இந்தியாவில் மாநில அரசு வானொலி ஒலிபரப்பைச் செய்த கதை உங்களுக்குத் தெரியுமா? இதோ இந்த கட்டுரை அந்தத் தகவலை விரிவாகச் சொல்கிறது.
தமிழகத்தில் மாநில அரசு வானொலி ஒலிபரப்பு தொடங்கிய வரலாற்றை ஆராய்ந்தால், சென்னை நகரின் பங்கு முக்கியத்துவம் வாய்ந்ததாகும். 1929-ம் ஆண்டு மே மாதம், இந்திய ஒலிபரப்பு நிறுவனத்திடமிருந்து உரிமம் பெற்ற சென்னை மாநகராட்சி, வானொலி சேவையைத் தொடங்கியது. ரிப்பன் கட்டடத்தில் அமைந்த ஸ்டுடியோவிலிருந்து தினமும் மாலை 5.30 முதல் 7 மணி வரை அறிவிப்பு மற்றும் இசையை ஒலிபரப்பு செய்யும் திட்டம் வகுக்கப்பட்டது.
ரிப்பன் கட்டடத்தில் நிறுவப்பட்ட அண்டனாவுடன் கூடிய ஒலிபரப்பு கருவி, சென்னை நகரின் பல்வேறு பகுதிகளில் தெளிவாக ஒலி கேட்கும் வகையில் வடிவமைக்கப்பட்டது. மேலும், கோடை காலங்களிலும் வடக்கே விசாகப்பட்டினம் முதல் தெற்கே கொழும்பு வரை உள்ள தொலைதூரங்களிலும் பல வால்வுள்ள வானொலிகளைக் கொண்டு இந்த ஒலிபரப்பை கேட்க முடிந்தது. இதற்காக பல்வேறு இடங்களிலில் உள்ள நேயர்களிடன் இருந்து பாராட்டு கடிதங்கள் வந்தன.
நகரின் பல்வேறு இடங்களுக்கு நகரும் நான்கு சக்கர ரப்பர் டயர் வண்டியில் பொருத்தப்பட்ட ரேடியோ லவுட்ஸ்பீக்கர் கருவியைப் பயன்படுத்தி சோதனைகள் மேற்கொள்ளப்பட்டன. இதன் மூலம் பொதுமக்கள் ரிப்பன் கட்டடத்திலிருந்து ஒலிபரப்பப்படும் நிகழ்ச்சிகளைக் கேட்க முடிந்தது. ஆனால், அப்போது மக்கள் வானொலி தொழில்நுட்பம் குறித்து தெளிவற்றவர்களாக இருந்தனர். பலர், கல்விமான்கள் உட்பட, லவுட்ஸ்பீக்கர்களில் இசை கேட்டதும் ஆச்சரியப்பட்டு, இசைக்கலைஞர்கள் அந்தப் பெட்டியினுள் இருப்பதாக நினைத்தனர். அப்போது சென்னை மாநகராட்சியிடம் போதுமான லவுட்ஸ்பீக்கர் கருவிகள் இல்லாததால், அனைத்து வரி செலுத்துவோருக்கும் வானொலி இசையின் பயனை வழங்க முடியவில்லை.
வழக்கமான வானொலி சேவை 1930 ஆம் ஆண்டு ஏப்ரல் 1 ஆம் தேதி தொடங்கியது. அப்போதைய சென்னை மாநகராட்சி தலைவர் தேவான் பகதூர் ஏ. ராமசாமி முதலியார் இச்சேவையைத் தொடங்கி வைத்தார். வானொலி ஒலிபரப்பை நிர்வகிக்க, சபை உறுப்பினர்களிடமிருந்து அமைக்கப்பட்ட ஒரு வானொலி குழுவை சபை நியமித்தது. இந்தக் குழு உறுப்பினர்களைத் தேர்ந்தெடுக்கும் முறைகள் குறித்த தகவல்கள் தெளிவாக இல்லை. குழு உறுப்பினர்கள் அல்லாத தலைவர் அல்லது மேயர் மற்றும் ஆணையர் ஆகியோர் எடுக்கப்பட்ட முடிவுகளில் பங்கேற்றனர்.
கலைஞர்களைத் தேர்ந்தெடுத்து அவர்களுக்கு ஊதியம் நிர்ணயிப்பது குழுவின் முக்கிய கடமைகளாகும். குழு உறுப்பினர்களில் ஒருவர் கூட்டங்களுக்குத் தலைமை தாங்கும் ஒருங்கிணைப்பாளராக அல்லது தலைவராகத் தேர்ந்தெடுக்கப்பட்டார். வானொலி குழுவுக்கான தேர்தல் ஒவ்வொரு ஆண்டும் தொடக்கத்தில் நடைபெற்றது. 1930-31 ஆம் ஆண்டில், எஸ். சத்தியமூர்த்தி, திருமதி பால் அப்பாஸ்வாமி, ராவ் பகதூர் பி. ரங்கநாதன் செட்டி மற்றும் எப்.ஈ. ஜேம்ஸ் ஆகியோர் வானொலி குழு உறுப்பினர்களாகத் தேர்ந்தெடுக்கப்பட்டனர். இவர்களில் எஸ். சத்தியமூர்த்தி ஒருங்கிணைப்பாளராகப் பணியாற்றினார். சென்னை மாநகராட்சியின் மின்னணுப் பொறியாளரான ராவ் பகதூர் சி.வி. கிருஷ்ணசாமி செட்டி வானொலி சேவையின் பொறுப்பாளராக இருந்தார். எஸ்.எம். பட்டங்கர் மற்றும் டி. கோதண்டராமையா முறையே ஸ்டுடியோ நடத்துநர் மற்றும் வயர்லெஸ் ஆபரேட்டர் பதவிகளை வகித்தனர்.
என்ன ஒரு அதிசயம். சென்னை மாநகராட்சி தமிழக அரசு சார்பில் ஒரு வானொலியை நடத்தியுள்ளது. இது இன்றைய பெருமாநகராட்சியில் உள்ள பணியாளர்கள் யாருக்கும் தெரிய வாய்ப்பில்லை. உண்மையில் இது ஒரு முக்கிய செய்தி தான்.
உதவிய நூல்கள் மற்றும் அறிக்கைகள்:
Corporation of Madras - Administration Report 1929-30, pp.90 & 91.
Madras Corporation Broadcasting Service - Annual Report for the year 1937-38, p.5.
C. V. Krishnaswamy Chetty, 'Vanoli', 1 January 1939, p.5.
Census Report of India 1931, Vol. XIV, Madras, Part II, p.20.
Corporation of Madras, Broadcasting Service Report for the year 1937-38, p.2.
