Saturday, April 28, 2018

ஹாம் வானொலியில் பயன்படுத்தப்படும் முக்கியமான க்யூ குறியீடுகள்


ஹாம் வானொலியில் பயன்படுத்தப்படும் முக்கியமான க்யூ குறியீடுகளையும், அதற்கான விளக்கத்தினையும் விரிவாக காணலாம்.

QRG – என்னுடைய சரியான அலைவரிசை என்ன?
QRL – அந்த அலைவரிசை பிசியாக உள்ளதா?
QRM – ஏதேனும் இடைஞ்சலுக்கு உள்ளாகிறீர்களா?
QRN – எனது ஒலிபரப்பினை நிலையாகக் கேட்க முடிகிறதா?
QRO – என்னுடைய ஒலிபரப்பின் சக்தியைக் கூட்டவா?
QRP – என்னுடைய ஒலிபரப்பின் சக்தியைக் குறைக்கட்டுமா?
QRQ – வேகமாக அனுப்பட்டுமா?
QRS – இன்னும் மெதுவாக அனுப்பட்டுமா?
QRT – அனுப்புவதை நிறுத்திக்கொள்ளட்டுமா?
QRU – வேறு ஏதேனும் எனக்கான தகவல் இருக்கிறதா?
QRV – தயாராக உள்ளீர்களா?
QRX – காத்திருக்கட்டுமா?
QRZ – யார் அழைக்கிறீர்கள்?
QSB – எனது சிக்னல் குறைந்து வருகிறதா?
QSL – எனது ஒலிபரப்பினை பெறுவதோடு, புரிந்துகொள்ள முடிகிறதா?
QSP – நான் ரிலே செய்யட்டுமா?
QSX – என்னை _________ எனும் அலைவரிசையில் கேட்கிறீர்களா?
QSY – வேறு ஒரு அலைவரிசைக்கு மாற்றிக் கொள்ளட்டுமா?
QTC – எனக்கு உங்களிடம் இருந்து வேறு ஏதேனும் தகவல் உள்ளதா?
QTH – நீங்கள் வசிக்கும் இடம் எது?

ஆகிய குறியீடுகள், இன்றும் ஹாம் வானொலிகளுக்கிடையே தவிர்க்க முடியாத குறியீடுகளாக இருந்து வருகிறது. ஆங்கிலத்தில் சொல்வதற்கும், அதனையே தமிழில் மொழி மாற்றம் செய்து சொல்வதற்கும், பெரிய வேறுபாடு உள்ளது. முடிந்த வரை அவற்றை அனைவருக்கும் புரியும் தமிழில் மொழிபெயர்த்துள்ளோம்.

Monday, April 23, 2018

சீன வானொலியின் APP IN&CH பரப்புரை

சீன வானொலி தமிழ் பிரிவின் தலைவர் கலைமகள், தென்னாசிய மையத்தின் தலைவருடன் 2018 ஏப்ரல் 24ஆம் நாள் செவ்வாய் மாலை 6.00 மணிக்கு சென்னையிலுள்ள EXPRESS AVENUE-ல் சிறப்பு பரப்புரை நிகழ்ச்சியை நடத்த உள்ளார்கள். உங்கள் வருகையை மனமார எதிர்பார்க்கிறது சீன வானொலி.

நிகழ்ச்சியில் சீன வானொலியின் APP IN&CH பரப்புரை செய்ய உள்ளனர். நேயர்கள் அப்போது பதிவிறக்கினால், சிறப்பு பரிசுகள் பெறலாம். நாளை மாலை உங்களை சந்திக்க சீன வானொலி தமிழ் பிரிவு சென்னை ராயப்பேட்டையில் உள்ள எக்ஸ்பிரஸ் மாலில்...!


Sent from Yahoo Mail for iPhone

Saturday, April 21, 2018

ஹாம் வானொலிப் போட்டிகள்


ஹாம் வானொலி என்பது ஒரு அறிவுப்பூர்வமான ஊடகம். இதன் துணைகொண்டு நாம் நம் பொது அறிவினை மட்டுமல்லாது, அறிவியல் மற்றும் தொழில்நுட்ப அறிவையும் வளர்த்துக் கொள்ள முடிகிறது. உலக அளவில் ஹாம் வானொலித் தொடர்பாக பல போட்டிகள் நடைபெறுகின்றன. அவற்றில் கலந்து கொள்வதன் மூலம், உலக அளவில் புகழ்பெறுவதற்கும் வாய்ப்புகள் அதிகம்.

