடத்தக்கது.

இதையடுத்து, ஊருக்கு திரும்பி செல்வதை முடிவெடுத்த வெளியூர் மக்கள், சென்னைக்குள் வெள்ளத்தில் சிக்காமல் தப்பினர்.

கடந்த வாரத்தின் திங்கட் கிழமை மாலையில் இருந்து மூன்று நாட்கள் எந்த செல்பேசி தொடர்பும் இல்லாமல், போக்குவரத்தும் இல்லாமல், கிட்டத்தட்ட 30 ஆண்டுகளுக்கு முன்னர் இருந்த நிலைக்கு அழைத்து சென்றுவிட்டது இந்த மழை....

அதேசமயம், படிப்படியாக மின்சாரம், தொலைபேசி சேவை, இணைய சேவை, போக்குவரத்து சீரானதால், 21ம் நூற்றாண்டுக்குள் சென்னை முழுவதுமாக மீண்டு வந்தது என்றே கூறலாம்.

Source: http://ns7.tv/ta/how-fm-radios-help-flooded-chennai.html

ஒரு வானொலி இருந்திருந்தால்...

வெள்ள நாட்களில் சென்னையில் யாரும் யாருடனும் செல்பேசி/தொலைபேசி ஊடாகத் தொடர்புகொள்ள முடியவில்லை. நிமிடத்துக்கு ஒரு முறை செல்பேசி மூலம் ‘அப்டேட்’ கொடுப்பவர்கள் அன்றைக்கு யார் பாதுகாப்பாக இருக்கிறார்கள் என்றுகூட அறிந்துகொள்ள முடியாத சூழலில், பித்துப்பிடித்தவர்கள்போல் ஆயினர்.

எனக்கு வானொலிகளின் காலம் ஞாபகத்துக்கு வந்தது. எனக்குத் தெரிந்து இன்றைக்கு எந்த அலுவலகத்திலும் வானொலிப் பெட்டிகள் இல்லை. இப்போது செல்பேசிகள் டார்ச், வானொலி என்று எல்லா வசதிகளையும் உள்ளடக்கியவையாக மாறிவிட்டன. ஆனால், வீட்டுக்கு ஒரு சின்ன வானொலி இருந்திருந்தாலும் மழை பாதித்த நேரத்தில் பேட்டரியில் இயங்கவைத்து வெளியில் என்ன நிலவரம் என்பதை அறிந்துகொண்டிருக்கலாம். ‘இப்போது மட்டும் வானொலி இருந்திருந்தால்’ என்ற ஏக்கத்தில் இருந்தவர்களை அந்த நேரத்தில் பார்க்க முடிந்தது.

வானொலி நண்பன்

கடந்த ஒரு வார காலமாக சென்னை மக்கள் வெள்ளத்தால் பெரிதும் அவதிப்பட்டு வருவதை நாம் அறிவோம். நகர் முழுவதும் வெள்ளக்காடாக இருக்கிறது. கான்கிரீட் காடுகள் வெள்ளத்தில் மிதக்கின்றன. வெளியே எங்கும் செல்ல முடியவில்லை. மின்சாரம் இல்லை. அத்தியாவசியப் பொருட்களும் கிடைப்பதில் பெரும் தட்டுப்பாடு. தொலைத்தொடர்பு சாதனங்கள் அனைத்தும் செயலிழந்துவிட்டன.

இப்படியான சூழலுக்கு வானொலி மிகச் சிறந்த நண்பன். காரணம், அதற்கு குறைந்த சக்தி மின்சாரம் இருந்தால் போதும். இன்றைய தொழில்நுட்ப உலகத்தில் டைனமோ வானொலிப் பெட்டிகள் எல்லாம் சந்தையில் கிடைக்கின்றன. பத்து முறை சுற்றினால் பேட்டரி சார்ஜ் ஆகி இரண்டு மணி நேரம் பாடும். ஆனால், நாம் அதை மறந்துவிட்டோமே!

