இலங்கை ஒலிபரப்புக் கூட்டுத்தாபனம்: முஸ்லிம் சேவை

 நூற்றாண்டு காணும் இலங்கை வானொலி: சிறப்பு கட்டுரைத் தொடர் - 13

 

இலங்கை ஒலிபரப்புக் கூட்டுத்தாபனத்தின் (SLBC) முஸ்லிம் சேவை, இலங்கையில் வாழும் இஸ்லாமிய சமூகத்தின் ஆன்மீக, சமூக மற்றும் பண்பாட்டுத் தேவைகளைப் பூர்த்தி செய்யும் ஒரு முக்கிய ஊடகப் பிரிவாகச் செயல்படுகிறது. வாரம் முழுக்க ஒலிபரப்பப்பட்டாலும் ஒரு நாள் மட்டும் ஒலிபரப்பாகும் நிகழ்ச்சி நிரலை இங்கு பதிவு செய்கிறோம். இது 2000 ஜனவரியில் ஒலிபரப்பட்ட நிகழ்ச்சிகளாகும், குர்ஆனியக் கல்வியில் தொடங்கி, சமூக விவாதங்கள், கீதங்கள் மற்றும் வரலாற்றுக் குறிப்புகள் வரை பலதரப்பட்ட உள்ளடக்கங்களை உள்ளடக்கி, செவிமடுப்பவர்களின் வாழ்க்கைத் தரத்தை மேம்படுத்தும் நோக்கத்துடன் வடிவமைக்கப்பட்டுள்ளது இந்த நிகழ்ச்சிகள். முஸ்லிம் சேவையின் ஒவ்வொரு நிகழ்ச்சியும், இஸ்லாமிய விழுமியங்களையும், சமூக நல்லிணக்கத்தையும் பேணிக்காக்கும் நோக்குடன் ஒலிபரப்பப்படுகின்றன.

திங்கட்கிழமை நிகழ்ச்சிகள், காலை 5:45 மணிக்கு ஒலிபரப்பாகத் தொடங்கியது “இஸ்லாமிய நற்சிந்தனை”யுடன் ஆரம்பமாகி, கேட்பவர்களுக்கு ஒரு நேர்மறையான ஆன்மீகத் தொடக்கத்தை வழங்குகியது எனலாம். இந்தச் சிந்தனை, அன்றாட வாழ்வில் இஸ்லாமியக் கோட்பாடுகளைப் பின்பற்றுவதற்கான தூண்டுதலை முஸ்லிம் நேயர்களுக்கு அளித்தது. அதன் பிறகு, காலை 9:00 மணிக்கு “அல் குர்ஆன் முறத்தல்” நிகழ்ச்சி ஒலிபரப்பாகியது. குர்ஆனைப் பிழையின்றி ஓதுவதன் முக்கியத்துவத்தை வலியுறுத்கிய இந்த நிகழ்ச்சி, இஸ்லாமிய நேயர்களை குர்ஆனுடன் இணைக்க உதவியது. தொடர்ந்து 9:05 மணிக்கு “மாதர் மஜ்லிஸ் – நேரடித் தொலைபேசி நிகழ்ச்சி” ஒலிபரப்பாகியது. இது இஸ்லாமியப் பெண்மணிகளின் வாழ்வியல் சிக்கல்கள், சமூகப் பங்களிப்புகள் மற்றும் மார்க்க ரீதியான சந்தேகங்களுக்கான விவாதக் களமாகச் செயல்பட்டது. பெண்களின் குரலுக்கு முக்கியத்துவம் அளிக்கும் இம்முயற்சி, முஸ்லிம் சேவையின் சமூகப் பொறுப்புணர்வை வெளிப்படுத்துகிறது.

காலை 10:00 மணிக்கு ஒளிபரப்பாகிய “இன்றைய மதரஸாக்கள்” நிகழ்ச்சி, இலங்கையில் இயங்கி வரும் இஸ்லாமியக் கல்வி நிறுவனங்களின் பங்களிப்பு, கற்பித்தல் முறைகள் மற்றும் அதன் முக்கியத்துவத்தை விவாதித்தது. மதக் கல்வி வளர்ச்சியில் இந்த நிகழ்ச்சியின் பங்கு குறிப்பிடத்தக்கது. 10:25 மணிக்கு ஒலிபரப்பாகிய “நேயர் தெரிவில் இஸ்லாமிய கீதங்கள்” நிகழ்ச்சி, நேயர்களின் விருப்பத்திற்கேற்பத் தேர்ந்தெடுக்கப்பட்ட இஸ்லாமியப் பாடல்களை ஒலிபரப்பி, பொழுதுபோக்கு அம்சத்துடன் கூடிய ஆன்மீக இன்பத்தை வழங்கியது. இந்தப் பாடல்கள், இஸ்லாமிய கலாசார விழுமியங்களை இசையின் ஊடாகப் பரப்பின. தொடர்ந்து, 10:55 மணிக்கு ஒலிபரப்பாகிய “கஸீதா” நிகழ்ச்சி, பாரம்பரிய இஸ்லாமியப் புகழ்ப் பாடல்கள் மற்றும் பக்திப் பாடல்களின் முக்கியத்துவத்தையும், அவற்றின் இலக்கியச் செழுமையையும் எடுத்துரைத்தது. இந்த இடைப்பட்ட கால நிகழ்ச்சிகள், கல்வி மற்றும் கலை ஆகிய இரண்டிற்கும் முக்கியத்துவம் அளித்து, நேயர்களைக் கட்டிப்போடும் விதமாக வடிவமைக்கப்பட்டிருந்தன.

இரவு 8:00 மணிக்கு முஸ்லிம் சேவையின் மற்றொரு முக்கியமான பகுதி தொடங்குகியது. 8:00 மணிக்கு “அல் குர்ஆன் பொழிப்புரை” ஒலிபரப்பாகி, குர்ஆனின் வசனங்களுக்கு ஆழமான விளக்கங்களை அளித்தது. இது, சாதாரண மக்கள்கூட குர்ஆனின் செய்தியை எளிதில் புரிந்துகொள்ள உதவியது. தொடர்ந்து, 8:05 மணிக்கு, மெளல்வி எம்.ஐ.அப்துல் ரஸ்ஸாக் அவர்கள் உரையாற்றிய “இஸ்லாமிய விழுமியங்கள்” நிகழ்ச்சி இடம்பெற்றது. இந்தப் பகுதி, இஸ்லாமிய வாழ்வியலில் கடைபிடிக்க வேண்டிய ஒழுக்க நெறிகள், பண்புகள், மற்றும் மனிதநேய விழுமியங்களை வலியுறுத்தி, சமூகத்தின் அறநெறி மேம்பாட்டுக்குத் துணைபுரிந்தது. ஒரு ஆளுமையின் வாயிலாக இந்த விழுமியங்களைப் பேசுவது, அவற்றின் தாக்கத்தை நேயர்கள் மத்தியில் அதிகப்படுத்தியது குறிப்பிடத்தக்கது.