ஹாம் வானொலிப் போட்டிகள்

ஹாம் வானொலிப் போட்டிகளில் ஹாம்கள் கலந்து கொள்வது என்பது ஒரு வகையில் அவர்கள் தன்னை நிலைநிறுத்திக் கொள்வதற்கானது என்று வைத்துக்கொள்ளலாம். காரணம், வெறுமனே, ஹாமாக இருப்பதில் ஒன்றும் சுவாரஷ்யம் இல்லை. ஹாம் போட்டிகளில் உடனுக்குடன், அவரவர்களின் அடையாளக் குறியீடுகள் பகிர்ந்துகொள்ளப்படுவதுடன், குறுகிய வாக்கியங்களாக தகவல்களையும் பகிர்ந்து கொண்டு அடுத்த தொடர்புக்கு சென்று விடுவர். காரணம் போட்டிகளில் யார் அதிக ஹாம்களை ஒரு குறிப்பிட்ட நேரத்திற்குள் தொடர்பு கொள்கிறார்களோ, அவர்களுக்கே வெற்றி பெரும் வாய்ப்புகள் அதிகம்.

ஒரு சில போட்டிகளில் சுவாரஷ்யத்திற்கு பஞ்சம் இருக்காது. குறிப்பாக தொலைதூர நாடுகளில் இருந்து வரும் ஹாம் வானொலிகளைப் பிடிப்பது அனைவருக்குமே சவாலான ஒன்று தான். அதுவும் குறைந்த சக்தியில் ஒலிபரப்பும் ஹாம் வானொலிகளைப் பிடிப்பது என்பது  யாருக்குமே ஒரு மகிழ்ச்சியைக் கொடுக்கும் நிகழ்வு தான். பொதுவாகவே இது போன்ற ஹாம் போட்டிகளில் கலந்து கொள்ளும் பொழுது ஒரு சில சட்ட திட்டங்களை கொண்டு செயல்படுவது இன்றியமையாததாகும். அவை,

ஹாம் வானொலிகளோடு உரையாடும் பொழுது சுருக்கமாக முடித்துக்கொள்ள வேண்டும். முக்கியமாக ஹாம்களின் அழைப்பு குறியீடுகளை (Call Sign) தெளிவாகக் கேட்டுக்கொண்டு, உங்களின் சிக்னல் எப்படி அவருக்கு கிடைக்கிறது என்பதனையும் தெரிந்து கொண்டு தொடர்பினை துண்டிப்பது நல்லது. காரணம், இது போன்ற அரிதான ஹாம் நிலையத்தினை தொடர்பு கொள்ள நம்மைப் போன்றே பலரும் ஆவலுடன் இருப்பர். மேலும், நமக்கும் கூடுதலாக நேரம் கிடைப்பதால், இன்னும் இரண்டு ஹாம்களை அந்த நேரத்தில் பிடித்துவிடலாம். எனவே போட்டிகளின் போது சுருக்கம் மிக அவசியம். காலமும் காலநிலையும் பின்பொரு சமயத்தில் கைக்கொடுக்கும் பட்சத்தில் அந்த தொடர்பினை மீண்டும் ஏற்படுத்திக் கொள்ளலாம்.

போட்டியில் கலந்துகொள்ளும் பொழுது, உங்களிடம் தொடர்பு கொள்ளும் நிலையம் முதலில் என்ன சொல்லவருகிறது என்பதைத் தெளிவாகக் கேளுங்கள், அதன் பின், அந்த நிலையம் எங்கே இருந்து ஒலிபரப்புகிறது. பொதுவாக இது போன்ற போட்டிகளில், ZONE-களின் எண்கள் பறிமாற்றம் செய்துகொள்ளப்படும். மேலும் போட்டி நடத்துபவர்கள், ஒரு சில எண்களைக் கொடுத்திருப்பர். அப்படியான சமயத்தில், அந்த எண்களை மனதில் பதிய வைத்துக்கொள்வது நலம் தரும்.