எனக்கு 75 வயது மதிக்கத்தக்க ஒரு வானொலி நண்பர் இருக்கிறார். செல்பேசி சேவை கிடைத்த பிறகு, நேற்று பேசினேன். பதற்றத்தோடு, எப்படி இருக்கிறீர்கள் என்று கேட்டேன். அகில இந்திய வானொலியில் வானிலை அறிக்கையைத் தொடர்ந்து கேட்டதன் பயனாக தனக்கு ஒரு வாரத்துக்குத் தேவையான பொருட்களை எல்லாம் வாங்கி வைத்துக்கொண்டதைச் சொன்னார். பாதுகாப்பான இடம் நோக்கி நகர்ந்துவிட்டதையும் சொன்னார்.

ஹாம் ரேடியோ தெரியுமா?

வானொலிப் பெட்டியைப் பற்றிப் பேசும்போது இன்னும் ஒன்று எனக்கு நினைவுக்கு வருகிறது. நம்மில் எத்தனை பேருக்கு ஹாம் அல்லது அமெச்சூர் வானொலிகளைப் பற்றித் தெரியும்? போலீஸாரின் கைகளில் உள்ள வயர்லெஸ் வாக்கி டாக்கிகளைப் பார்த்திருப்பீர்கள். அதனை ‘வாக்கி டாக்கி’ என்று கூறுவதே தவறு. ‘வாக்கி டாக்கி’ என்பது நகரின் பெரிய மால்களிலும் தியேட்டர்களிலும் உள்ள பணியாளர்கள் பயன்படுத்துவார்களே, அதைத்தான் வாக்கி டாக்கி என்பர். போலீஸ் வைத்திருப்பது வயர்லெஸ் வானொலிகள்.

வாக்கி டாக்கி என்பவை 500 மீட்டர் முதல் ஒரு கி.மீ. சுற்றளவு மட்டுமே தனது சக்தியைப் பொருத்து எடுக்கும் திறன் கொண்டது. ஆனால், போலீஸார் வைத்திருப்பது 10 கி.மீ. சுற்றளவு வரை எடுக்கக் கூடியது. ‘ரிப்பீட்டர்கள்’ கிடைத்தால் மேலும் 50 முதல் 100 கி.மீ வரை கூடத் தொடர்புகொள்ளலாம்.

ஜப்பானியர்களின் பயன்பாடு

எதற்காக இதைச் சொல்கிறேன் என்றால், காவலர்கள் வைத்திருக்கும் இதே போன்ற கருவியை நீங்களும் வைத்துக்கொள்ள அரசு அனுமதி அளிக்கிறது. நான் வைத்திருக்கிறேன், உரிமத்துடன். யாருடன் பேச? உலகம் முழுவதும் நம்மைப் போல் உரிமம் வாங்கி வைத்துள்ள அனைவருடனும். இப்படி உரிமம் வாங்கிப் பயன்படுத்துபவர்களைத்தான் நாம் ஹாம் வானொலி உபயோகிப்பாளர்கள் என்கிறோம். இதுபோன்ற ஆபத்துக் காலங்களில் இந்த ஹாம் வானொலிதான் தகவல் தொடர்புக்கு உலகெங்கும் கை கொடுத்தது, கொடுத்தும்வருகிறது.

உலகிலேயே அதிகம் ஹாம் ரேடியோக்களைப் பயன்படுத்துபவர்கள் ஜப்பானியர்கள். அவர்கள் அதிக பேரிடர்களை எதிர்கொள்வதே இதற்குக் காரணம்.

ஹாம் வானொலியைப் பயன்படுத்த எந்த ஒரு செல்பேசி கோபுரமும் தேவையில்லை. மின்சாரமும் குறைந்த அளவே தேவை. எங்கே இருக்கிறோமோ அந்த நொடியில் அங்கு இருந்து உலகம் முழுவதும் தொடர்புகொள்ள முடியும். மாதம் ஆனதும் சர்வதேச அழைப்புகளுக்குப் பில் தொகை எகிருமே என்ற கவலையும் வேண்டாம். தனிநபர்களால் வாங்க முடியாத சூழலில் ஒவ்வொரு பகுதியிலும் தொடர்புகள் தெரிவிக்கும் வகையில் அமைப்புகளேனும் வாங்கிப் பயன்படுத்தலாம்.

எனக்குத் தெரிந்து சென்னையில் உள்ள எந்த ஊடகமும் ஹாம் வானொலிப் பிரிவைத் தன்னகத்தே கொண்டதாகத் தெரியவில்லை. இனியேனும் யோசிப்போமா?