இரவு 8:15 மணிக்கு ஒலிபரப்பாகிய “முஸ்லிம் சமூக கலாசாரச் செய்திகள்” மற்றும் “முஸ்லிம் உலகம் – வாரமஞ்சரி” தொகுப்பு (ஹில்மி முஹம்மத் அவர்களால் தொகுக்கப்பட்டு ஒலிபரப்பாகியது) ஆகியவை இலங்கை முஸ்லிம் சமூகத்திலும் உலக அரங்கிலும் நடைபெறும் முக்கிய அரசியல், சமூக மற்றும் கலாசார நிகழ்வுகளைப் பற்றிய விரிவான தகவல்களை வழங்குகின. இது, இஸ்லாமியச் சமூகத்தை உள்ளூர் மற்றும் உலகளாவிய சூழல்களுடன் இணைக்க உதவியது. 8:20 மணிக்கு “இஸ்லாமிய கீதம் (விசேடம்)” மற்றும் “அஹதியா தொகுப்புரை” ஆகியவை ஒலிபரப்பாகின. அஹதியா என்பது சிறுவர்களுக்கான இஸ்லாமியப் பாடசாலை இயக்கத்தைக் குறிக்கும். இந்தத் தொகுப்புரை, இளைஞர்கள் மற்றும் சிறுவர்களுக்கான மார்க்கக் கல்வி, வரலாறு, மற்றும் இஸ்லாமிய விழுமியங்களை இலகுவான முறையில் கற்றுக்கொடுக்கப்பட்டது. இது, அடுத்த தலைமுறைக்கு இஸ்லாமியப் பண்பாட்டை எடுத்துச் செல்லும் மகத்தான பணியை முஸ்லிம் சேவை மேற்கொள்வதைக் காட்டுகிறது.

இரவு 8:30 மணிக்கு ஒலிபரப்பாகிய “வரலாற்றில் ஓர் ஏடும் குறிப்பும்” மற்றும் “ஸல்வாதீதும்” ஆகிய நிகழ்ச்சிகள், இஸ்லாமிய வரலாறு, அதன் முக்கிய ஆளுமைகள் மற்றும் நிகழ்வுகளைப் பற்றி விவாதித்தன. வரலாற்றில் இருந்து பாடங்களைக் கற்றுக்கொள்வதற்கும், இஸ்லாத்தின் பங்களிப்புகளைப் புரிந்துகொள்வதற்கும் இவை உதவின. இதைத் தொடர்ந்து, இரவு 8:55 மணிக்கு பரீன் அப்துல் காதர் அவர்களால் நடத்தப்பட்ட “சொற்சமர்” நிகழ்ச்சி, ஒரு விவாத மேடையாகச் செயல்பட்டு, சமூகத்தில் நிலவும் சமகாலப் பிரச்சினைகள் அல்லது மார்க்கக் கேள்விகளுக்குப் பதிலளித்தது. நிறைவாக, இரவு 10:00 மற்றும் 10:20 மணிக்கு “சங்ஸகுர்திக சங்கராவ” (தொகுப்பு: மிஸ்ருல் ஹனீமா இஷ்ஹாக்) போன்ற நிகழ்ச்சிகளுடன் திங்கட்கிழமை ஒலிபரப்பு நிறைவடைந்தது. இலங்கை ஒலிபரப்புக் கூட்டுத்தாபனத்தின் முஸ்லிம் சேவையானது, வெறும் ஆன்மீகத்தைப் பரப்புவது மட்டுமல்லாமல், கல்வி, கலை, சமூக விழிப்புணர்வு மற்றும் வரலாற்றுக் கல்வி ஆகியவற்றின் மூலம் இஸ்லாமிய சமூகத்திற்கு ஒரு முழுமையான தகவல் தளத்தை வழங்குகியது எனலாம்.

 

இலங்கை ஒலிபரப்புக் கூட்டுத்தாபனம்: தேசிய சேவை

  நூற்றாண்டு காணும் இலங்கை வானொலி: சிறப்பு கட்டுரைத் தொடர் - 12

 

இலங்கை ஒலிபரப்புக் கூட்டுத்தாபனத்தின் தேசிய சேவை, இலங்கையில் வாழும் தமிழ் பேசும் மக்களின் கலை, கலாசாரம், ஆன்மீகம், மற்றும் அன்றாடத் தகவல்களைப் பூர்த்தி செய்யும் ஒரு முக்கிய ஊடகமாகத் திகழ்கிறது. தேசிய சேவையில் வாரம் முழுக்க ஒலிக்கும் அனைத்து நிகழ்ச்சிகளைப் பற்றியும் பதிவு செய்ய வேண்டும் என்ற அவா இருப்பினும் காலம் கருதி வாரத்தின் முதல் நாளான திங்கட்கிழமைக்கான அதன் ஒலிபரப்பு அட்டவணையை இங்கு பதிவு செய்ய விரும்புகிறோம். இவை 2000ஆம் ஆண்டில் ஒலிபரப்பான நிகழ்ச்சிகள். இன்றைய நிகழ்ச்சிகளில் மாற்றம் ஏற்பட்டு இருக்கலாம்.

 காலை முதல் இரவு வரை பலதரப்பட்ட நிகழ்ச்சிகளின் தொகுப்பாக, மக்களைப் பக்தி, இசை, செய்திகள் மற்றும் அறிவு சார்ந்த உள்ளடக்கங்களுடன் இணைக்கிறது தேசிய சேவை. இந்த நிகழ்ச்சி நிரலானது, பலதரப்பட்ட சமூகத்தின் ஆன்மீகத் தேவைகளுக்கும், பொழுதுபோக்கு அம்சங்களுக்கும் முக்கியத்துவம் கொடுக்கும் வகையில் வடிவமைக்கப்பட்டுள்ளது சிறப்பம்சமாகும்.

திங்கட்கிழமை தேசிய சேவையின் ஒலிபரப்பு, அதிகாலை 5:00 மணிக்கு "நாதவந்தனம்" எனும் இறைவணக்கத்துடன் ஆன்மீகச் சிந்தனையுடன் தொடங்குகியது. இதனைத் தொடர்ந்து, 5:05 மணிக்கு "தேவாரம்", 5:10 மணிக்கு "பாமாலை", மற்றும் 5:20 முதல் 6:00 மணி வரை நீடிக்கும் பல்வேறு மதங்களைச் சார்ந்த நற்சிந்தனைகள் (சைவ நற்சிந்தனை, இஸ்லாமிய நற்சிந்தனை, கிறிஸ்தவ கத்தோலிக்க நற்சிந்தனை, போதிமாதவனின் போதனைகள், துதிப்பாடல்கள்) ஆகியவை இடம் பெற்றன. இந்த காலை நேர நிகழ்ச்சிகள், மக்கள் தங்கள் நாளை ஒரு நேர்மறையான, பக்திபூர்வமான சிந்தனையுடன் தொடங்க உதவுகின்றன. காலை 6:30 மணிக்கு "செய்திகள்" மற்றும் 7:00 மணிக்கு "மாகாணச் செய்திகள்" ஆகியவை ஒலிபரப்பாகி, மக்கள் அன்றாட முக்கிய நிகழ்வுகளைத் தெரிந்துகொள்ள உதவியது. 7:30 மணிக்கு ஒலிபரப்பாகும் "உலகச் செய்திகள்" சர்வதேச நிகழ்வுகளை அறிந்து கொள்ள வழிவகுத்தது. 7:40 மணிக்கு "காற்றினில் ஒரு கீதம்" நிகழ்ச்சி, காலையின் இதமான தொடக்கத்திற்கு மெருகூட்டியது எனலாம்.