போட்டிகளுக்கு நுழைவதற்கு முன் போட்டியின் நிபந்தனைகளைத் தெளிவாக படித்துக்கொள்வது நலம். காரணம், தேவையற்ற குழப்பத்தினை போட்டியின் போது தவிர்க்கலாம். என்ன விதமான தகவல்களை போட்டியாளர்கள் கேட்கிறார்கள் என்பதனைப் பொருத்து, உங்களின் உரையாடலில் அவை இருக்க வேண்டும். பொதுவாக சிக்னல் ரிப்போர்ட்களும், இடங்களும் மட்டுமே பறிமாற்றம் செய்துகொள்ளப்படும். ஒரு சில சமயங்களில் வரிசை எண்கள் பறிமாற்றம் செய்து கொள்ளப்படும். நீங்கள், எத்தனையாது தொடர்பாளர் என்பதனை எதிர்புறம் இருந்து உங்களுக்கும், உங்களின் தொடர்பில் அவரின் வரிசை எண்ணையும் தெளிவாக பறிமாற்றம் செய்துகொள்ள வேண்டும்.

இது போன்ற போட்டிகளில் கலந்து கொள்பவர்களுக்கு பொதுவான ஒரு சில சட்ட திட்டங்களை சர்வதேச அமெச்சூர் சொசைட்டிகள் வடிவமைத்துள்ளன. அவற்றை பல மன்றங்கள் தங்களின் இணைய தளங்களில் தெளிவாக வெளியிட்டுள்ளன. குறிப்பாக ஏ.ஆர்.ஆர்.எல் மன்றம் www.arrl.org/contest-calendar எனும் முகவரியில் இதனை விரிவாக பதிவேற்றம் செய்துள்ளது. மற்றொரு குழுவான ஹார்னுகோஃபியா www.hornucopia.com/contestcal எனும் முகவரியில் சற்றே விரிவாக விளக்கியுள்ளது. அது மட்டுமல்லாது, QST மாத இதழும்,Contest Corral எனும் தலைப்பில், ஹாம் போட்டிகளை மையப்படுத்திய தொடரை வெளியிட்டு வருகிறது.

மிக முக்கியமாக ஹாம் வானொலி போட்டியில் அனைவரும் ஆங்கிலத்தில் சரளமாக பேசுவர் என்று மட்டும் எண்ணிவிட வேண்டாம். பல நாடுகளில் உள்ள ஹாம்களுக்கு தங்களின் இருப்பிடம், அழைப்புக் குறியீடு, சிக்னல் ரிப்போர்ட் மட்டுமே ஆங்கிலத்தில் கொடுக்கத் தெரியும், மற்றவற்றை அவர்களிடம் கேட்டாலும் பதில் கிடைக்காது. அதனால் தான் பொதுவான மொழியாக ‘க்யூ’ குறியீடுகள் பயன்படுத்தப்படுகிறது. இந்த க்யூ குறியீடுகள் துணை கொண்டு மொழி தெரியாத நாட்டினருடனும் எளிதாக தொடர்புகொண்டு விபரங்களைப் பெற்றுக்கொள்ள முடிகிறது.

Friday, April 20, 2018

சீன வானொலி நிலைய தமிழ்ப் பிரிவு “இன்ச்-செயலி”

Via CRI Tamil FB

🎉🎉🎉உங்களை நாடி "இன்ச்-செயலி" வருகிறது!

Date: April 24th, 2018 
Time: 6:00pm 
Place: @Express Avenue Mall, Royapet, Chennai

நீங்கள் வாருங்கள்👏🏻👏🏻👏🏻

செம்மொழி தமிழை சீராக ஒலித்து வரும் சீன வானொலி நிலைய தமிழ்ப் பிரிவு ஏப்ரல் 19 முதல் முதல் சீன ஊடகக் குழுமம் என்ற புதிய தளத்தில் இருந்து இயங்கத் தொடங்கியுள்ளது. சீனப் பயணம் மேற்கொள்ளும் இந்தியர்கள் அறிய வேண்டியவை என்னென்ன என்பதை ஐயமுற அறிந்து கொள்ள ஆவலா? அவ்வாறெனில், தமிழ்ப்பிரிவின் மற்றொரு முகமான "இன்ச்-செயலி" எனும் தகவல் களஞ்சியத்தை பதிவிறக்கம் செய்யுங்கள். அது தரும் அறிவுச்சுவையைப் பருகி மகிழுங்கள்.🎈🎈

S🎈



Saturday, April 14, 2018

க்யூ குறியீடுகள் (Q Codes)

 விமான போக்குவரத்தில் பயன்படுத்தப்பட்டுவரும் க்யூ குறியீடுகளை காணலாம்.


QCS – என்னுடைய …… …. எனும் அலைவரிசை தடங்களுக்குள்ளாகியுள்ளது.