- தங்க. ஜெய்சக்திவேல், உதவிப் பேராசிரியர், இதழியல் மற்றும் தொடர்பியல் துறை, சென்னைப் பல்கலைக்கழகம்.

Source: http://tamil.thehindu.com/opinion/columns/%E0%AE%92%E0%AE%B0%E0%AF%81-%E0%AE%B5%E0%AE%BE%E0%AE%A9%E0%AF%8A%E0%AE%B2%E0%AE%BF-%E0%AE%87%E0%AE%B0%E0%AF%81%E0%AE%A8%E0%AF%8D%E0%AE%A4%E0%AE%BF%E0%AE%B0%E0%AF%81%E0%AE%A8%E0%AF%8D%E0%AE%A4%E0%AE%BE%E0%AE%B2%E0%AF%8D/article7960683.ece?utm_source=vuukle&utm_campaign=vuukle_referral#vuukle_div

ஏன் ஊடகங்கள் வெள்ளத்தில் அமைதியானது? கேள்விக்கான பதில் இதோ

வயதான தாயை நினைத்து ஏங்கும் மகள். கர்ப்பமாக உள்ள மனைவியை நினைத்து வருத்தப்படும் கணவன். வேலைக்கு சென்ற தாயை தொடர்பு கொள்ள முடியாமல் கையறு நிலையில் உள்ள குழந்தைகள் என எல்லோரும் அகதிகளாக தொடர்பற்று தனித்துவிடப்பட்டோம். இப்போது சரி. தொலைபேசி, செல்பேசி, இணையம் எல்லாம் நமக்கு கை கொடுக்கிறது. ஆனால் வெள்ளம் ஏற்பட்ட முதல் ஐந்து நாட்கள் நம் கையின் ஆறாவது விரலாக இருந்த செல்பேசி அதற்குள்ளே இருந்த இணையம், டார்ச் லைட், எஃப்.எம், என எல்லாவுமாய் இருந்தது நம்மை கைவிட்டது. அப்போது மட்டும் செய்திகளை தெரிந்துக் கொள்ள நமது தாத்தா, பாட்டி பயன்படுத்திய வானொலி பெட்டி, தொடர்பு கொள்ள ஹாம் ரேடியோ இருந்திருந்தால் எவ்வளவு நன்றாக இருந்திருக்கும்?

“சாதாரண மக்கள் மட்டும் இல்லாமல் ஊடகத்தில் பணிபுரிபவர்களிடமே ஹாம் ரேடியோ இல்லை. ஹாம் ரேடியோ இருந்திருந்தால் மக்களுக்கு சொல்கிறோமோ இல்லையோ பிரச்சனைகள அரசுக்காவது உடனடியாக தெரிவித்திருக்கலாம். அரசே இந்த வெள்ளத்தில் செயலற்று போனதற்கு காரணம் தொடர்புகள் அறுந்து போனதுதான்.”, என சென்னை பல்கலைக்கழக இதழியல் மற்றும் தொடர்பியல் துறை பேராசிரியரும் வானொலி மற்றும் ஹாம் ரேடியோ ஆராய்ச்சியாளருமான டாக்டர்.தங்க ஜெய்சக்திவேல் கூறுகிறார்.

பேராசிரியர். தங்க ஜெய்சக்திவேல்

ஏன் முக்கியம் ஹாம் ரேடியோ?

மொபைல் கம்யூனிகேஷனை எப்பவும் நம்ப முடியாது. மின்சார பிரச்சனைகள் இருக்கும். சென்னையில் இருக்கின்ற 4,500 டவர்களில் 4,000 டவர்கள் நீரில் மூழ்கிவிட்டன. அப்புறம் எப்படி செல்லில் தொடர்பு கொண்டு பேச முடியும்? இதை எல்லோரும் பயன்படுத்த முடியும். அவசரமான காலங்களில் முக்கியமாக சுனாமி ஏற்பட்ட நேரத்தில் அகில இந்திய வானொலிக்கு தொடர்பு கொள்ள உதவியதே ஹாம் ரேடியோக்கள் தான்.