காலை 7:45 மணிக்கு, வாரத்தின் நாட்களைப் பொறுத்து "கிராமிய இசை" (2, 4ம் வாரம்) அல்லது "இசையரங்கம்" (1, 3, 5ம் வாரம்) என மாறுபடும் இசை நிகழ்ச்சிகள் இடம்பெற்று, செவிக்கு விருந்தளித்தன. கலை மற்றும் கல்விச் சேவைகளுக்கு முக்கியத்துவம் அளிக்கும் விதமாக, காலை 8:00 மணிக்கு "கல்விச் சேவை" ஒலிபரப்பாகியது. மேலும், 9:00 மணிக்கு "முஸ்லிம் சேவை" தனிப்பட்ட சமூகத்திற்கான நிகழ்ச்சிகளை வழங்குகிறது. காலை 9:30 மணிக்கு ஒலிபரப்பாகும் "நவசக்தி" நிகழ்ச்சி, சமூகம் சார்ந்து, பொதுநலன் சார்ந்த உள்ளடக்கத்தைக் கொண்டிருந்தது. தொடர்ந்து, 9:45 மணிக்கு ஒலிபரப்பாகிய "நேர்காணல்" நிகழ்ச்சி, முக்கிய ஆளுமைகள் அல்லது துறைசார் வல்லுநர்களின் கருத்துக்களை மக்களுக்கு எடுத்துச் செல்லும் ஒரு தகவல் தொடர்பு பாலமாகச் செயல்பட்டது. இந்த நிகழ்ச்சிகள், மக்களைச் சிந்திக்கத் தூண்டுவதோடு, நாட்டின் பல்வேறு கோணங்களில் உள்ள தகவல்களையும், சமூகச் சேவைகளையும் தெளிவுபடுத்தின.

நண்பகல் 12:00 மணிக்கு ஒலிபரப்பாகிய "நாளும் ஒருவலம்" நிகழ்ச்சி, அன்றைய தினத்தின் நிகழ்வுகளை ஒரு சுற்றுப்பார்வையாக வழங்குவதாக அமைந்தது. 12:45 மணிக்கு "செய்திகள் - அறிவிப்பு"க்குப் பிறகு, 1:00 மணிக்கு "ஆணிமுத்து" மற்றும் 1:30 மணிக்கு "மதுர கீதம்", 2:00 மணிக்கு "தேன் மதுரம்" போன்ற நிகழ்ச்சிகள், கேட்க இனிமையான இசை மற்றும் பொழுதுபோக்கு அம்சங்களை வழங்கின. மாலை 5:00 மணிக்கு ஒலிபரப்பு மீண்டும் தொடங்குகிறது. "மெல்லிசைப் பாடல்கள.." தொடங்கி, 5:15 மணிக்கு "குரல் வகை" மற்றும் 5:30 மணிக்கு கிராமிய வாழ்வின் பிரதிபலிப்பாக "களத்துமேடு" ஆகியன இடம்பெற்றன. மாலை 5:45 மணிக்கு ஒளிபரப்பாகிய "வயலோடு வசந்தங்கள் - விவசாய நாடகம்" நிகழ்ச்சி, விவசாயம் மற்றும் கிராமிய வாழ்க்கை முறை குறித்த விழிப்புணர்வையும், பொழுதுபோக்கையும் ஒருங்கே வழங்கியது. இந்த நிகழ்ச்சிகளின் தொகுப்பு, கிராமப்புற மற்றும் நகர்ப்புற மக்களின் பொழுதுபோக்குத் தேவைகளைப் பூர்த்தி செய்யும் வகையில் அமைந்திருந்தது.

மாலை 6:00 மணிக்கு "செய்திகள்" ஒலிபரப்பாகி, மக்கள் தங்கள் அன்றாட வேலைகளை முடித்த பிறகு அன்றைய முக்கியத் தகவல்களை அறிந்து கொள்ள உதவியது. அதனைத் தொடர்ந்து, 6:10 மணிக்கு "அறிவிப்புகள்-தேசபக்திப்பாடல்கள்" மற்றும் 6:15 மணிக்கு "ஒற்றுமை கீதம்" ஆகியன, தேசபக்தி உணர்வையும் தேசிய நல்லிணக்கத்தையும் ஊக்குவித்தன. மாலை 6:20 மணிக்கு ஒலிபரப்பாகிய "மெல்லிசைப் பாடல்கள்" நிகழ்ச்சி, மனதை இலகுவாக்குகியது. 6:30 மணிக்கு ஒலிபரப்பாகிய "சமயசாரம்" நிகழ்ச்சி, பல்வேறு மதங்களின் அடிப்படைக் கொள்கைகள் மற்றும் அதன் முக்கியத்துவத்தைப் பற்றி எடுத்துரைத்த ஆன்மீகத் தொடராக இருந்தது. இரவு 7:00 மணிக்கு ஒலிபரப்பாகிய "இதய சங்கமம்" நிகழ்ச்சி, இரவுப் பொழுதின் அமைதிக்கு ஏற்ற வகையில், ஒரு ரம்மியமான அனுபவத்தை நேயர்களுக்கு வழங்குவதாக அமைந்தது.

இரவு 8:00 மணிக்கு ஒலிபரப்பாகிய "முஸ்லிம் நிகழ்ச்சிகள்" ஒரு மணி நேரம் முஸ்லிம் சமூகத்திற்கான உள்ளடக்கத்தை வழங்குகியது. இரவு 9:00 மணிக்கு மீண்டும் "செய்திகள்" வழங்கப்பட்டு, நாள் முடிவுக்கு முந்தைய முக்கிய நிகழ்வுகளைச் சுருக்கமாகத் தந்தது. 9:20 மணிக்கு "பக்திப் பாடல்கள்" மீண்டும் ஆன்மீகச் சிந்தனையைத் தூண்டுகிறது. இரவு 10:15 மணிக்கு ஒலிபரப்பாகிய "இசை ஆய்வரங்கம்" (5ம் வாரம்) அல்லது "சிந்தை உவந்திடும் விந்தைக் கலைகள்" (2, 4ம் வாரம்) மற்றும் 10:45 மணிக்கு ஒலிபரப்பாகிய "பண்ணும் பரதமும்" (1, 3, 5ம் வாரம்) போன்ற நிகழ்ச்சிகள், இசையையும், கலையையும் ஆழமாக ஆராய்ந்து, அவற்றின் நுணுக்கங்களைப் பற்றி மக்களுக்குத் தெரிவித்தன. நிறைவாக, 11:00 மணிக்கு ஒலிபரப்பாகிய "நினைவில் நிறைந்தவை" நிகழ்ச்சியுடன் திங்கட்கிழமைக்கான ஒலிபரப்பு நிறைவடைந்தது. இந்த நிகழ்ச்சி நிரல், தகவல், அறிவு, ஆன்மீகம், மற்றும் பொழுதுபோக்கு ஆகிய அனைத்து அம்சங்களையும் உள்ளடக்கி, ஒரு நிறைவான ஒலிபரப்பு அனுபவத்தை வழங்குகிறது எனலாம். நூற்றாண்டைக் கொண்டாடும் இந்தத் தருணத்தில் இலங்கை வானொலி தேசிய சேவை நிகழ்ச்சிகளைப் இங்கு பதிவு செய்வது மிக முக்கியமான ஒன்றாகும்.