QCX – உங்களுடைய முழுமையான அழைப்புக் குறியீடு என்ன?

QCY – செயல்பாட்டில் பின்தங்கிய ஒரு ஏரியலில் இப்பொழுது ஒலிபரப்பி வருகிறேன்.

QDB – தகவலை ……. இருந்து …….. இவருக்கு அனுப்பினீர்களா?

QDF – தற்சமயம் உங்களின் D-Value என்ன?

QDL – உங்களுடைய நோக்கம் என்னுடைய திசைநிலையை அறிந்துகொள்வதா?

QDM –  காற்றினால் காந்தபுலமானது விலகி செல்வதாக சுட்டிக்காட்டுகிறீர்களா?

QDP – இந்த சமயத்தில் எனது பொறுப்பினை ஏற்றுக் கொள்கிறேன்.

QDR – உங்கள் பகுதியில் இருந்து எனது காந்தப்புலம் என்ன?

QDT – காட்சி வளிமண்டலவியல் சார்ந்து பறந்துகொண்டு இருக்கிறேனா?

QDU – எனது IFR பறத்தலை ரத்து செய்கிறேன்.

QDV – நீங்கள் கண்ணுக்கு தெரியும் தூரத்தில் விமானத்தில் பறக்கிறீர்களா?

QEA – எனது முன்னாள் உள்ள ஓடுதளத்தினை தாண்டி சென்றுவிட்டேனா?

QEB – குறுக்குச் சந்திப்பில் நான் திரும்பலாமா?

QEC – நான் 180 டிகிரி திரும்பி ஓடுதளத்திற்கு வரலாமா?

QED – பைலட் வண்டியை தொடரட்டுமா?

QEF – நான் எனது பார்க்கிங் பகுதிக்கு சரியாக வந்துவிட்டேனா?

QEG – எனது பார்க்கிங் ஏரியாவில் இருந்து புறப்படலாமா?

QEH – ….……. என்ற எண் கொண்ட ஓடுதளத்தில் நிலைத்திருக்கட்டுமா?

QEJ – பறத்தலுக்கு தயாரான நிலையில் உள்ளேனா?

QEK – உடனடி பறத்தலுக்கு தயாரா?

QEL – பறக்கலாமா?

QEM – இறங்கும் இடத்தின் தற்போதைய நிலைமை என்ன?

QEN – என்னுடைய நிலையிலேயே இருக்கட்டுமா?

QEO – ஓடுதளத்தில் இருந்து வெளியேறட்டுமா?

QES – எனது வலது புற சுற்றுப்பாதையின் இடம் ……?

QFA – தற்சமயம் நான் உள்ள இடத்தின் வானிலை அறிக்கையைக் கூறுங்கள்.

QFB – எனது அணுகுமுறை மற்றும் ஓடுதளத்தின் வெளிச்சம்?

QFC – நான் இருக்கும் இடத்தின் உயரம், மேகங்களின் அளவு ஆகியவற்றைக் கூறவும்.

QFD – கண்ணுக்கு தெரியும் கலங்கரை விளக்கம் செயல்பாட்டில் உள்ளதா?

QFE – எனது உயரத்தினை அளக்கும் கருவியை சரிசெய்து கொள்ளட்டுமா?

QFF – கடல் மட்டத்தில் இருந்து தற்போதைய வளிமண்டல அழுத்தத்தினைக் கூறவும்.

QFG – நான் சரியாக மேலே இருக்கிறேனா?

QFH – மேகத்திற்கு கீழே இறங்குகிறேனா?

QFI – விமான நிலைய ஒளி விளக்குகள் எரிகின்றனவா?

QFL – வான வேடிக்கை கொடுக்கக் கூடிய ஒளி விளக்குகளை ஒளிரவிடட்டுமா?

QFM – தற்சமயம் விமானம் பறந்துகொண்டிருக்கும் உயரத்திலேயே பறக்கட்டுமா?

QFO – உடனடியாக இறங்கட்டுமா?

QFP – தற்சமயம் இறங்கக்கூடிய இடத்தின் தகவல்களை கொடுக்க முடியுமா?

QFQ – ஓடு தளத்தின் ஒளி விளக்குகளை ஒளிரவிடட்டுமா?

QFR – விமானம் இறங்க உதவி செய்யும் எனது landing gear சேதமடைந்துவிட்டது?

QFS – வானொலி பெட்டி ……. இடத்தில் கேட்கும் வசதியுடன் உள்ளதா?