“சென்னையில் 50 பேர் ஹாம் ரேடியோ பயன்படுத்துகிறார்கள். நாங்கள் அவர்களையெல்லாம் ஒன்றிணைத்து எங்கெல்லாம் தொடர்பில்லாமல் உதவி தேவைப்பட்டதோ அங்கெல்லாம் அவர்கள் நன்றாக செயல்பட்டார்கள்”, என்று இந்த வெள்ளத்தில் ஹாம் ரேடியோ எவ்வளவு அவசியம் என்பதை உணர்த்துகிறார், பேராசிரியர்.

வானொலி கேள்விபட்டிருக்கிறோம். அது என்ன ஹாம் வானொலி? போலீஸ்லாம் கையில வச்சிக்கிட்டு “ஓவர், ஓவர்”னு சொல்லுவாங்களே அதுவா? அது வாக்கி டாக்கியாச்சே? என்கிறீர்களா! இல்லை ஹாம் வானொலி என்பது வேறு. பூவரசம் பீப்பி படத்தை பார்த்திருக்கிறீர்களா? அதில் அந்த நான்கு குழந்தைகளும் ஒரு பெரிய விசயத்தை ஹாம் ரேடியோ மூலம்தான் சாதிப்பார்கள்.

வாக்கி டாக்கி என்பது 500 மீட்டர் முதல் 1 கி.மீ வரை உள்ள சுற்றளவில் தனது சக்தியை பொருத்து மற்றவர்களை தொடர்பு கொள்ள உதவும் சாதனம். ஆனால், ஹாம் ரேடியோ என்பது 10 கி.மீ வரை செயல்படக்கூடியது. போலீசார் வைத்திருப்பதன் பெயர் வாக்கி டாக்கி அல்ல. வயர்லஸ் வானொலி. இந்த வயர்லஸ் வானொலி போன்றதுதான் ஹாம் ரேடியோ.

ஹாம் ரேடியோவை வாங்க உடனேயே புறப்படுறீங்களா? கொஞ்சம் இருங்கள். அதை எப்படி வாங்குவது என்பதையும் பேரா.ஜெய்சக்திவேல் கூறுகிறார்.

“எல்லோரும் ஹாம் ரேடியோவை வாங்கி உபயோகிக்கலாம். ஆனால், அதற்கு உரிமம் வாங்க வேண்டும். ஹாம் ரேடியோ மற்றும் அதற்கான லைசென்ஸையும் பெறுவதற்கு மத்திய அரசின் தகவல் தொடர்பு துறை நடத்தும் தேர்வில் கலந்து கொண்டு தேர்வாக வேண்டும். இதற்கான பயிற்சி மையங்கள் சென்னையில் இலவசமாக நடத்தப்படுகின்றன. ஆனால், ஆட்கள் குறைவாகத்தான் வருகிறார்கள். இப்பொழுது கூட கோபாலபுரம், பள்ளிக்கரணை ஆகிய இடங்களில் பயிற்சி வகுப்புகள் நடத்தப்படுகின்றன. முடிந்த அளவுக்கு இதனை ஊடகவியலாளர்களும் அது சார்ந்து படிக்கும் தொடர்பியல் மாணவர்களும் வைத்துக்கொள்ளுதல் அவசியம்.”

வானொலி இந்த வெள்ளக்காலத்தில் எப்படி செயல்பட்டது?

நம்முடைய அகில இந்திய வானொலி வெள்ள காலத்தில் நன்றாக செயல்பட்டது. தங்களது உடைமைகளை இழந்தவர்கள், அதை கொடுக்க வேண்டும் என நினைப்பவர்களை ஒன்றைணைத்து ஒரு பாலமாக வானொலி செயல்பட்டது. இப்பொழுது நீங்கள் வானொலி மார்க்கெட்டுக்கு சென்று வானொலி வாங்க வேண்டும் என்றால் கூட வானொலி பெட்டியே இல்லை. ஏனென்றால், நாம்தான் வானொலி பெட்டியே வாங்காமல் உற்பத்தியாளர்களை ஓட ஓட விரட்டி விட்டோமே.

இனி என்ன செய்வது? உடனடியாக ஹாம் ரேடியோ பெறுவதற்கான முயற்சிகளை எடுங்கள். தாத்தா, பாட்டி உபயோகித்த வானொலியை தூசு தட்டுங்கள்.