ஆகாஷ்வாணி 90 - சிறப்பு நேர்காணல்

 ஆகாஷ்வாணி 90 ஆண்டுகளை கொண்டாட உள்ள இந்த சமயத்தில், திருமதி. ராஜ ராஜேஸ்வரி தயாரிப்பில், யாம் பங்கேற்ற  சிறப்பு வானொலி நேர்காணல் நிகழ்ச்சி இன்று 16-12-2025 (பாகம் 1) மற்றும் வரும்  28-12-2025 (பாகம் 2) ஆகிய தேதிகளில் ஒலிபரப்பாகிறது; இந்த நிகழ்ச்சியை சென்னை முதன்மை அலைவரிசையில் காலை 08:45 மணிக்கும், FM ரெயின்போ அலைவரிசையில் மதியம் 02:15 மணிக்கும், மற்றும் விவித் பாரதி தமிழ் அலைவரிசையில் இரவு 07:00 மணிக்கும் கேட்டு மகிழலாம். News On Air செயலி ஊடாகவும் கேட்கலாம். விரையில் யூடியூப்பில் பதிவேற்றிய தொடுப்பையும் இங்கே இணைக்கிறோம்.

இலங்கை ஒலிபரப்புக் கூட்டுத்தாபனம்: வர்த்தக சேவை

  நூற்றாண்டு காணும் இலங்கை வானொலி: சிறப்பு கட்டுரைத் தொடர் - 11

 

இலங்கை ஒலிபரப்புக் கூட்டுத்தாபனத்தின் வர்த்தக சேவை, தமிழ்ச் சமூகத்தின் கலை, இசை மற்றும் பொழுதுபோக்குத் தேவைகளைப் பூர்த்தி செய்வதில் ஒரு முன்னோடிப் பங்கைக் கொண்டு இருந்தது. அதன் நிகழ்ச்சிகள், காலைப் பொழுதிலிருந்து இரவு வரை, நேயர்களின் அன்றாட வாழ்க்கையின் ஒரு அங்கமாகவே திகழ்ந்தன. அதுவும் தமிழக நேயர்களின் மனதில் நீங்கா இடம் பெற்றன. கீழே கொடுக்கப்பட்டுள்ளது ஒரு உதாரணம் மட்டுமே. 1952 இல் இருந்து பல முக்கிய நிகழ்ச்சிகள் வர்த்தக சேவையில் ஒலிபரப்பாகியுள்ளன. நமக்கு கிடைத்த தரவுகளின் படி 2000த்தில் ஒரு திங்கட்கிழமை ஒலிபரப்பான நிகழ்ச்சிகள் இங்கு பதிவு செய்யப்படுகிறது. அந்தச் சேவையின் பரந்த மற்றும் பல்வகைப்பட்ட நிகழ்ச்சிகளின் தொகுப்பைப் பற்றி விரிவாக எழுதப் பல தகவல்கள் உண்டு. அவற்றையெல்லாம் தொகுத்தால் ஒரு பெரிய புத்தகமாகவே வெளியிடலாம்.

வர்த்தக சேவை தினமும் அதிகாலை 5:00 மணிக்கு "கீதாஞ்சலி" என்ற பக்திப் பாடல்களுடன் தொடங்குகிறது. இது நேயர்களுக்கு ஒரு நிம்மதியான தொடக்கத்தை அளிக்கிறது. அதைத் தொடர்ந்து, "ஆனந்த கானங்கள்" (5:15) மற்றும் காலத்தால் அழியாத பாடல்களைக் கொண்ட "என்றும் இனியவை" (5:30) நிகழ்ச்சிகள் 2000ஆம் ஆண்டில் ஒலிபரப்பாகின. காலை 6:00 மணிக்கு ஒலித்த "காலைத்தென்றல்" நிகழ்ச்சி, அன்றைய நாளுக்குரிய உற்சாகத்தை அளித்தது. காலை 6:30 மணிக்கு ஒலிபரப்பாகிய "செய்தி அறிக்கை" மூலம், நேயர்கள் அன்றைய முக்கிய நிகழ்வுகளை அறிந்துகொள்ளும் வாய்ப்பைப் பெற்றார்கள். நிகழ்ச்சிக் குறிப்புகள், சொந்தமான சந்தங்கள் மற்றும் 8:00 மணிக்கு ஒலித்த "பொங்கும் பூம்புனல்" போன்ற புகழ்பெற்ற நிகழ்ச்சி காலை நேரத்தை இசை மழையால் நிறைவு செய்தன.

நன்பகல் நிகழ்ச்சிகள், நேயர்களின் வெவ்வேறு ரசனைகளுக்கு ஏற்ப வடிவமைக்கப்பட்டு இருந்தன. 9:00 மணிக்கு "ரதமேறும் புதுராகம்" போன்ற நிகழ்ச்சிகள் பாரம்பரிய இசையை விரும்பும் நேயர்களைக் கவர்ந்தது எனலாம். காலை 9:01, 10:01, மற்றும் 15:00 மணிக்கு ஒலிபரப்பாகிய "செய்திச் சுருக்கம்" மூலம், செய்திகள் அவ்வப்போது வழங்கப்பட்டு இருக்கின்றன. 10:00 மணிக்கு ஒலித்த "கதம்பமாலை" பல்வேறு வகையான பாடல்களின் தொகுப்பைக் கொண்டிருந்தது. 11:00 மணிக்கு "பாட்டொன்று கேட்போம்" மற்றும் 11:30 மணிக்கு "திரை தந்த இசை" போன்ற நிகழ்ச்சிகள் திரைப்பட இசையின் முக்கியத்துவத்தை எடுத்துரைக்கின்றன. மதியம் 12:00 மணிக்கு ஒலித்த "நீங்கள் கேட்டவை" நேயர்களின் விருப்பப் பாடல்களுக்கான ஒரு பிரபலமான நிகழ்ச்சியாக இருக்கிறது எனலாம். மதிய உணவு நேரத்திற்குப் பிறகு 1:00 மணிக்கு "சித்திர கானம்" மற்றும் 1:30 மணிக்கு ஹிந்திப் பாடல்கள் போன்ற நிகழ்ச்சிகள் இந்திய நேயர்களுக்கு வித்தியாசமான ராகங்களை வழங்குகின்றன.