QFT – எந்த உயரத்தில் பனிக்கட்டி உள்ளதாக அறிகிறீர்கள்?

QFU – காந்தபுல திசை ஓடுதளத்திற்கு அருகில் உள்ளதா?

QFV – ஒளி வெள்ளத்தினை பாய்ச்சக் கூடிய ஒளி விளக்குகள் எரிகின்றனவா?

QFW – ஓடு தளத்தின் நீளம் என்ன?

QFX – நிரந்தரமாக அமைக்கப்பட்டுள்ள ஏரியலின் துணையில் செயல்படுகிறேன்.

QFY – இப்பொழுது நான் இறங்கக்கூடிய இடத்தின் வானிலை நிலவரத்தினைக் கூறவும்.

QFZ – ……. மணி நேரத்தில் இருந்து …… வரை விமான நிலையத்தின் வானிலை எவ்வளவு?

QGC – ஓடுதளத்தில் ஒரு சில இடைஞ்சல்கள் உள்ளது.

QGD – என்னுடைய வழியில் ஏதேனும் தடங்கள், என்னுடைய உயரத்தில் வேறு ஏதேனும் பறக்கின்றனவா?

QGE – நான் இருக்கும் இடத்தில் இருந்து உங்கள் நிலையம் அமைந்துள்ள தூரம் எவ்வளவு?

QGH – செயல்படு முறையில் நான் இறங்கட்டுமா?

ஆகிய இந்த க்யூ குறியீடுகள் வான்வழி விமான தொலைத்தொடர்புக்கு பயன்படுத்தப்பட்டு வருகிறது.

Saturday, April 07, 2018

சென்னைப் பல்கலைக்கழக பாடத்திட்டத்தில் ஹாம் வானொலி




 ஹாம் வானொலி வரலாற்றில் முதல் முறையாக ஒரு பல்கலைக்கழகம் ஹாம் வானொலியை பாடத்திட்டத்தில் கொண்டு வந்துள்ளது. சென்னைப் பல்கலைக்கழகத்தின் இதழியல் மற்றும் தொடர்பியல் துறை ‘ஹாம் வானொலி’ (Ham Radio) என்ற ஒரு விருப்பத் (Elective) தாளை கொண்டு வந்துள்ளது. சென்னைப் பல்கலைக்கழகத்தில் எந்த படிப்பினைப் படிக்கும் மாணவரும்,  இந்தத் தாளை எடுத்துப் படிக்கலாம். முதுகலைப் பாடத்திட்டத்தில் கொண்டுவரப்பட்டுள்ள இந்தத் தாளை தெரிவு செய்வதன் ஊடாக அந்த மாணவர்கள், தனிப்பட்ட முறையில் ஹாம் தேர்வினை எழுதவும் வழிகாட்டப்படுவார்கள். ஆறு மாதங்கள் இந்த தாளானது வகுப்பில் எடுக்கப்படும். ஆர்வம் உள்ள மாணவர்கள் நேரடியாக ஹாம் தேர்வினையும் எழுத வழிவகை செய்யப்படும்.

அமெரிக்காவின் ARRL மற்றும் பிரிட்டனின் RSGB ஆகியவை இது போன்ற திட்டங்களுக்கு முன்னுரிமை கொடுத்து வருகிறது. அந்த வகையில் உலக அளவில் முதன் முறையாக இது போன்ற ஒரு படிப்பு முதுகலையில் அறிமுகம் செய்யப்படுவது இதுவே முதல் முறை. இது பற்றிய முழுமையான விபரங்களை www.arrl.org/amateur-radio-in-the-classroom எனும் முகவரியில் சென்று தெரிந்து கொள்ளலாம்.

அமெரிக்காவில் உள்ள பள்ளி, கல்லூரி மற்றும் பல்கலைக்கழகங்களில் ஹாம் ரேடியோ பற்றிய விழிப்புணர்வை ஏற்படுத்துவதற்காக Radio Waves எனும் இதழினை ஏ.ஆர்.ஆர்.எல். வெளியிட்டு வருகிறது. இது இலவசமாகவே http://www.arrl.org/radio-waves  எனும் இணைய முகவரியில் கிடைக்கிறது. இதன் மூலம், பள்ளிக் குழந்தைகள் மற்றும் இளைஞர்கள் மத்தியில் ஹாம் வானொலித் தொடர்பான விழிப்புணர்வை தூண்டுவதாக உள்ளது.