எழுதியவர் நந்தினி வெள்ளைச்சாமி 

Source: Amateur radio turns vital link when gadgets fail in flood-hit Chennai | ippodhu

			Amateur radio turns vital link when gadgets fail in floo...   Amateur radio turns vital link when gadgets fail in flood-hit Chennai
			View on ippodhu.com	Preview by Yahoo

வெள்ள நிவாரணத்தில் வானொலி அறிவிப்பாளர்கள்

ஆர்.ஜே ரஞ்சித்  :-
 தனியார் வானொலி ஒன்றில் வேலை செய்யும் ரஞ்சித் உணவு மற்றும் மருந்துகள் விநியோகத்தில் முக்கியத்துவம் கொடுக்கிறார். கொசுக்கடி, சளி, காய்ச்சல் எனப் பலரும் அவதிப் படுகின்றனர், இவர்களுக்கு தொடர்ந்து இடைவிடாது காலை முதல் இரவு வரை ஒவ்வொரு பகுதியையும் தேர்ந்தெடுத்து  அங்குள்ள மக்களுக்கு மருந்துகளை வழங்கி வருகின்றனது இவரது குழு.

தண்ணீர் பாட்டில்கள், நாப்கின் போன்றவற்றையும் இவரது குழு  விநியோகிக்கிறார்கள்.  ஸ்டேட்டஸ் தட்டுவதை விட இவர் வீடியோ பதிவாக போடுவதால், பலருக்கு தகவல் சென்றடைகிறது. தன்னார்வலர்கள் எண்ணிக்கை குறைவாக இருக்கிறது, நிறைய தன்னார்வலர்கள் வந்தால் நிறைய பேருக்கு உதவமுடியும் என்கிறார் ரஞ்சித்.
https://web.facebook.com/RJ.RANJITH.0303/?fref=photo

ஆர்.ஜே பாலாஜி  :-
ஆர்.ஜே பாலாஜி பற்றிய அறிமுகம் தேவையில்லை. தான் வேலை பார்க்கும் எஃப்.எம் மூலமாக பல  தன்னார்வாலர்களை ஒருங்கிணைத்தார் பாலாஜி.

மேலும் டுவிட்டர், ஃபேஸ்புக் மூலமாகவும்  தொடர்ந்து யார், எங்கே வெள்ளத்தில் பாதிக்கப்பட்டு இருக்கிறார்கள், எங்கே உணவு தேவைப்படுகிறது, யார் உணவு வழங்க தயாராக இருக்கிறார்கள் போன்ற விவரங்களை அப்டேட் செய்து கொண்டே இருந்தார்.

மேலும் மக்களுக்கு அவசியம் தேவைப்படக்கூடிய போர்வை, தண்ணீர் பாட்டில்கள் போன்ற அத்தியாவசிய பொருட்களை பல  இளைஞர்களோடு சேர்ந்து இணைந்து வாங்கி பல்வேறு பகுதியில் இருக்கும் மக்களுக்கு விநியோகம் செய்தார். ஆர். ஜே.பாலாஜியின் முயற்சி காரணமாக ட்விட்டரில் சென்னையில் மழை என்பது தேசிய அளவில் டிரென்ட் ஆனது. நடிகர் சித்தார்த், விஷ்ணு விஷால் ஆகியோரோடும் இணைந்து  தொடர்ந்து இடைவெளியின்றி மீட்பு பணியில் ஈடுபட்டார் ஆர்.ஜே.பாலாஜி.   

நன்றி: அபராஜிதன்

வானொலியின் அருமை

வானொலியின் அருமை, பெருமை பற்றி சென்னைவாசிகள் மறுபடியும் உணர ஒரு வாய்ப்பு அண்மையில் கிடைத்தது.

நகரின் பல பகுதிகளில் 3 நாட்களுக்கு மேல் மின்சாரம் இல்லாமலிருந்தது. அந்தப் பகுதிகளில் வாழும் மக்கள் தங்கள் பழைய வானொலிப் பெட்டிகளைத் தேடியெடுத்து ஒலிபரப்புகளைக் கேட்டனர்.

வானொலி நிலையங்களும் நிலைமைக்கு ஏற்ப செயற்பட்டன. அவதிக்குள்ளானவர்கள் வானொலி நிலையங்களை அழைத்து தங்கள் நிலை பற்றிக் கூறினார்கள். உணவு, குடிநீர், மீட்புப்படை உதவிகளைக் கோரினார்கள்.