மதியத்திற்குப் பிந்தைய நிகழ்ச்சிகள், குறிப்பாகப் பெண்களுக்கு முக்கியத்துவம் அளித்தது. 2:30 மணிக்கு ஒலித்த "மகளிர் கேட்டவை" அவர்களுக்குச் சிறப்புத் தேர்வுகளை வழங்குகியது. "மலரும் மங்கையும்" (3:01) மற்றும் "முத்துக் குவியல்" (3:30) ஆகியவை மேலும் பல பொழுதுபோக்கு நிகழ்ச்சிகளாக அமைந்து இருந்தன. மாலையில் 4:30 மணிக்கு ஒலிக்கும் "இன்றைய நேயர்" நிகழ்ச்சி, நேயர்களுடன் ஒரு நேரடித் தொடர்பை ஏற்படுத்தியது எனலாம். இலங்கை மட்டுமல்லாது தமிழக நேயர்கள் மத்தியிலும் புகழ்பெற்ற நிகழ்ச்சியாக இது இருந்தது. இது வானொலி நிலையத்துக்கும் நேயர்களுக்கும் இடையே ஒரு நெருங்கிய பிணைப்பை உருவாக்கியது. 5:15 மணிக்கு ஒலிபரப்பாகிய "பிறந்தநாள் வாழ்த்துக்கள்" நேயர்களின் குடும்ப நிகழ்வுகளில் வானொலியின் பங்கை உறுதிசெய்தது. இந்த நிகழ்ச்சியின் ஊடாக இலங்கை வானொலி குடும்பதின் ஒரு அங்கமாகியது எனலாம். மாலை 5:30 மணிக்கு மீண்டும் ஒலித்த "நீங்கள் கேட்டவை" நிகழ்ச்சி, வேலை முடிந்து வீடு திரும்பும் மக்களுக்கு இசை விருந்தை அளித்தது. இந்த நிகழ்ச்சி நேயர்கள் மத்தியில் புகழ்பெற்றது என்பதாலேயே, மீண்டும் இந்த நிகழ்ச்சி அந்த காலத்தில் ஒலிபரப்பு செய்யப்பட்டது.

மாலை 6:00 மணிக்கு மீண்டும் ஒரு முழுமையான "செய்தியறிக்கை" வழங்கப்பட்டது. அதன் பிறகு 6:15 மணிக்கு "அந்திநேர சிந்துக்கள்" மற்றும் 7:00 மணிக்கு "தேனிசைத் தெரிவுகள்" போன்ற நிகழ்ச்சிகள், அன்றைய தினத்தின் இறுக்கத்தைக் நேயர்கள் மத்தியில் குறைத்தது, இரவுப் பொழுதிற்கு ஒரு அமைதியான சூழலை உருவாக்குகியது. இரவு 9:00 மணிக்கு மீண்டும் செய்திகள் அறிவிப்புகள் வழங்கப்பட்டன. நிறைவாக, இரவு 9:15 மணிக்கு "இரவின் மடியில்" நிகழ்ச்சி ஒலிபரப்பாகியது, இது கேட்பவர்களை நிம்மதியான உறக்கத்திற்குத் தயார்ப்படுத்தியது. வர்த்தக சேவை ஒலிபரப்பு இரவு 10:00 மணிக்கு நிறைவடைந்தது.

இந்த நிகழ்ச்சி நிரல், இலங்கை ஒலிபரப்புக் கூட்டுத்தாபனம் வர்த்தக சேவையானது இசை, செய்தி மற்றும் நேயர் பங்கேற்பு நிகழ்ச்சிகளின் மூலம் ஒரு சீரான மற்றும் பல்வகைப்பட்ட சேவையை வழங்கியது என்பதைத் தெளிவாகக் காட்டுகிறது. இவ்வாறான நிகழ்ச்சிகள் பல தலைமுறைகளுக்குப் பொழுதுபோக்கு ஊடகமாகச் செயல்பட்டு, இன்றும் நேயர்களின் நினைவில் நீங்கா இடம்பிடித்துள்ளன எனலாம்.

 

இலங்கை ஒலிபரப்புக் கூட்டுத்தாபனத்தின் வர்த்தக சேவை

 நூற்றாண்டு காணும் இலங்கை வானொலி: சிறப்பு கட்டுரைத் தொடர் - 10

இலங்கை வானொலியின் வர்த்தக சேவை 1950 செப்டம்பர் 30 ஆரம்பமானது. முதலில் ஆங்கிலம், சிங்களம் ஆகிய மொழிகளில் அறிவிப்பு செய்யப்பட்டது. அப்போது சிங்களப் பாடல்கள் அதிகம் இல்லாததால் இந்திப் பாடல்களை ஒலிபரப்பினார்கள். அறிவிப்பு மட்டும் சிங்களத்தில் இருந்தது. தமிழில் வர்த்தக ஒலிபரப்பு 1951 முற்பகுதியில் ஆரம்பமானது. ஆங்கில சேவையில் அறிவிப்பாளராக இருந்த டான் துரைராஜ் தமிழில் அறிவிப்புகளைச் செய்தார். காலை 10 மணி முதல் 10.30 வரை ஒலிபரப்பு சோதனை முறையில் இடம்பெற்றது. விளம்பரங்கள் அதிகம் வரவே, நேரம் அதிகரிக்கப்பட்டு ஜஸ்டின் ராஜ்குமார் அறிவிப்பாளராக நியமிக்கப்பட்டார். 1953 ஆம் ஆண்டு தென்னிந்தியாவுக்கான வர்த்தக சேவை ஆரம்பிக்கப்பட்டதால் மாலை 5.00 மணி முதல் 6.00 மணி வரை இரண்டு அறிவிப்பாளர்கள் தேவைப்பட்டார்கள். அப்போது எஸ். பி. மயில்வாகனம் அவர்கள் வர்த்தக சேவை அறிவிப்பாளராக நியமிக்கப்பட்டார். 

(தகவல்: ஜஸ்டின் ராஜ்குமார் - பன்முகப் பார்வையில் இலங்கை வானொலி. பக்கம் 112-115)

தென்னிந்தியாவுக்கான வர்த்தக சேவை 1953 அக்டோபர் 4 ஆரம்பிக்கப்பட்டது. மாலை 5.00 மணி முதல் 7.00 மணி வரை தமிழ் நிகழ்ச்சிகள் ஒலிபரப்பாகின.  4.30 முதல் 5.00 மணி வரை கன்னடம், மலையாளம் மொழிப் பாடல்கள் ஒலிபரப்பாகின. (தகவல்: திரு.உமா காந்தன்)

இலங்கை ஒலிபரப்புக் கூட்டுத்தாபனத்தின் வர்த்தக சேவையின் வரலாற்றையும், இலங்கைச் சமூகத்தின் மீது அதன் தாக்கத்தையும் இந்தக் கட்டுரை ஆராய்கிறது. 1983ஆம் ஆண்டு ஒரு முன்னோடிச் சேவையாக ஆரம்பிக்கப்பட்ட வர்த்தகச் சேவை, என்பதை வானொலி மஞ்சரியின் இந்த கட்டுரை தெரிவித்தாலும், வர்த்தக சேவை தொடங்கப்பட்டது என்னவோ 1951 என்பதே உண்மை என 

ஆதார ஆவணங்களின் பகுப்பாய்வு வெளிப்படுத்துகிறது. வர்த்தகர்கள், விவசாயிகள் மற்றும் பொதுமக்களுக்கு சந்தை நிலவரங்கள், அரசாங்கத் திட்டங்கள் மற்றும் உலக வர்த்தகச் செய்திகளை வழங்குவதன் மூலம் தமிழ் வர்த்தக சேவையானது சமூகப் பொருளாதார இடைவெளியைக் குறைப்பதற்கான ஒரு அத்தியாவசிய ஊடகமாகச் செயற்பட்டது. பிற்பாடு ஒலிபரப்பு நேரத்தை 50 சதவீதத்தால் அதிகரித்ததுடன், வணிகத் தகவல்களைத் தேடும் தமிழ் பேசும் சமூகத்தின் தேவைகளுக்குப் பதிலளிக்கும் விதமாக கூட்டுத்தாபனத்தின் புதிய அணுகுமுறையையும் குறிக்கிறது. இந்த கட்டுரையானது, பொது ஒலிபரப்பில் மொழிவாரி வர்த்தகத் தகவல் சேவையின் முக்கியத்துவத்தை வலியுறுத்துகிறது.

ஊடகமானது ஒரு நாட்டின் பொருளாதார வளர்ச்சியில் முக்கியப் பங்கு வகிக்கிறது. குறிப்பாக அபிவிருத்தியடைந்து வரும் நாடுகளில், தகவல்களைப் பரவலாக்குவதற்கும், வர்த்தகச் சமூகத்தின் ஆற்றலை மேம்படுத்துவதற்கும் வானொலியே முக்கியச் சாதனமாகக் காணப்படுகிறது. இலங்கை ஒலிபரப்புக் கூட்டுத்தாபனம் ஒரு தேசிய ஒலிபரப்பாளராக, நாட்டிலுள்ள அனைத்து சமூகத்தினருக்கும் செய்தி மற்றும் பொழுதுபோக்கிற்கு அப்பால், முக்கியமான சமூகப் பொருளாதாரத் தகவல்களை வழங்குவதில் கடமைப்பட்டுள்ளது.

இந்தக் கட்டுரையானது, இலங்கை வானொலியின் வர்த்தக சேவையின் தோற்றம், வளர்ச்சி மற்றும் தமிழ் பேசும் வர்த்தகச் சமூகத்திற்கு அதன் பங்களிப்பு ஆகியவற்றை ஆராய்வதை நோக்கமாகக் கொண்டுள்ளது. தமிழ் வணிக சமூகத்தினரின் பிரத்தியேகமான தேவைகளைப் பூர்த்தி செய்வதற்காக, விலை நிலவரங்கள், சந்தைப்படுத்தல் உத்திகள், மற்றும் சர்வதேசச் செய்திகள் ஆகியவற்றை வழங்குவதில் இந்தச் சேவையின் அவசியத்தைக் கட்டுரை  வலியுறுத்துகிறது. இச்சேவையின் உத்தியோகபூர்வ ஆரம்பம் 1983இல் ஆண்டில் அதன் ஒரு முக்கியமான விரிவாக்கம் நிகழ்ந்தமை ஆய்வுக்குரிய ஒரு முக்கியப் புள்ளியாகக் காணப்படுகிறது. இலங்கை வானொலியின் ஆனந்த சமரகோன் அரங்கில் தொடக்க விழா நடைபெற்றது. அமைச்சர் தர்மசிறி சேனநாயகா முறையாக வர்த்தகச் சேவையைத் தொடங்கி வைத்தார். 

இந்தக் கட்டுரைக்கான முதன்மைத் தரவு, பெப்ரவரி 1996ஆம் ஆண்டில் வெளியிடப்பட்ட "வானொலி மஞ்சரி" இதழின் பக்கத்திலிருந்து பெறப்பட்ட, ‘தமிழ் வர்த்தக சேவையின் தொடக்க விழா’ என்ற தலைப்பிலான கட்டுரை ஆகும். இக்கட்டுரையானது இலங்கை வானொலியின் தமிழ் வர்த்தக சேவை தொடர்பான வரலாற்று நிகழ்வுகளையும், கொள்கை முடிவுகளையும், அதன் நோக்கம் பற்றிய விபரங்களையும் கொண்டிருப்பதால், இந்தக் கட்டுரையானது ஆவணச் உள்ளடக்கப் பகுப்பாய்வு என்ற அணுகுமுறையைப் பயன்படுத்துகிறது. இம்முறையின் ஊடாக, வரலாற்றுக் காலப்பகுதியை வரையறுத்தல், சேவையின் நோக்கத்தைப் பகுப்பாய்வு செய்தல் மற்றும் சேவையின் விரிவாக்கத்திற்கான காரணிகளை மதிப்பிடுதல்  செய்யலாம். தொடக்க விழாவின் போது இலங்கை ஒலிபரப்புக் கூட்டுத்தாபனத்தின் தலைவராக பி.எஸ்.ஜெயவர்தனாவும், பணிப்பாளர் நாயகமாக ஜனதாச பீரிஸும் இருந்தனர் என்பது இங்கு குறிப்பிடத்தக்கது. 

கட்டுரையின் படி, இலங்கை ஒலிபரப்புக் கூட்டுத்தாபனத்தில் தமிழ் வர்த்தக சேவைக்கு வித்திடப்பட்டது 1983 ஆம் ஆண்டு எனக் குறிப்பிடப்படுகிறது. இச்சேவையை ஆரம்பிப்பதற்கான ஓர் உத்தியோகபூர்வமான கோரிக்கை சுமார் 10 ஆண்டுகளுக்கு முன்பே வர்த்தகச் சமூகத்தினரிடமிருந்து எழுப்பப்பட்டதாகத் தகவல் தெரிவிக்கிறது.

இந்தச் சேவையின் முக்கிய நோக்கமாக, வர்த்தகர்களுக்குத் தேவையான மிக முக்கியமான தகவல்களை வழங்குதல் அடையாளம் காணப்பட்டுள்ளது. கட்டுரையில் பட்டியலிடப்பட்ட அடிப்படைத் தேவைகள் பின்வருமாறு: தினசரிச் சந்தை நிலவரங்கள் மற்றும் விலைப் பட்டியல் குறித்த செய்திகள். வர்த்தக விளம்பரங்கள், வர்த்தகம் தொடர்பான சட்டதிட்டங்கள் மற்றும் அரசாங்க வரிச் சலுகைகள் பற்றிய தகவல்கள். உலகளாவிய வர்த்தகம் மற்றும் சந்தைப்படுத்தல் பற்றிய தகவல் தொடர்புகள். வணிகர்கள், விவசாயிகள், மற்றும் பொதுமக்களின் அறிவைப் புதுப்பித்தலும், தொழில்நுட்ப ஆலோசனைகளை வழங்குதலும் ஆகும்.

1983ஆம் ஆண்டு பெப்ரவரியில் நிகழ்ந்த இந்தத் தொடக்க விழாவானது, இச்சேவையின் ஒரு முக்கிய மறுமலர்ச்சியைக் குறிக்கிறது. இந்நிகழ்வின் போது, இச்சேவையின் ஒலிபரப்பு நேரம் 50 சதவீதத்தால் அதிகரிக்கப்பட்டதாக அப்போதைய இலங்கை ஒலிபரப்பு கூட்டுத்தாபனத் தலைவர் பி.எஸ்.ஜெயவர்தனாவும் தெரிவித்துள்ளார். இது, தமிழ் வர்த்தகச் சமூகத்தின் தகவல் தேவைப்பாடு அதிவிரைவில் அதிகரித்து வருவதை கூட்டுத்தாபனம் அங்கீகரித்திருப்பதைக் காட்டுகிறது.