பல பண்பலை வானொலி நிலையங்கள் தங்கள் வழமையான நிகழ்ச்சிகளை நிறுத்திவிட்டு, 24 மணி நேரமும் வெள்ள நிலைமை பற்றி தகவல்களை ஒலிபரப்பின.

ஆலந்தூரைச் சேர்ந்த தேவி என்ற பெண்மணி தான் வழமையாக சமையல் செய்யும்போது வானொலியில் பாடல்கள் கேட்பதாகவும் ஆனால் தனது ஃப்ரிட்ஜ்க்கு மேல் இருக்கும் அந்த சிறிய பெட்டி எவ்வளவு அற்புதமானது என்பதை தான் முன்னர் உணரவில்லை என்றும் கூறினார்.

நேயர்கள் நிலையங்களைத் தொடர்பு கொண்டு தங்கள் பகுதி நிலைமைகளை உடனுக்குடன் நேரடியாக தகவல் கொடுத்தார்கள். வெள்ளத்தில் சிக்கிய மக்களுக்கும் இத் தகவல்கள் பயனளித்தன. வெள்ளிக்கிழமை (4/12) நண்பகல் வெள்ளத்தில் மூழ்கியிருந்த சைதாப்பேட்டை பாலம் மீண்டும் திறக்கப்பட்டதாக அறிவிப்பு வெளியானதும் மக்கள் ஆரவாரம் செய்து அத்தகவலை வரவேற்றனர். 

செம்பரம்பாக்கம் ஏரி திறக்கப்பட்டதால் இந்த முக்கிய இணைப்புப்பாலம் புதன்கிழமை தொடக்கம் பல அடி வெள்ள நீரில் மூழ்கியிருந்தது.

தொலைபேசி இல்லாமல் இருந்தவர்களுக்கு வானொலி நிலையங்கள் தகவல் பரிமாற்ற நிலையங்களாகவும் செயற்பட்டன. குடும்பத்தினர்கள், உறவினர்கள் மற்றும் நண்பர்கள் பற்றிய தகவல்களை அறிந்து அவர்களைப்பற்றிக் கேட்டவர்களுக்கு எடுத்துச் சொல்லின.

பல அறிவிப்பாளர்கள் நீண்ட நேரம் பணியாற்றினார்கள். அறிவிப்புகள் சரியான ஆட்களுக்கு, சரியான முறையில் கிடைப்பதை உறுதிப்படுத்தினார்கள்.

வானொலி நிலையங்கள் மூலமாக உதவித்தொகைகளும் வந்து சேர்ந்தன. சிக்காகோவில் உள்ள எஸ். ராஜேஷ் என்ற சென்னைவாசி வெள்ள நிவாரண நிதியாக தன் நண்பர்களிடம் பணம் திரட்டி 4,000 டாலரை ஒரு பண்பலை வானொலி நிலையத்துக்கு அனுப்பி வைத்தார்.

வானொலி நிலையங்களும் தங்கள் ஊழியரை அனுப்பி வெள்ளத்தில் சிக்கிய மக்களுக்கு உணவு மற்றும் மருந்துகள் விநியோகம் செய்தன.

(தகவல்: டைம்ஸ் ஆஃப் இந்தியா http://bit.ly/1OJ6UEo)

நன்றி: திரு. உமாகாந்தன்

திருநெல்வேலி வானொலியின் 53 ஆம் ஆண்டுவிழாக் கொண்டாட்டம்

திருநெல்வேலி வானொலி 1.12.1961 அன்று தொடங்கப்பட்டு 53 ஆம் ஆண்டுகள் ஆவதை முன்னிட்டு 1.12.2015 மாலை 3 மணிக்கு திருநெல்வேலி அகிலஇந்திய வானொலி வளாகத்தில் ஆண்டுவிழா நடைபெற்றது.

 

நிகழ்ச்சி அறிவிப்பாளர் உமாகனகராஜ், கரைசுற்றுப்புதூர் கவிப்பாண்டியன் ஆகியோர் வரவேற்றுப் பேசினர்.

 நிகழ்ச்சித் தயாரிப்பாளர் திரு.கண்ணையன் தட்சணாமூர்த்தி நிகழ்ச்சிக்குத் தலைமைவகித்துத் தலைமையுரையாற்றினார். 