அமைச்சர் தர்மசிறி சேனநாயகா கருத்துப்படி, வணிகத் தகவல்களை விநியோகிப்பதில் தனியார் வானொலி நிலையங்களின் பங்கு இருப்பினும், பொது ஒலிபரப்பு நிறுவனமான இலங்கை வானொலியானது, நாட்டின் வர்த்தக கொள்கைகள் மற்றும் அரசாங்க முன்னெடுப்புகள் தொடர்பான நம்பகமான தகவல்களை வெளியிடுவதில் தனியானதொரு பொறுப்பைக் கொண்டிருக்கின்றது. இந்த விரிவாக்கம், தமிழ் வர்த்தகர்களைப் பொருளாதார வளர்ச்சிப் பாதையில் இட்டுச்செல்லும் கூட்டுத்தாபனத்தின் தொலைநோக்குச் சிந்தனையின் ஒரு பகுதியாகக் காணப்படுகிறது.

வர்த்தக சேவையின் புகழ் இலங்கை மட்டுமல்லாது, தமிழகத்திலும் பெரிய தாக்கத்தை ஏற்படுத்தியது எனலாம். கொழும்பு சர்வதேச ஒலிபரப்பு என்ற பெயரில் மத்திய அலை 873 கி.ஹெசில் ஒலி உலா வந்ததை மறக்கத்தான் முடியுமா? அதில் தமிழகத்தின் விளம்பரங்கள் இடம்பெற்றன. திருச்சி லீவி பப்ளிசிட்டி விளம்பரங்களைத் திரட்டித் தந்ததில் பிற்காலத்தில் முதன்மையான நிறுவனமாக இருந்தது.

இலங்கை ஒலிபரப்புக் கூட்டுத்தாபனத்தின் தமிழ் வர்த்தக சேவையானது, 1983இல் அதன் ஆரம்ப வித்திலிருந்து, தமிழக  வர்த்தகச் சமூகத்தின் தகவல் இடைவெளியை நிரப்புவதில் அசைக்க முடியாத ஒரு சக்தியாகச் செயற்பட்டுள்ளது. வர்த்தகர்களுக்குத் தேவையான துல்லியமான, காலந்தவறாத சந்தைத் தகவல்கள் மற்றும் சட்டரீதியான ஆலோசனைகளை வழங்குவதன் மூலம், இச்சேவையானது தேசியப் பொருளாதார ஒருங்கிணைப்பிற்கு ஒரு முக்கியப் பங்களிப்பை வழங்கியுள்ளது. தமிழ் பேசும் தொழில்முனைவோர் மற்றும் விவசாயிகளின் சமூகப் பொருளாதார மேம்பாட்டிற்கான இலங்கை அரசாங்கத்தின் அர்ப்பணிப்பைப் பிரதிபலிக்கிறது. இவ்வாறான மொழிவாரி, துறைசார் சேவைகள் தொடர்ச்சியான ஆதரவு மற்றும் நவீனமயமாக்கலின் ஊடாகப் பேணப்படுவது, நாட்டின் ஒட்டுமொத்தப் பொருளாதார நிலைத்தன்மைக்குப் பேருதவியாக அமைந்திருந்தது.

மேற்கோள்:

தமிழ் வர்த்தக சேவையின் தொடக்க விழா [பெப்ரவரி 1996 இதழின் அச்சுப் பிரதி]. வானொலி  மஞ்சரி, 3, 3. [இலங்கை ஒலிபரப்புக் கூட்டுத்தாபனத்தின் வெளியீடு].

 #

இலங்கை வானொலி அஞ்சல் தலைகள்

 நூற்றாண்டு காணும் இலங்கை வானொலி: சிறப்பு கட்டுரைத் தொடர் -9

 

இலங்கை வானொலி: பாரம்பரியமும் தொழில் நுட்பப் புரட்சியும் – அஞ்சல் தலைகள் கூறும் கதை

இலங்கை ஒலிபரப்புக் கூட்டுத்தாபனம் ஆசியாவின் முதல் வானொலி நிலையம் எனும் பெருமையைத் தாங்கி நிற்பதை நாம் அறிவோம். 1922 இல் சோதனை ஒலிபரப்பைத் தொடங்கி, 1925 இல் முறையான சேவையை ஆரம்பித்த இந்த நிறுவனம், அதன் நூற்றாண்டு கால வரலாற்றைப் போற்றும் விதமாக வெளியிட்ட இரண்டு அஞ்சல் தலைகள், இலங்கையின் தகவல் தொடர்புப் பரிணாமம் மற்றும் அதன் உலகளாவிய தாக்கத்தை மிகச் சிறப்பாகப் பதிவு செய்கின்றன. இந்த இரண்டு முத்திரைகளும் இலங்கையின் வானொலி வரலாற்றின் இரண்டு வெவ்வேறு காலக்கட்டங்களை, அதாவது, அதன் உறுதியான பாரம்பரியத்தையும், நவீன தொழில்நுட்பப் பாய்ச்சலையும் ஆவணப்படுத்துகின்றன.

அஞ்சல் தலை 1: வானொலித் தொடர்பாடலின் நூற்றாண்டு (1924–2024)

முதல் அஞ்சல் தலையானது, இலங்கை வானொலித் தொடர்பாடலின் நூற்றாண்டு விழாவைக் குறிக்கிறது. இதன் மதிப்பு ரூ. 50.00 எனக் குறிக்கப்பட்டுள்ளது.

பாரம்பரியக் கட்டிடம் மற்றும் அலைபரப்பு கோபுரத்தை மையப்படுத்தி இந்த அஞ்சல்தலை வெளியிடப்பட்டது. முத்திரையின் மையத்தில், இலங்கையின் ஆரம்பகால ஒலிபரப்பு நிலையத்தின் பாரம்பரியமான கட்டிடம் சித்தரிக்கப்பட்டுள்ளது. இந்தக் கட்டிடம், கொழும்பில் அமைந்திருக்கும் புகழ்பெற்ற 'ரேடியோ சிலோன்' நிலையத்தின் வரலாற்று முக்கியத்துவத்தை வலியுறுத்துகிறது. இந்த நிலையம், 1950கள் மற்றும் 60களில் "கொழும்பு ஒலிபரப்பு நிலையம்" என்று உலகெங்கிலும், குறிப்பாக இந்தியத் துணைக்கண்டத்தில் மிகவும் பிரபலமாக விளங்கிய பொற்காலத்தை நினைவுபடுத்துகிறது.

கட்டிடத்தின் வலது பக்கத்தில், சிக்னல்களைப் பரப்பும் வானொலி ஒலிபரப்பியும், அலைவரிசை சின்னமும் தெளிவாக வரையப்பட்டுள்ளது. இது, அன்றைய காலத்தின் அலைபரப்பு தொழில்நுட்பத்தின் வலிமையையும், குறிப்பாக சிற்றலைவரிசைகள் மூலம் அமெரிக்கா வரையிலும் அதன் ஒலிபரப்பைக் கேட்க முடிந்த சர்வதேச வீச்சையும் குறிக்கிறது.

“Century of Radio Communication in Sri Lanka – 1924 2024” என்று குறிப்பிடப்பட்டிருப்பது, இந்த அஞ்சல் தலையானது ஒரு நூற்றாண்டு காலத் தகவல் தொடர்பு சேவையைப் போற்றும் வகையில் வெளியிடப்பட்ட ஒரு நினைவுக் குறியீடு என்பதைத் தெளிவாக்குகிறது.