அறிவிப்பாளர் திரு.கரைசுற்றுப்புதூர் கவிப்பாண்டியன் அறிமுகவுரையாற்றினார். 

அறிவிப்பாளர் சந்திரபுஷ்பம் வானொலிநிலையத்தை வாழ்த்திப் பாடல் பாடினார். எழுத்தாளர் திரு.நாறும்பூநாதன் சிறப்புவிருந்தினராய் பங்கேற்று, அவர் சிறுகதைகளுக்கு நெல்லை வானொலி தந்த முக்கியத்துவத்தைச் சொல்லி மிக அழகாகப் பேசினார்.

 மூத்த ஊழியர் கே.ஆர்.கே.பாண்டியன் முன்னிலை வகித்தார். நிலையச் செயற்பொறியாளர் இவாஞ்சலின் வாழ்த்துரை வழங்கினார்.

நிகழ்ச்சித் தயாரிப்பாளர் திரு.கண்ணையன் தட்சணாமூர்த்தி தன் தலைமையுரையில், “1961 ஆம் ஆண்டு டிசம்பர் 1 அன்று தொடங்கப்பட்ட திருநெல்வேலி வானொலியின் விவசாயப் பண்ணை இல்லப் பிரிவில்தான் தென்கச்சி சுவாமிநாதன் பணியாற்றினார். மக்கள் மனதில் பெரிதும் இடம்பெற்ற இன்றுஒருதகவல் நிகழ்ச்சியை ஒரு நாள்கூட இடைவிடாது 13 ஆண்டுகள் ஆயிரக்கணக்கான புதியதகவல்களைச் சொல்லி ஊடகத்துறையில் அசைக்கமுடியாத சாதனைகள் செய்த தென்கச்சி சுவாமிநாதன் பணியாற்றிய திருநெல்வேலி  வானொலி 53 ஆம் ஆண்டினைத் தொட்டு ஆண்டுவிழாவைக் கொண்டாடிக்கொண்டிருக்கிறது.

 ஆகாஷ்வாணி நடத்திய நாடகப்போட்டியில் திருநெல்வேலி வானொலி நிலையம் தயாரித்த கம்ப்யூட்டர் எக்ஸ்.ஒய்.இசட் என்னும் நாடகம் தேசியஅளவில் பரிசினை வென்று சாதனை படைத்தது” என்று பேசினார்.

சதக்கத்துல்லாஹ் அப்பா கல்லூரித் தமிழ்த் துறைத்தலைவர் முனைவர் சௌந்தர மகாதேவன் சிறப்பு விருந்தினராய் பங்கேற்றுச் சிறப்புரையாற்றும்போது, 

  “ திருநெல்வேலி வானொலி அரைநூறாண்டுகளைக்கடந்து தரமான நிகழ்ச்சிகளைத் திறமாகத் தந்துகொண்டிருக்கிறது. எத்தனை ஊடகங்கள் வந்தாலும் வானொலியின் தேவை இந்தச் சமூகத்தில் இருந்துகொண்டேதான் இருக்கும்.வெள்ளம் போன்ற இயற்கைச் சீற்றங்கள் வந்தபோது யாரும் எட்டமுடியாத பாதிக்கப்பட்ட மக்களோடு வானொலி மூலமே தொடர்பு கொள்ளமுடிகிறது. 

சான்றோர் சிந்தனைகளைச் சமயவேறுபாடுஇல்லாமல் கேட்கும் மக்கள் பரந்தமனம் உடைய, பிற மதங்களை மதிக்கும் உயர்ந்த இலட்சியமுள்ள மனிதர்களாக மாறுகின்றனர். நூல்களைப் படிக்கவேண்டுமென்றால் கூட எழுத்தறிவு அவசியம்.ஆனால் படிக்காத பாமரரும் வானொலி கேட்கலாம். உலகியல் நடப்புகளைத் தெரிந்துகொள்ளலாம். 

திருநெல்வேலி வானொலியில் தரமான சரியான உச்சரிப்போடு பேசும் அறிவிப்பாளர்களிடம் இருந்து தமிழைத் தவறின்றிப் பேசக்கற்றுக்கொண்டேன்.

சிறுவர்களில் தொடங்கி, இளையோர்,பெண்கள், மூத்தோர், மாற்றுத்திறனாளிகள் என அனைவருக்கும் சிறப்பான நிகழ்ச்சிகள் ஒளிபரப்பாகின்றன. 

திருநெல்வேலி வானொலி தாமிரபரணி நதி குறித்த, சுற்றுச்சூழல் குறித்த,தமிழ்ப்பண்பாடு குறித்த, சாதனைபடைத்த ஆளுமைகள் குறித்த, மனதைப் பக்குவப்படுத்தும் இசைகுறித்த, தமிழ்இலக்கியம் குறித்த தரமான நிகழ்ச்சிகளை அரைநூற்றாண்டினைக் கடந்தும் தந்துகொண்டிருக்கிறது.

 தரமாகப் பேசத்தினமும் வானொலி கேட்கவேண்டும். டெல்லி செய்தியறிக்கை வாசித்த சரோஜ்நாராயண்சாமி,சென்னை வானொலியில் செய்திகள் வாசித்த ஜெயாபாலாஜி, பாலசுப்ரமணியன்,சென்னை தொலைக்காட்சியில் செய்திகள் வாசித்த ஷோபனா ரவி, நெல்லை வானொலியின் உமாகனகராஜ், சந்திரபுஷ்பம் பிரபு, கரைசுற்றுப்புதூர் கவிப்பாண்டியன், குடந்தை வேங்கடபதி, கீழப்பாவூர் சண்முகையா, மேலப்பாவூர் ராமகிருஷ்ணன் ஆகியோரிடமிருந்து கல்லூரிநாட்களில்  தமிழைச் சரியாக உச்சரிக்கக் கற்றுக்கொள்ள முடிந்தது.

 திருநெல்வேலி நேயர்கள் பங்கேற்றுப் பேசும் ஆனந்தப்பூங்காற்றே நேரலை நிகழ்ச்சியின் மூலம் தினமும் புதுப்புதுச் செய்திகளை அறிந்துகொள்ளமுடிகிறது.

 மகாத்மா காந்தியின் வாழ்க்கைச் சரித்திரத்தை காந்திஅஞ்சலி என்ற நிகழ்ச்சியாக நெல்லை வானொலி தொடர்ந்து தந்துகொண்டிருக்கிறது. 

வரலாற்று நாவலாசிரியர் கல்கி எழுத்திய பொன்னியின் செல்வன் நாவலை வாராவாரம் நெல்லை வானொலி தந்துகொண்டே இருக்கிறது.

 எம்.கே.தியாகராஜபாகவதர் போன்றோர் பாடிய பாடல்கள், திருமுருகக் கிருபானந்தவாரியார்,புலவர் கீரன்,எம்பார் விஜயராகவாச்சாரியார் உரைகள், மகாகவி பாரதி குறித்த, மனிதநேயம் குறித்த அரிய உரைச்சித்திரங்கள், சாகித்ய அகாடமி விருது பெற்ற எழுத்தாளர்களின் அரிய நேர்காணல்களை நெல்லை வானொலி ஆவணப்படுத்தி வைத்திருக்கிறது.” என்று பேசினார்.

 வானொலி நேயர்கள் திருமலைமுருகன்,பத்தமடை கந்தசாமி, பொருநைமைந்தன், கதிர்,திருக்களூர் பாலு ஆகியோர் வாழ்த்திப்பேசினர். 

கவிப்பாண்டியன் நன்றி கூறினார். ஆண்டுவிழா நிகழ்ச்சிகான ஏற்பாடுகளை திருநெல்வேலி வானொலி நிலையம் சிறப்பாகச் செய்திருந்தது.

படத்தில் ; திருநெல்வேலி வானொலி நிலையத்தின் திருநெல்வேலி வானொலியின் 53 ஆம் ஆண்டுவிழாவை முன்னிட்டு நிலையத்தின் மூத்த ஊழியர் கே.ஆர்.கே.பாண்டியன் கேக் வெட்டித் தொடங்கிவைக்கிறார்.அருகில் நிகழ்ச்சித் தயாரிப்பாளர் திரு.கண்ணையன் தட்சணாமூர்த்தி,முனைவர் சௌந்தர மகாதேவன்,எழுத்தாளர் நாறும்பூநாதன்,பொறியாளர் இவாஞ்சலின் ஆகியோர் உள்ளனர்.

Source: http://mahakavithai.blogspot.in/2015/12/53.html