• 
  

அஞ்சல் தலை 2: டிஜிட்டல் யுகத்தின் கூட்டுத்தாபனம் (SLBC - 50ஆம் ஆண்டு நிறைவு)

இரண்டாவது அஞ்சல் தலையானது, இலங்கை ஒலிபரப்புக் கூட்டுத்தாபனத்தின் (SLBC) 50 ஆம் ஆண்டு நிறைவைக் குறிக்கிறது. இதன் மதிப்பு ரூ. 10.00 எனக் குறிக்கப்பட்டுள்ளது.

 

பழமையும் புதுமையும் இணைந்த சித்திரம் இந்த அஞ்சல் தலை. இந்த முத்திரையானது, பழைய ஒலிபரப்புக் கட்டுப்பாட்டு அறையையும் நவீன செயற்கைக்கோள் தொழில்நுட்பத்தையும் ஒரே சட்டகத்திற்குள் கொண்டு வந்துள்ளது. இடதுபுறத்தில், ஒலிபரப்புச் சாதனங்களுடன் பணியாளர் ஒருவர் அமர்ந்திருக்கும் கருப்பு வெள்ளைப் படம், இலங்கை வானொலியின் ஆரம்ப கால மனித உழைப்பையும், அற்பணிப்பையும் காட்டுகிறது.

 

வலதுபுறத்தில், பூமியின் நீலப் பின்னணியில் மிதக்கும் செயற்கைக்கோள் வரையப்பட்டுள்ளது. இது, வானொலி ஒலிபரப்பு, சிற்றலைகள் மூலம் அனுப்பப்பட்ட பழைய முறையிலிருந்து விண்வெளிக் கோள்கள் மூலம் டிஜிட்டல் முறையில் அனுப்பப்படும் நவீன தொழில்நுட்பப் புரட்சியைக் காட்டுகிறது.

 

இந்த முத்திரை, 1972 இல் இலங்கை குடியரசாக மாறிய பிறகு இந்நிறுவனம் "இலங்கை ஒலிபரப்புக் கூட்டுத்தாபனம்" என்று பெயர் பெற்ற பிறகு அடைந்த தொழில்நுட்ப வளர்ச்சிப் பாய்ச்சலைக் குறிக்கிறது. இது, ரேடியோ சிலோன் அலைகள் எவரெஸ்ட் சிகரம் வரை கேட்க முடிந்த அளவிற்குத் தரமான தொழில் நுட்பத்தைக் கொண்டிருந்த பாரம்பரியத்தில் இருந்து, செயற்கைக்கோள் வழி ஒலிபரப்புக்கான மாற்றத்தையும் வளர்ச்சியையும் அடையாளப்படுத்துகிறது.

 

“50th Anniversary 1967 – 2017” என்று இந்த அஞ்சல் தலையில் குறிப்பிடப்பட்டுள்ளது, இலங்கை ஒலிபரப்புக் கூட்டுத்தாபனம் நிறுவப்பட்டு 50 ஆண்டுகள் நிறைவடைந்ததைக் குறிக்கிறது.

இந்த இரண்டு அஞ்சல் தலைகளும் இலங்கை வானொலியின் வரலாற்றை இரண்டு முக்கியமான பரிமாணங்களில் இருந்து ஆய்வு செய்கின்றன. முதல் முத்திரை, பாரம்பரியத்தின் வலிமையையும், வானொலித் தொடர்பாடலின் நூற்றாண்டுப் பெருமையையும் பறைசாற்றுகிறது. இரண்டாவது முத்திரை, பழைய கால அற்பணிப்புமிக்க ஊழியர்களுக்கும், டிஜிட்டல் யுகத்தின் விண்வெளிக் கோள்தொடர்புக்கும் இடையிலான தொழில்நுட்பப் பரிணாமத்தைச் சுட்டிக்காட்டுகிறது.

மொத்தத்தில், இந்த அஞ்சல் தலைகள் வெறும் அஞ்சல் பயன்பாட்டுக்கானவை மட்டுமல்ல; அவை இலங்கையின் தகவல் தொடர்பு வரலாறு, கலாச்சாரத்தின் உலகளாவிய தாக்கம், மற்றும் தொழில்நுட்ப வளர்ச்சியில் நாடு அடைந்த முன்னேற்றம் ஆகியவற்றைச் சுருக்கிக் காட்டும் கலைப் பொக்கிஷங்களாகத் திகழ்கின்றன.

 

இலங்கை வானொலி: முதல் நாள் கடித உறைகள் கூறும் தகவல் தொடர்பு வரலாறு

இலங்கை ஒலிபரப்புக் கூட்டுத்தாபனம் தொடர்பான இந்த முதல் நாள் கடித உறைகள், நாட்டின் தகவல் தொடர்பு வரலாற்றில் முக்கியமான இரண்டு காலகட்டங்களை ஆவணப்படுத்துகின்றன.

1. 150 நிறைவு (1824–2024): மார்க்கோனியின் அஞ்சல் தலை

 இந்த உறையானது, ரேடியோ தொடர்பின் தந்தை எனக் கருதப்படும் குய்லியல்மோ மார்க்கோனியின் 150வது பிறந்தநாளை (1874-2024) மையப்படுத்துகிறது. இது, இலங்கையின் வானொலிச் சேவைக்கான அடித்தளத்தை அமைத்த மார்க்கோனியின் வயர்லெஸ் தொழில்நுட்பத்தின் ஆரம்பகால வரலாற்றை நினைவுபடுத்துகிறது. உறையின் மேல் உள்ள அஞ்சல் தலையில் மார்க்கோனியின் உருவப்படமும், ஆரம்பகால மோர்ஸ் குறியீட்டு சாதனங்களும் இடம்பெற்றுள்ளன. உறையின் இடதுபுறத்தில் உள்ள பூமியின் மீது பரவியுள்ள நீல அலைகள் கொண்ட சித்திரம், வானொலித் தொடர்பின் சர்வதேச வீச்சையும், அது உலகை இணைத்த விதத்தையும் குறிக்கிறது.

2. பொன்விழா நிறைவு (1967–2017): பாரம்பரியமும் தொழில்நுட்பமும்

 இரண்டாவது உறையானது, இலங்கை ஒலிபரப்புக் கூட்டுத்தாபனத்தின் 50வது ஆண்டு நிறைவை (1967-2017) குறிக்கிறது. இதன் அஞ்சல் தலையில் பழைய ஒலிபரப்புக் கட்டுப்பாட்டு அறையும் நவீன செயற்கைக்கோளும் அருகருகே சித்தரிக்கப்பட்டுள்ளன. இது, பாரம்பரிய ஒலிபரப்பு முறையிலிருந்து டிஜிட்டல் யுகத்திற்கான தொழில்நுட்பப் பாய்ச்சலை அழுத்தமாகக் காட்டுகிறது. உறையில் உள்ள SLBCயின் அதிகாரப்பூர்வச் சின்னம், இலங்கை வரைபடத்தில் வானொலிக் கோபுரத்தைக் காட்டி, தேசிய ஒலிபரப்பில் அதன் முக்கியத்துவத்தை வலியுறுத்துகிறது. இந்த முதல் நாள் உறைகள், இலங்கை ஒலிபரப்பின் பாரம்பரிய மதிப்பு மற்றும் அதன் நவீன தொழில்நுட்பப் பரிணாமத்தை ஒரே நேரத்தில் வரலாற்று ஆவணங்களாகப் பதிவு செய்கின்றன.